Хакасиядағы туризмнi тилiдерiнде наа хаалағ
![Хакасиядағы туризмнi тилiдерiнде наа хаалағ Хакасиядағы туризмнi тилiдерiнде наа хаалағ](/upload/iblock/7ac/pz1e6tab8ohw8n57zf0hgqjy3a3i01du.png)
Инвестиция проектi. Хакасияда пастағы гидроаэродром тöстелче. Ол Алтай аймааның Алтай аалынаң ырах ниместе орнығар
Пу кӱннерде андар Хакасияның экономика тилiзi министрi Роман Ковтунны, Алтай аймаа пазы Ирина Войнованы, республика хабарӌыларын гидросамолеттың учуғызын кöрiп аларға хығырғаннар. Олар республикада гидроавиация тöстелчеткенiнiң пастағы киречiлерi полыбысханнар.
Гидроаэродром тöрт регионны палғалыстырар: Хакасияны, Хызылчар, Алтай крайларын паза Тыва Республиканы. Мындағ улуғ проекттi «Экспедиционный центр Сибирь» ООО чуртасха кирче, устағӌызы Максим Баёв.
Компания гидроаэродромны пӱдiрерге тиктең нимес Хакасияны таллап алған. Максим Михайловичтiң чооғынаң, Ким тархынынаң пай, суднолар чöр полар суғ, аның тиреңi самолеттарға одырарға паза ööр кöдiрiлерге оңдай пирче. Гидроаэродромзар поплавочнай паза гидросамолеттар учуғарлар, мында сыныхтағлар, кирек полза, тыхтағ иртiр турарлар. Самолеттарнаң туристтернi тартарлар, кöзiдiмге, оларны тағлардағы кöллерзер ал чöрерге алай пöзiк Сойан тағларының сiлиин кöзiдерге чарир. «Алтайдағы, Хызылчар крайының ӱстӱнзархызындағы, Хакасиядағы самолет одыр полар прай даа кöллерӌе чöр килгебiс. Хакасияда туризмнi хайди даа тилiдерге кирек, пеер кiзiлернi тартар оңдайларны тöстирбiс», – чоохтапча Максим Баёв.
Гидроаэродром полар орында туристтерге тынанӌаң орыннар пӱдiрiлер – гостиница, кафе. Максим Михайлович проект 2027 чылға читiре чардыхтарнаң чуртасха кирiлер тiп чоохтаан. Пӱӱл от айында аның ööн чардығы хоостыра тоғыс пасталар тiп кöрiлче. Ол тусха мында пiр гидросамолет турар, сағам ол туристтернi тартпас, че оларны тарт чöрер маршруттарӌа учуғыстар иртiр турар. Ол 150 километр оортахха учуғар оңдайлығ. Тиксi мында ӱс самолет – пiрсi 4 орыннығ, iкiзi 2 орыннығ – тöремiл пол турар.
Проекттi чуртасха кирерiне 1,5 млрд азыра салковай хорадылар тiп кöрiлче. Компания инвестор полча, аннаңар гидроаэродромны позының ахчазына пӱдiрер. Устағӌызы республиканың паза федеральнай грант марығларында öткiн аралазарға кӱстенербiс тiп таныхтапча.
Хысхаа читiре мында нинӌе-де тынанӌаң тураӌах (глэмпинг) пӱдiр саларға пöгiнчелер. Анда пастағы аалӌыларға чуртирға чарир полар. Оларға гидроаэродромның пӱтчеткенiн кöрерге алай ба мыннаң суғӌа кимелiг инiп паcтир оңдай пирiлер. Ким суғ пу орында пуснаң чабынмин ӱр турча, аннаңар туристтернi пеер чарыс айына читiре самолеттарнаң тартарлар. Тынанар оңдай, тiзең, чыл ибiре полар.
Максим Михайлович суғ туризмiнең айғасчатхан кiзiлернi хада-пiрге тоғынарға хығырған. Оларға турист маршруттарына амды гидроаэродромны кир саларға чарир нооза. Чапсых объект кöп чонның хайиин тартар тiпче ол. Ортымахти сананыстар хоостыра, мында пiр айда 1,5 муң кiзi кил пар турар тiп кöрiлче.
Iдöк гидросамолеттар «Авиалесохрана» федеральнай службаның Ағбандағы авиапöлиине öрттер сығызарынаң хорғыс пар тустарда арығларны паза тайғаларны хайығда тударға полызар. Сыныхтағлығ учуғыстар иртiрiлер алай ба пилоттары наа орында öрт сығысханнаңар искiр турарлар. Iди öрттердең тоғыр кӱрезер тоғыс чахсыландырылар.
Амғы туста проекттi чуртасха кирер ӱчӱн чарытхы тартарға кирек. Ол чох хайдағ даа тоғыстарны апарарға аар полар тiп таныхтапча аның устағӌызы. Чарытхы тартарына сурыныс пiчии паза иртiрер тоғыстар ӱчӱн тöлег iкi чыл мының алнындох пирiл партыр, че амғы тусха ол сурығ пöгiлгелек осхас. Алтай аймааның устағ-пастаа Максим Баёвха Россети Сибирьнiң Хакасиядағы пöлиинiң устағӌызы Николай Шепыревнең тоғазығ иртiрерiнде хабас пирген. Мындағ оңдайнаң пу сидiксiнiс чарадыл парарына iзенiс пар.
Гидроаэродром полар орыннаң учуххан пастағы аалӌылар Роман Ковтун паза Алтай аймаа пазы Ирина Войнова полғаннар. Устағӌылар проекттiң тиксi республикаа танығлығ полчатханын таныхтааннар. Аны хоостыра орындағы чуртағӌыларға наа тоғыс орыннары тöстелер, Чынай аал чöбi паза республика бюджеттерiнзер налогтар кiрер.
Сомнар Дмитрий Сунчугашевти
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |