Татарстандағы театр – Хакасияда
24.04.2024
Хабарлар
Улуғ гастрольлар. Пу кӱннерде Хакас чирінде К.Тинчуриннің адынаң Татарстан драма паза комедия театры ааллапча
Татарстанзар ыраххы чорыхха сығып, А.М.Топановтың адынаң Хакас драма театры ӱр ниместе ле андартын айланды. Амды пістің театрға нандырығ пиріп, Хазандағы артисттер Хакасияның чуртағҷыларына чапсых ойыннар ағылчалар. Оларны Хакас драма театрының улуғ сценазында кӧзідерлер.
Хосхар айының 25-ҷі кӱнінде 18.30 часта «Студенческий договор. Наши дни» (12+) хормачы ойын полар. Ӧӧн матырлар, тӧрт нанҷы, ахча тоғынарға парчалар. Тус асхынах халып одырча, тоғысты тузында толдырарға киректелче. Че оларның каникуллар нооза! Чиит туста кӱрленерге маңнанарға кирек. Ідӧк хыныс усанабас сығыс килче. Тӧрт нанҷы чуртаста хайдағ даа таллағ итселер, хайди ла сохтанмазалар, оларны пик ынархас піріктірче.
Кӧңнілерің кӧдірерге итсеңер, «Студенческий договор. Наши дни» ойынға киліңер!
Хосхар айының 26-ҷы кӱнінде 11.00 паза 13.00 частарда кічіг олғаннарға «Волшебная арена» (0+) нымах турғызылар.
Пір чахсы кӱнде чайаачы артисттер чуртапчатхан циркте хайхастар пасталыбысча. Ол артисттернің чуртазын саңай алыстырыбысча. Чарых нымахта кӧп фокус, сарын паза теелбек полар. Спектакльның ӧӧн сағызында ынархас, хынған сағыстар паза чахсы киректер пирілче. Хайхастығ нымахтың матырлары олғаннарны даа, іҷе-пабаларны даа постарына хындырып аларлар.
Хосхар айының 26-ҷы кӱнінде 18.30 часта «Первое представление» (6+) кӱлкістіг ойын полар.
Режиссёр Ильнур Гарифуллин спектакль пастыра ХХ чӱс чылда наа ла тӧстелчеткен татар культуразынаң тоғыр тудынчатхан кізілерні хормачы оңдайнаң кӧзітче. Мының алнында татар театрның тӧстегҷілерінің пірсі, писатель Галиасгар Камал «Первое представление» пьеса пас салған. Амғы туста Татарстандағы ол школа программазына кірче.
Хосхар айының 27-ҷі кӱнінде 17.00 часта «Ашина» (12+) сӱрдестіг драма кӧзіділер.
Пу ойын аймах частығ кӧрігҷілернің хайиин тартар. Хай пірее тустарда кізее талазығлығ сурығларда хайдағ-да таллағ идерге килісче. Кізі тимде хылых-оңдайлығ тӧрібинче. Ол позын чуртас тооза пӱдірче. Андағ-мындағ хыйалда кізі позы пыролығ.
Тӱрк чонның кип-чоохтары хоостыра, Ашина – пӱӱр, род хайраллағҷызы. «Ашина» пьеса ГЭС пӱдірілчеткен туста чирлер суғ алтына кірген тархынға чарыдылча. Спектакльдағы киректер 1950 чылларда Кама суғ хазындағы олтырығаста полча. Тӱрчедең ол орын суғ алтына кір парар. Андар от сабарға килген матырларның хайызығлары уғаа сидік. Кем-де позының кӧңнін чылларнаң позында тудынча, хайзы-да атархаснаң ағырча. Ойын хомай тоозылча – олтырығас паза кізілер суға кір парчалар.
Улуғ гастрольларны Россияның культура министерствозы чахиинаң «РОСКОНЦЕРТ» ФГБУК тӧстеен. Ойыннар татар тілінең парарлар, че орыс тіліне тілбестег полар.
Автор :
Светлана Селигеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде