«ДЕЛЬФИНЧИК» ПАЛАЛАРҒА ІЗИИН АСТЫ
06.04.2022
Хабарлар
«Демография» нацпроект. Ирткен неделяда Харатас городта наа олған сады пайрамни азылған. Ағаа «Дельфинчик» ат пирілген
Ікі хадыллығ школа алнындағы ӱгредіг учреждениезі «Демография» национальнай проект хоостыра пӱдірілген. Аның проектінде ирткен чылларда Ағбанда нинҷе-де олған сады тимге сығарылғанох. Олар тӧӧй дее ползалар, істі полғаныни ла пасхалалча.
Пу учреждениезер Харатастың 300 олғаны чӧрер, тиксі 12 группа. Анда узуҷаң, ойнаҷаң, азыранҷаң пӧліктер пар. Ідӧк учреждениеде музыка, спортзал, тынанҷаң, чиис хайраллаҷаң, имҷі кабинеттері тимнелген, бассейн парох. Іҷе-пабаларның ӧрінізіне, олған садының алнында машина турғысчаң ӧнетін улуғ парковка пӱдірілген, хайзында автомобильлерні хорғыс чох турғызарға чарир.
Ідӧк нинҷе-де группа пар, хайзынзар 2 айлығ паланы пирерге чарир. Аннаңар чиит іҷелерге, тоғысха сығарға кирек полза, ыңааҷахтарын олған садында иртеннең иирге теере хорғыс чох артыс салар оңдай пар. Анда оларны кӧрер, азырир, узудар, айғазар прай кирек ниме-ноо тимде.
Город чуртағҷыларын пу пайрамнаң Хакасия пазы Валентин Коновалов чылығ алғыстаан.
- 2020 чылда ла піс пу орында олған садының пастағы ӧзегін чирзер сапхабыс. Ол кӱн наңмырлығ паза чилліг полған. Ікі ле чыл ирт парды, піс амды мында хызыл лента хыплапчабыс. Хакасияда социальнай объекттер пӱдірілчетсе, уғаа ӧріністіг, уламох чӱрексіністіг, хаҷан олар кічіг палаҷахтарға тимнелче. Мында олғаннар наа пілістер алзыннар, чидіглерге читсіннер, тоғынҷылар, тізең, «Дельфинчиксер» хынып чӧрзіннер, - таныхтаан чооғында Валентин Олегович.
Олған садының пӱдірии ниик ле парбаан. Ол 2020-2021 чылларда пӱдірілген. Пу туста хазнада прай даа пӱдіріг материалларының паазы ӧс парған. Пу ағырсымнығ сурығны пӧгібізер ӱчӱн, город администрациязы, Хакасияның ӱгредіг, финанстар, пӱдіріг паза даа пасха министерстволар устағ-пастаа, ол санда пӱдіріг тоғыстарынаң айғасчатхан «Хакасгражданстрой» ООО подряд организация пір ле хати чыылығ иртірбеен. Олар тоғыстарын ирткен чылда тоос салғаннар, лицензия, тізең, мартта пирілген. Таныхтирға кирек, «Хакасгражданстрой» организацияның ӧмезі республикада хаҷанох позын профессионал чіли кӧзіт пирген, аннаңар олған сады азылғанында пӱдірігҷілерге кӧп алғыстас сӧстері читірілген.
Харатаста наа олған сады тоғын сыхханда, городта олған садынзар теес чох иділген паза анда 100 азыра тоғыс орны азылған.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде