Махачылар. 15 сiлкерде Хакасияның ӱлгӱ туразында чӱрексiнiстiг тоғазығ ирткен. Украина чирiнде парчатхан öнетiн чаа операциязында пос кöңнiнең араласхан, ыырӌының алнында тöдiр пазынмаан iкi чир-суғӌыбысха хазна сыйии читiрiлген.

Хакасия пазы Валентин Коновалов Россияның президентi алған чарадығ хоостыра махачы хылыхтығ чир-суғӌыларыбысха хазна сыйыхтарын ӱлгӱ туразында читiрген. Тоғазығ тузында Анатолий Угдыжеков таа, Дмитрий Кунчай даа медальға турысханына киртiнминчеткен чiли тудынғаннар, хазнабысты арачылирында пасхазынаң халбасха харасхабыс, позыбыстың алнында турғысхан пöгiннернi толдырғабыс тееннер.

– Чир-суубысха сидiк туста аны арачылир сағыснаң сiрер Украина чирiнде парчатхан öнетiн чаа операциязында пос кöңнiнең араласхазар, чиит улусха маңат кöзiдiм полчазар. Хазнабыс сiрернiң махачы хылииңарны турыстығ паалаан, – тоғазығ тузында айланған алғыстас сöстерiнең Хакасия пазы Валентин Коновалов.

Анаң Валентин Олегович СВО-да пос кöңнiнең араласхан махачыларның кöксiне iкiнӌi степеньнiг «Махачы ӱчӱн» медаль хазаан. Россияның президентi Владимир Путиннiң чарадиин толдырған соонаң Хакасия пазы алып-кӱлӱктернiң хайзына даа хазых чуртас, часкалығ ӱлӱс, наа чидiглер алғаан. Валентин Коноваловтың искiриинең, Анатолий Угдыжеков таа, Дмитрий Кунчай даа Украина чирiнде парчатхан öнетiн чаа операциязында пiстiңнернiң «Парыс» отрядында чааласхан полтырлар, Хакасияны махтаға сығартырлар.

– Россияа служить полчабыс! – хысхаӌахти нандыр турғаннар хазна сыйиина турысхан махачы хылыхтығ чир-суғӌыларыбыс.

Чаалазығларда араласхан улус хаӌан даа кöп чоохтанарға хынминча. Сöбiрелерiбiс сидiк оңдайға кiр парза, хайдағ даа сын сағыстығ ирен аны арачылирға тимде поларға кирек тiпчелер. Украиназар аймах чирлердең чыылысхан-садынған неонацисттер, пiстiң хазнабысха хорғыс идiп, полған на сöбiренiң амыр чуртазын сайбапчалар. Аннаңар хайдағ ирен мындағ туста ибде истiг сағыстығ одырар. Ыырӌы позының азымахчы хылиинаң олаңай кiзiлернi хазнабысты арачылирға, холға тирiг аларға, сöбiре ӱчӱн турызарға кöдiрче.

Хакасияның ӱлгӱ туразында ирткен чӱрексiнiстiг тоғазығда араласхан пасха даа устағӌылар махачы чир-суғӌыларыбысты хазна сыйиинаң чылығ алғыстааннар, ибзер айланғанда, чииттерге кöзiдiм полып, СВО-даңар чоохтап пир турарға алғааннар. Iди Хакасияның Ööркi Чöп кнезiнiң пастағы орынӌызы, Хакасияның Улуғлар чöбiнiң кнезi Пётр Воронин, Хакасия пазының орынӌызы Михаил Побызаков, Хакасияның чааӌылар комиссары Николай Видяйкин пiстiң республиканың чииттерi Украинада парчатхан öнетiн чаа операциязы араласчыларынаң тоғазарға хынчатханнарын, олардаң кöзiдiм аларға харасчатханнарын таныхтааннар, ол кирек тоғысты узарадарға сурынғаннар.

Хакасияның ӱлгӱ туразындағы тоғазығ тоозылчатханда, республика пазы Валентин Коновалов позының хыринзар Анатолий Угдыжековты хығырып алған. Анаң Угдыжековтар родының алып-кӱлӱк оолғы тойға тимненче, сöбiре тöстепче теен. Анатолий Анатольевичтiң хызын хығырып, ағаа сiлiг чахайахтар читiрген, наа сöбiре тöстирге тимненчеткеннернi чылығ алғыстаан, мындағ махачы чааӌы палаларына чахсы кöзiдiм ползын тiп алғаан.

Валентин Олеговичтiң чылығ, паарсах сöстерiн тоғазығ араласчылары ӱр тохтабас айа сабызынаң удурлааннар, аның алғыстастарына хозылғаннар.

Сом Дмитрий Сунчугашевти