РОССИЯ - ПІСТӀҢ ИЛБЕК ХАЗНАБЫС
15.06.2016
Хабарлар
![РОССИЯ - ПІСТӀҢ ИЛБЕК ХАЗНАБЫС РОССИЯ - ПІСТӀҢ ИЛБЕК ХАЗНАБЫС](/upload/iblock/456/4564d8b4ef9844836bf46e59aab78fc9.jpg)
Піс илбек хазнада чуртапчабыс. Аның ады - Россия! Ол тилекейде иң улуғ хазна полча. Аның улии 17126000 кв. км. 12 июнь пістің илбек хазнабыстың кӱні тіп чарлал парған. Пу ӱлӱкӱнні чӱс азыра аймах нациялығ чон таныхтапча.
Пістің кічіг чир-суубыстың ӧӧн городында, Ағбанда, Россия кӱніне В.Г.Чаптыковтың адынаң филармония чахсы тимнен салтыр. Дирижер Вячеслав Инкижековтың устаанынаң симфоническай оркестр паза Хакасияның ырҷылары Пастағы май площадьында чапсых концерт кӧзіткеннер.
Тасхар ізіг кӱн турза даа, город чуртағҷылары ӱлӱкӱнге чахсы кӧң ніліг килгеннер. Площадьта чиит сӧбірелер, аға-ууҷалар паза кічіг иркеҷектер илееде полған. Улуғ частығлар скамейкаларда одырчатханнар, чииттер ағастар алтындағы кӧлектерде турғлапчатханнар, кічіг палаҷахтар, холыҷахтарында шарлар паза флагыҷахтар тудынып алып, ойнап чӱгӱріс чӧрчеткеннер.
Садығҷылар площадьтох ойнаҷахтар, сістеен ит, плов, самса, тадылығ вата сатханнар. Ідӧк чапсых полған иргі автомобильлерні кӧрерге. Кӧзідіге «Запорожец» «Москвич», «Волга», «Урал-ЗИС», «ГАЗ-69» машиналар сығарылғаннар. Олғаннар, оларның хыринда алай кабиналарынзар кіріп алып, іҷе-пабаларынаң хада сомға суурынғаннар. Ӱлӱкӱнде палаларға аймах ӱтертістер кӧп полған. Хайзылары понинең, атнаң чӧргеннер. Понилерге ээлері сіліг изерлер кизірт салтырлар.
Республиканың олған библиотеказының тоғынҷылары Юлия Свирид, Елена Баранова паза Анастасия Григорьева Россиядаңар книгалар кӧзідиин иртіргеннер. Кӧзідіге 25-ке чағын книга сығарылған. Олған библиотеказында «Чиит нанҷылар» волонтерлар клубы тоғынчаттыр. Олар библиотека тоғынҷыларына аймах акциялар, мероприятиелер иртірерге полысчалар. Россия кӱнінде олар палаларға викториналар иртіргеннер. Сурығлар ӧӧнінде пістің хазнадаңар полған. Орта нандырығ ӱчӱн, сыйыхха конфеттер читіргеннер.
Чиркеен хыстарның холларында Минсуғдағы «Пилигрима» студияның устары Наталья Глоба паза Наталья Дмитриева мехенди хоостааннар. Мехенди - кізі идінде хнанаң хоосталчатхан персиядағыларның алай индиядағыларның хоостары.
- Чайғы читкенде, чииттер иттерін чапсых хоостарнаң чазирға хынадырлар. Холларында чӱрегес, ӧрбекей алай хузыҷах хоостап пирерге сурынчалар. Че піреезі сын татулар иттірерге чочынча, - чоохтапча Наталья Глоба, - Мехенди - ол олаңай хоос. Аны хайраллаза, ол кізі идінде 1,5-2 неделя тудылча. Че аны хайди орта хайраллирға кирек? Олаңай ла. Хоосты эвкалипт, кокос, оливковай алай чағбан хайахнаң сӱртклирге кирек.
Кӱн айағ чох ізітчетсе дее, Пастағы май площадьында, симфоническай оркестрнің концертін кӧріп ала, чахсы тынанып алар оңдай полған. Ӱлӱкӱн минің кӧңніме кірген. Че хайдағ кӧңніліг халғаннар чуртағҷылар?
Зинаида КИШТЕЕВА:
- Концерт чахсы! Симфоническай оркестрні пос хараамнаң пастағызын на кӧрдім паза истім. Идімҷе соох ойлапча! Вячеслав Инкижековха тың морсынчам. Чоохтирға кирек, минің пӱӱн тӧреен кӱнім. Концертке чалғысхан килгем. Піди тӧреен кӱнімні таныхтапчам.
Зинаида ТОХТОБИНА:
- Мин концертке ӧӧремнең килгем. Піс аннаң хада пір орында одырбинчатхан кізібіс, прай чирде чӧрчебіс, концерттерні пір дее иртірбинчебіс. Позым Асхыс аймаандағы Хызыл Ағбан аалдаңмын.
Виталий ТОРТОЧАКОВ:
- Ӱлӱкӱнге сӧбіремнең килгем. Палаларыбыснаң тынағ кӱннерін хада иртірерге кӱстенчебіс. Мындағ мероприятиелерге удаа чӧрерге киліспинче. Концерт пӧзік синде иртче. Филармония чахсы тимнен салтыр.
Тамара ОКУНЕВА:
- Мин 90 чазыма чағдабысхан даа ползам, концерттерге сыбыра чӧрчем. Пӱӱнгі концерт чахсы, че аразында хореография номерлері полған полза, улам маңат поларҷых. Россия кӱні Пастағы май площадьында иртерін газета пастыра піліп алғам. Пеер чалғысхан килгем. Пала-пархаларым прайзы тоғынча.
Мин пістің республикаа поғдархапчам. Хакасиябыстың культуразы пӧзік синде. Филармонияа, симфоническай оркестрге, артисттерібіске морсынчам.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде