ПАЙРАМНЫ ТУРЫСТЫҒ УДУРЛИРБЫС
25.08.2017
Хабарлар
ХАКАСИЯДА 2017 ЧЫЛНЫ «СУЭК» ПІРІГІС КӦП АЙМАХ ПӦЗІК КӦЗІДІМНЕРНЕҢ ТАНЫХТАПЧА ПАЗА ХАЛЫХ-ЧАРЫДЫҒЛЫҒ ЧУРТАСТА ӦТКІН АРАЛАЗАРҒА ПӦГІН ТУТЧА. ПРАЙ ОЛ ЧИДІГЛЕР ПАЗА КӦЗІДІМНЕР ХАРАТАСЧЫ КӰНІ ПАСТАЛҒАННАҢ 70 ЧЫЛЫ ТОЛЧАТХАНЫНА ЧАРЫДЫЛЧАЛАР.
- ПІСТІҢ ӰЛӰКӰНІБІС АЛЕКСЕЙ СТАХАНОВТЫҢ РЕКОРДТАРЫНАҢ ПАЛҒАЛЫСТЫҒ. ІСТЕНІСТЕГІ
ЧАЛТЫРАМА ЧИДІГЛЕРІНЕҢ ОЛ МУҢАРЛАП ЧИР-СУҒҶЫЛАРЫБЫСТЫҢ ЧӰРЕКТЕРІНДЕ ЧАЛЫННЫҒ ОТ ТАМЫСХАН, ТОҒЫСТА НАА КӦЗІДІМНЕРГЕ ЧИТ ТУРАРҒА КӦӦКТІРГЕН. ЧЫЛЛАР ИРТІСЧЕЛЕР, ЧУРТАС ОҢДАЙЫ АЛЫЗЫП ОДЫРЧА, ЧЕ САБЛЫҒ ХАРАТАСЧЫНЫҢ ЧАЛТЫРАМА КӦЗІДІМІ УСПИНЧА, ПӰӰНГІ ДЕЕ КӰНДЕ ТОҒЫСТА НАА ЧИДІГЛЕРГЕ ЧИДЕРГЕ
ХЫҒЫРЧА.
Пӧзік устарның тоғызы паза пик палғалыс СУЭК-тың иң чахсы чидии полча. Пірігістің чалтырама кӧзідімнері - полған на харатасчының таланты, хада-пірге тоғынчатханы, чахсы чидіглерге кӧстегліг полчатханы сылтаанда. Халғанҷы ӱс чыл аразына СУЭК-тың Хакасиядағы пӧлиинде тоғынчатхан экскаватор экипажтары тилекейнің 10 рекордын турғызыбысханнар. Андағ полған на экипажта пасхазына кӧзідім полчатхан тоғысчы пар. Ол позы ла чахсы істенерге хараспинча, пасхазын кӧӧктірче, чииттернің ӱгретчізі полча. Андағларның санында «Іскеркі-Пии разрезтегі» Виктор Бычковты, Владимир Панковты, Евгений Журавинні, «Харатас» разрезтегі Андрей Лукинні, Виктор Ярошты, Пётр Тормозаковты адирға чарир. Олар тоғыста пӧзік устарға саналчалар, хара тас аныпчатхан отрасльда иң артыхтары полчалар. Чидіглері хоостыра Алексей Стахановнаң тиңнестірерге чарир.
Істеніс матырларына кӧӧгіп, тоғысчы ӧмелер кӧзідімнерін чылдаң чылға ӧскіріп одырчалар. Олох туста хорғыс чох тоғынарына ӧӧн хайығ айландырылча. 2016 чылда піс пастағызын на 13 млн. тонна хара тас анирға пӧгін турғысхабыс. Сынында 13,2 млн. тонна хара тас чир ӱстӱне сығарылған. Анзы, 2016 чылнаң тиңнестірзе, 1 млн. тонна хара тасха кӧп.
Харатасчылар 2017 чылда ідӧк тӱзімніг істен парчалар. Чарым чылға 5,7 млн. тонна хара тас анирға пӧгін турғысхан ползабыс, сынында ол кӧзідім 6,4 млн. тоннаа тиңнелче. Мында прайзының алнында парча «Харатас» разрез - 3,79 млн. тонна. «Іскеркі-Пии разрезтің» кӧзідімі 1,7 млн. тонна, «Ызых» разрезти 555 муң тонна. «Хакасский» шахта чарым чыл аразына вагоннарға 500 муң тонна артиинаң хара тас таарлабысхан. Шахталар ӱстӱндегі чирні хыйа алар тоғыс 107,5 %-ке толдырылған. Прай пу саннар 2017 чылны турыстыра кӧзідімнернең тоозарына ізеніс пирче.
Алныбыста турчатхан ӧӧн пӧгіннернің пірсі - аныпчатхан хара тастың качествозын чахсыландырары. Анзын рыноктың конъюктуразы кирексіпче. Іди піске ДПК 100 - 200 мм концентратты сығарарын тохтадарға киліскен. Аның орнына ДПК 60 - 130 мм, ДО 25 - 60 мм паза ДМС 6 - 25 мм концентраттар сығарып пастаабыс. Технологияны алыстырарға киліскен. Олох арада концентраттар сығарары тохтадылбаан. Кӧзідімге, 2017 чылда 12 мартта «СУЭК-Хакасия» фабрика 33000 тонна хара тас тоғыныбысхан. Анзы иң артых чидіге саналча.
Мында иң пастап чахсы тоғынчатхан кізілерні таныхтирға чарир. Фабрика сыбыра ікі сменалығ тоғынған. Пірсінең Андрей Котов, ікінҷізінең Светлана Зотова устааннар. Хайзы даа чиит специалист. Че оларның ӱгретчілері улуғ опыттығ тоғысчылар полғаннар. Хара тасты пайытчатхан фабрика 40 чыл тоғын парир. Анда ӱр чыллар істен салған кізілер илееде. Піс оларны «алтын фондыбыс» тіп улуғласнаң адапчабыс. Ветераннар фабриказар наа килген чииттернең опыттарынаң хынып ӱлесчелер. Пілчелер - таңдағы чидіглер чииттернің холында.
Паза фабриканың устағ-пастаан чахсы саринаң таныхтирға чарир. Олар тоғысчыларның істеніс оңдайларын чахсыландырарына, тыхтағ тоғыстарын тузында иртіреріне, иргі оборудованиені алыстырарына сыбыра хайығ айландырчалар.
Аннаңар даа пу предприятие хаҷан даа тӱзімніг тоғынчатханнар санында адаладыр. Іди 2007 чылдаң 2014 чылға читіре хара тасты пайыдар тоғысты ікі хати ӧскірібіскеннер. 2014 - 2016 чылларда фабрика 7,2 млн. тонна хара тас садыға сығарған. 2017 чылның пастағы чардығында кӧрілген план 136 %-ке толдырылған.
Мындағ чалтырама кӧзідімнерге харатасчыларның пӧзік устары сылтаанда читчебіс. Че позының тоғызында кем иң артых полчатханын піліп алар ӱчӱн, СУЭК пірігістің пӧліктері аразында олимпиадалар иртірілчелер. 2017 чылда андағ марығ полғанох. Ол Харатасчыларның кӱніне 70 чыл толчатханына паза Россияда хара тас анып пастаанынаң 295 чыл толчатханына чарыдылған. Олимпиадада араласхан харатасчылар постарының пӧзік узын, техниканаң чахсы тузаланчатханнарын, хорғыс чох тоғынар нормаларны паза правилоларны маңат пілчеткеннерін кӧзіткеннер. Пастап марығның сыныхтағлығ чардыхтары иртірілген. Артыхтарның артыхтары азах меетсер ирткеннер. Таныхтирға кирек, «СУЭК-Хакасия» пӧліктің харатасчылары хомай нимес тимненіс кӧзіткеннер, хай пірее номинацияларда сыйыхтығ орыннарға сығып алғаннар. Оңарылыстығ, сыйыхтар алғаны уғаа ӧріністіг. Че мындағ олимпиадаларның ӧӧн пӧгіні - пай опытнаң ӱлескені, артыхтарның артыхтарынаң тиңни марығлазарға харасханы, олар хайди тӱзімніг тоғынчатханын кӧріп алары. СУЭК-тың пӧгіні - Россиядағы хара тас аныпчатхан компаниялар аразында артыхтар санына сығып алары.
Россияның президенті Владимир Путиннің чарадии хоостыра пӱӱл Экология чылы тіп чарлалған. Ол сылтағнаң пістің пірігістің предприятиелері ибіркіні хайраллап халарына хайығ айландырчалар. Іди 2016 чылда чоон резина тегілектерні оохтирына СУЭК 50 млн. салковай позытхан. Соонаң аны пасха продукцияа айландырарға чарир - резинадаң тимнелген чабығларны спорт паза олған площадкаларында тузаланар оңдай полар. Алай ба хорғыс ағылбинчатхан бордюрлар, плиткалар, брусчаткалар тимнеп пастирлар.
Паза 2016 чылдаң сығара «Іскеркі-Пии разрезте» арығлаҷаң сооружениелер пӱдіріп пастабысхабыс. Пӱӱл ол тоғыс узарадылча, уғаа кӧп ахча хорадылча. Анзы тиктең нимес. Пу разрез чылдаң чылға тиліп турар, ӧзер. Аннаңар, закон хоостыра, ибіркіні арачылир тоғыстар толдырылча. Пӱӱл ол сооружениелер тузаланысха кирілер.
2017 чылда май айда «СУЭК-Хакасияның» тоғынҷылары Ағбан пилтірі аймаанда паза Харатас городта 500 артиинаң чиит ағас одырт салғаннар. Прай пу тоғыстар «Зелёная Весна» акция хоостыра иртірілгеннер. Ідӧк пӱӱл, 2016 чылдағы чіли, Харатас городтағы харатасчылар паркында 60 ағас одыртханнар. «Харатас» разрезте тоғысчылар 70 ағас одыртханнар. Ағбан пилтірі ай-маандағы Солнечнай аалда, ол шахталарға чағын орныхча, 400 хорбыҷах одыртылған. Ағаа хоза, «СУЭК-Хакасия» пірігістің тоғынҷылары ол ағастарны сыбыра суғлапчалар.
2016 чылдағы сан пирістіг докладта «СУЭК» АО, экология фондынаң паза ООН-ның тиліс программазынаң палғалыс тудып, нинҷе-нинҷе чыл изере ибіркіні хайраллир кирекке улуғ хайығ айландырчатханы таныхталча. Ідӧк ол Хакасияның аал хонии сурығларынҷа НИИ-ның ученайларынаң палғалыс тутча. Оларның чӧптері хоостыра шахта ӱстӱндегі чирні ходырып, пасха орында салғахти ӱӱп сыхханнар. 7 - 10 чыл пазынаң ол орынның оймах чирлерінде кӧк оттар, ағастар ӧзіп пастабысчалар. Іди нинҷе-де тус пазынаң чирлерні тузаланысха кирерге чарир. Хаҷан-да тағлар чіли ӱӱлчеткен тастанды чирлерде пӱӱн хазыңнар, мӱндӱргестер, харағайлар ӧсклеп парғаны харах ӧріндірче. Андағ орыннарда аң-хустар даа чуртап пастабысчалар. Хозаннар даа, тӱлгӱлер дее орта полчалар. Тӱлгӱлер хара тас аныпчатхан карьерлерзер дее кір килчелер. Пілчелер, кізілер оларға хайди даа пірее чиис тасти пирерлер. Анзы харатасчылар таңдағы кӱннеңер сағыссырапчатханын чахсы киречілепче. Карьерзер кір килген сас аңнарны пірдеезі хыйыхтабинча, уламох чиистерінең ӱлесчелер. Андағ оңдайнаң кізілер паза чир-чайаанның аразындағы хайызығларда наа культура тӧстелче тиирге чарир. Кӧзідімге алза, сомдағы тӱлгӱні «СУЭК-Хакасия» пірігістің тоғынҷызы 2017 чылда июль айның ортызында карьер хыринда суурып алған. Аңыҷах тоғысчыларзар, чиис чызын хаап, пірее ниме пирерлеріне ізеніп килген полар. Ол пір дее алҷаастабиндыр - позына пирілген чіҷең нимелерні чібіскен, халғанын апарыбысхан.
2017 чылда чарлалған Экология чылы пӱӱл тоозыл парар, че харатасчылар ибіркіні хайраллирын тохтатпастар. Андағ пик палғалыс полза, кізее ӱр чыллар чир-чайааннаң пілізіп тоғынар оңдай пирілер.
Автор :
Алексей КИЛИН, «СУЭК-Хакасия» ООО-ның ӧӧн директоры
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде