Сӧбіре чылында – сӧбіре сомы
05.04.2024
Хабарлар
Марығ. «Хакас чирі» республика газетазы хығырығҷылар аразында наа марығ чарлапча
Аарлығ хығырығҷылар, «Хакас чирі» республика газетазы хығырығҷылар аразында наа марығ чарлапча: «Сӧбіре чылында – сӧбіре сомы». Піс аны Россияда 2024 чыл Сӧбіре чылына чарыдылғанына чарлапчабыс.
Сӧбіре – ол іҷе-пабанаң палалар ла нимес, ол аға-ууҷалардаң пасти парха-кӧргенектерге теере иң чағын туған-чағыннарыбыс, кемні піс аарлапчабыс, кемге піс хынчабыс. Сӧбіренің чуртазы, тархыны тирбіс, ол сомнар чыындызы, хайда иргі сомнардаң пасти амғы сомнарға читіре нинҷе-нинҷе тӧлнің тӧстелгенін, хайдағ танығлығ тустарда чыылысханын кӧріп аларға чарир. Аннаңар газета редакциязы сомнар мариин чарлабызарға чаратхан. Хайди анда аралазарға?
Пастағызын, пір араласчы марыға пір сом ысча. Анда хайди даа пір сӧбіре алай аның нинҷе-де тӧлі суурынған ползын. Ол ах-хара алай ӧңніг паза чахсы суурылған ползын. Чаҷындағы сомны редакция марығ араласчыларына айландырарға молҷапча.
Ікінҷізін, ол сомнаңар искір пирерге кирек: хаҷан паза хайдағ танығлығ кирек тузында ол иділгеннеңер, иргі сом полза, хайди сірерге читірілгеннеңер пазарға; сомдағы полған на кізіні адап саларға, саблығ аттары пар полза, кӧзідімге, «Хакасияның саблығ ӱгретчізі», «Чыл кізізі» алай пірее ученай степеньні, кӧзіт саларға; сом сӧбірее нимезінең аарлығ полчатханын чарыт пирерге.
Ӱзінҷізін, марығда 6 частаң сығара аралазарға чарир. Араласчы позының толдыра ады-солазын паза аннаң палғалысчаң телефон номерін искірче. Чазы читкелектерге ідӧк іҷе-пабазының алай ӧскірчеткен кізілерінің толдыра ады-солазын паза палғалысчаң телефон номерін ызарға кирек.
Сомны паза аннаңар искірігні 2024 чылның кічіг хырлас айының 15-ҷі кӱніне читіре, «Марыға» танығ идіп, «Хакас чирі» республика газетазының пу адрезіне Россия Почтазынҷа ызарға алай посха килерге: 655017, РХ, Ағбан г., Щетинкин ор., 34; паза электроннай почтаа ызарға чарир: stranahaіar@maіl.rғ. Пу тус соонаң кірген тоғыстар марығда араласпинчалар.
Марыға кірген сомнардаң паза аннаңар искіріглердең иң артыхтары таллалып, «Хакас чирі» республика газетазында, аның официальнай сайтында (www.khakaschiry.ru) паза ВКонтакте социальнай сетьтегі ӧмезінде (vk.com/khakas_chiry) сығарыл турар. Марығ салтарлары улуғ хырлас айының 25-ҷі кӱніне читіре иділер. Араласчылар аразынаң чиңісчі паза сыйыхтығ орыннарға турысхан хығырығҷылар табылар. Оларға дипломнар паза сыйыхтар читірілер.
Автор :
«Хакас чирі» газета редакциязы
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
