ТУҒАН-ЧАҒЫННАРНАҢ ТОҒАЗЫҒ КӰНІ ИРТТІ
Кӱн сурии. Хакасия пазы Валентин Коновалов кічіг хырлас айының 28-ҷі кӱні тооза чардыхти мобилизацияа тартылғаннарның туған-чағыннарынаң тоғасхан. Тоғазыға 30 азыра кізі килген
Тоғазығ кӱнін иртірердеңер Валентин Коновалов кічіг хырлас айының 21-ҷі кӱнінде чарлаан. Андада ол чардыхти мобилизацияа тартылғаннарның іҷелерінең паза хада хонғаннарынаң тоғасхан, че сурығларнаң пілдістіг полған, оларны хоостыра алынҷа чоохтазарға кирек. іди ирткен неделя тооза тоғазыға пазыныс чарлалған.
Кічіг хырлас айының 28-ҷі кӱнінде, тізең, 8.45 часта Хакасия пазы Валентин Коновалов пастағы пазынған кізінең тоғаcхан. Олох туста тоғазығ иртіреріне республика пазының орынҷылары, кӧстегліг министерство устағҷылары, чааҷы комиссариадының кізілері паза «Боевое братство» халых пірігізінің араласчызы, халыхчы Надежда Узунова хығыртылғаннар.
Чардыхти мобилизацияа тартылғаннарның туған-чағыннарының полған на айланызы, сурии алынҷа ӱзӱрілген, сӧбірелернің прай сурығлары чарыдылған. Олар сурығ теелчеткен структураа читірілгеннер: чааҷы комиссариадына, чаа частьтарына, Арачыланыс министерствозына, ідӧк орындағы пос устаныс органнары алнында алынҷа пӧгіннер турғызылған. Сӧбірелернің сидіксіністерін пӧгерге полызығ Хакасияның юстиция паза регионда хорғыс чох полары, істеніс паза социальнай арачыланыс министерстволарынаң паза республика пазының ол кӧстеглерге нандырчатхан орынҷыларынаң хада-пірге читірілер.
Айланыстар хада хонғанын чардыхти мобилизациядаң суурарынаң паза аны службадаң айландырар сылтағларнаң палғалыстығ полғаннар, ідӧк имнег комиссиязын иртірерінҷе, Арачыланыс министерствозы пастыра чааҷының ахча тӧлеглерін ызарынҷа сурығлар кіргеннер.
Чардыхти мобилизацияа тартылғаннарның туған-чағыннары пирген сурығлар ідӧк палаларға алименттерні тӧлиріне паза чурт орнында санға алыларына хабазығ киректелчеткеніне теелген. Піреезі кӧрілген хабазығларға хоза полызығ киректеен.
Хакасия пазы Валентин Коноваловтың чахиинаң аның орынҷылары паза министрлер мыннаң мындар полған на понедельник мобилизацияа тартылғаннарның туған-чағыннарынаң тоғас турарлар. іди улуғ хырлас айының 5-ҷі кӱнінде тоғазығны республика пазының пастағы орынҷызы Татьяна Курбатова иртірер. Неделя пазынаң, улуғ хырлас айының 12-ҷі кӱнінде чардыхти мобилизацияа тартылғаннарның туғаннарынаң республика пазының орынҷызы Юрий Курлаев тоғазар, улуғ хырлас айының 19-ҷы кӱнінде – Михаил Побызаков, улуғ хырлас айының 26-ҷы кӱнінде – Сергей Комаров. Аннаң андар тоғазығларның план-графигі пір айға азынада чарадыл турар.
Тоғазыға понедельниктең пасти пятницаа теере ӱс оңдайнаң пазынарға чарир:
– пу адресче айланарға: Ағбан г., Лениннің пр., 67 (Хакасия правительствозының туразы), 104 алай 106 каб., 9.00 – 18.00 частарда (13.00-14.00 часта – тынағ тузы);
– телефоннарҷа сығдырадарға: 8 (3902) 299-168, 8 (3902) 299-189 (Чуртағҷылар айланыстарының тоғызынҷа департамент);
– Хакасия правительствозының порталындағы (r-19.rғ) интернет-приемнайы пастыра.
Хакасияда ідӧк чардыхти мобилизацияа тартылғаннарның сӧбірелеріне искіріг пирҷең кін тоғынча. Регион правительствозының министерство-ведомстволарының специалисттері аның тоғызына тартылғаннар. Кін пу адресче орныхча: Ағбан г., Хакасскай ор., 32. Сығдырадарға чарир пу телефонҷа: 8 (3902) 215-478. Айланарға чарир 8.00 – 17.00 частарда.
Ағаа хоза чардыхти мобилизацияа тартылғаннарның сӧбірезі чуртапчатхан городтарда паза аймах кіннерінде чонға социальнай хабазығ читірчеткен служба пӧліктері кӱннің тоғазығлар иртірчелер. Город-аймах устағ-пастағларынзар ідӧк айланарға чарир. Хакасия пазы Валентин Коновалов ӱртӱн айының 21-ҷі кӱнінде, чардыхти мобилизация чарлалған кӱнде, муниципалитеттер пастарына чардыхти мобилизацияа тартылчатханнарның сӧбірелерінең кӧні палғалыста поларға, сурығларны пӧгерге полызарға паза кирексініcтерін толдырарға чахаан. ідӧк оларға туған-чағыннарынаң алынҷа тӧреміл тоғазарға чахығ пирілген.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |