Чаа – хоосчылар хараанаң
Кöзiдiг. «Читiген» Хакас национальнай драма театрында Илбек Ада чааның улуғ чиңiзiне чарыдылған «Илбек Чиңiс» хоостар кöзiдии тоғынча.
Ирткен чӱс чылда хазнаның махачы ооллары тöреен чир-суубысты азымахчы ыырӌыдаң прай кӱстерiн салып арачылааннар. Ол хорғыстығ чаа полған на сöбiреде тирең iс артысхан: чаада чуртастарын пир салған миллионнар оол, палығлатхан чааӌылар, пленге кiрген кiзiлер.
– Аарлығ нанӌылар, кöзiдiге килiп, пicтiң проектке хозылғаннарың ӱчӱн улуғ алғызым читiрчем. Наа пайзаң ибiбiсте мындағ наа хаалағлар идiп пастапчабыс. Iзенчем, мыннаң мындар чапсых проекттер чуртасха сыбыра кир турарбыс. Кöзiдiге чапсых хоостарын ағылған чайаачыларға улуғ алғыс. Проектте чииттер араласчатханы öрiндiрче. Прайзыбыстың хорғыстығ чааны ирткен туған-чағыннарыбыс пар. Пiс ол аар чылларны ундутпасха кирекпic, – кöзiдiгнi азып, чоох тутхан театрның устағӌызы Ирина Чустугешева.
«Хакасия» газетаның сомӌызы Лариса Баканова улуғ хоостар чайирға хынадыр. «Читiген» театрның пайзаң ибiнзер кiрзöк, аның «Ағбандағы 1 № школадағы госпиталь: чааның паза амыр чуртастың симфониязы» хоозы харахха тасталча. Ол тоғыста сын полған кiзiлернiң омалары чайал парған.
– «С любовью к Родине» кинденi чарыхха сығарарға тимнепчеткенде, мин аны хығырғам. Анда кiчiг оолах Эдик Шаталов, госпитальларӌа чöрiп, палығлатхан чааӌыларның кöңнiн кöдiрӌең тiп пазыл парған. Эдик Шаталов «Хакасия» газетаның хабарӌызы Татьяна Потапованың харындазы полар тiп сағын салғам. Анаң мин Татьяна Алексеевнадаң харындазы олған тузында скрипканаң ойнаӌаң ма тiп сурғам. Ол «йа, ойнаан» тiп нандырған. Iди мин аннаң Эдик Шаталовтың олған тузындағы сомын сурап алғам. Оолах 6 частығдаң сығара музыка школазынзар чöрӌең паза госпитальларда скрипканаң ойнаӌаң.
Хоостағы тöзекте чаада палығлат салған Григорий Васильевич Марченко чатча. Хости алтын холлығ хирург Фёдор Александрович Гергенредер турча. Чааӌы Марченко азах чох халарға кирек полған. Че улуғ пiлiстiг имӌi, син ам даа плесет саларзың тiп, аның азағын ал халған. Соонаң Григорий Марченко Ағбандағы ӱгретчiлер училищезiнде тоғынған паза театрда матростарның «Яблочко» теелбегiн салған.
Мында iдöк аккордеоннығ оолахты хоостап салғам, ады – Коля Бобылёв. Ол, öс парғанда, сыбыра сағысха кирӌең, хайди госпитальларӌа чааӌыларның кöңнiн кöдiрерге чöрӌең, – чарытхан Хакасия культуразының саблығ тоғынӌызы Лариса Баканова.
«Илбек Чиңiс» кöзiдiге Н.Ф.Катановтың адынаң Хакас хазна университедiнiң профессоры Лариса Анжиганованың «Чааӌы iӌезiнiң ачии», «Илбек чааӌы», «Чааӌыны сахтап», «Чааӌы ибiнзер айланча», «Чаа соондағы пастағы чахайахтар» паза пасха даа сiлiг хоостары сығарылған.
Лариса Викторовна алты чыл мының алнында хоостап пастаптыр. Пу тус аразына аның позы чайаан прай чӱсче хоозы пар. Ағаа хоза, iкi кöзiдии ирткен, пастағызы – 2018 чылда Ағбандағы «Чылтыс» кöзiдiг залында, iкiнӌiзi – 2023 чылда С.П.Кадышевтiң адынаң чон чайаачызы кiнiнде.
Проектте Хакас Республиканың олған искусство школазының тоғыстарын кöрiп аларға чарир, оларның санында Ангелина Куюкованың «Аар чыллар» хоозы, Диана Кучеренконың – «Ленинградтағы хызыӌах Таня Савичева», Елена Боргоякованың – «Шостаковичтiң читiнӌi симфониязы», Ариана Барашкованың – «Хурчағның тоозылғаны» паза пасхазы.
Кöзiдiге килген аалӌыларға чиит авторлар хорғыстығ чаадаңар, Илбек Чиңiстеңер, СВО-даңар кибелicтерiн хығырғаннар. «Илбек Чиңiс» проект сiлкер айының 10-ӌы кӱнiне теере тоғынар.
Сом Альбина Чистогашевани
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |