ШАХМАТИСТТЕРНІҢ НАА ТУРАЗЫ
Спорт. 12 октябрьда Республиканың шахмат туразы пайрамни азылған. Анда шахматча, шашкаҷа, тобитче паза киберспортча тренировкалар иртер
Шахмат паза шашка Хакасия чуртағҷыларының иң хынчатхан спорт кӧрімнері полча. Саннар хоостыра республикада аннаң 1,5 муң артиинаң кізі айғасчаттыр. Че спортсменнер тренировкалар паза марығлар иртірҷең орын чох сидікcінҷеңнер. Пылтыр январьда саблығ шахматист Руслан Драганов, Хакасия пазы Валентин Коноваловсар айланып, хабас пирерге сурынған. Валентин Олеговичтің чахиинаң, республиканың спорт ведомствозы пу сурығны пӧгер оңдай тапхан. Амды Ағбанда ікі хадыллығ Шахмат туразы пар. Аның адрезі: Пушкиннің орамазы, 99.
Спорт пӱдіриин пайрамни азарында Хакасия пазы Валентин Коновалов араласхан. Валентин Олегович, чоох тудып, чыылған чонны танығлығ кирекнең алғыстаан паза чиңістер тударға алғаан.
Мероприятие улуғ нимес экскурсиянаң узарадылған. Тураның тиксі улии – 180 квадрат метр. Пастағы хадылында ікі пӧлік. Оларның пірсі шахмат залы полча, ікінҷізі киберспортсменнерге кӧріл парған. Анзын оборудование дее хоостыра сизінерге чарир. ікінҷі хадылында шахмат столлары турча паза ікі чоон телевизор пар. Телевизор сынында интерактивнай панель полтыр, аның полызиинаң спортсменнер онлайн-ойыннарда аралас поларлар паза партияларны ӱзӱрерлер. Хазии уйан улустаңар ундубааннар. Пандус пӱдірер оңдай чох полғанда, коляскалығ шахматисттерге кізіні кӧдірчеткен тирігні турғыс салғаннар.
Спортсменнер Валентин Олеговичті шахмат паза интерактивнай футбол ойнирға хығырғаннар. Сизінгенде, компьютер ойыннары устағҷының кӧңніне кірчелер. Чоохтирға кирек, Хакасияда компьютер спортынҷа федерация толдыра кӱзінең пылтыр ла тоғынып пастаан, че турыстыра чидіглер пар. Пӱӱл пістің ӧме Россия кубогында тӧртінҷі орынға сыххан. Марығда, тізең, 32 регион араластыр. Республика ӱчӱн Тумен Топуран, Владимир Поцюс, Дмитрий Полит, Терентий Юдин паза Денис Мамышев турысханнар. Дениске 18 час, ол ХГУ-да ӱгренче.
Пайрам тузында Валентин Коновалов ідӧк тобит ойнир оңдайларнаң танысхан. Хакас гимназияның 8-ҷі класстағы ӱгренҷізі Савелий Баинов чолларҷа хайди чӧрерге киректелчеткенін кӧзіткен. Саблығ ӱгредіг учреждениезі шахмат кінінің пірсі полча тиирге чарир. Директор Марина Сагатаеваның пастаанынаң гимназияда пизінҷі чылы прай ӱгренҷілер шахмат уроктарына чӧрчелер. Ол неделяда пір хати иртірілче. Марина Николаевна чоохтаан:
– Шахмат палаларға чахсы ӱгренерге, табырах сағынарға, сизіктіг поларға полысча. Санапчам, пу спорт кӧрімі олғаннарға чуртаста чидіглерге чидерге полызар. 5 – 9 класстар шахмат уроктарына хайди даа чӧрчелер. Спортсмен-палалар хоза тренировкаларда устарын таптапчалар. Шахматтаң пасха, уроктарда олғаннар тобит ойнапчалар. Тренер Сергей Николаевич Калуга полча.
ӱр ниместе гимназияда «Алтын ат» шахматча марығ ирттір. Ол школаның 77 чылына чарыдылған. Анда чиңіс тутхан олғаннарны – Вадим Соколовты, Савелий Баиновты, Аяна Карамчакованы паза Мария Торточакованы – Марина Сагатаева мероприятиее хада ағылған. Прай ӱгренҷілернің разрядтар пар.
Спорт пӱдірии Ағбандағы олимп резерві училище-техникумының (У(Т)ОР) холында полтыр. У(Т)ОР-ның директоры Сергей Головкиннің таниинаң, узы-пазына сығып аларға оой полбаан. Ол таныхтаан:
– Алында пӱдірігде садығ туразы орныхтыр. Пеер кіргенде, алаң ас парғам. Объект мал хазаазына тӧӧй полған. Чылығ пирҷең система тоғынминчатхан. Тиксі тыхтағ тоғыстарына республика бюджедінең 4,5 миллион салковай позыдылған. Училищенің бюджеттегі нимес ахчазына піс ӱс улуғ телевизор паза 11 ноутбук алғабыс. Прай оборудование 1,5 миллион салковайға тур парған. Пӱдіріг тимге сыхханына прай чӱреемнең ӧрінчем.
Шахмат туразы азылғанында Хакасияның ӱгредіг паза наука министерствозының хозымы парох. Министерство столлар, одырчыхтар, частар, шахмат аларына 900 муң салковай позыттыр. Хайди таныхтаан ӱгредіг министрінің орынҷызы Алла Идимешева, пу ахча «ӱгредіг» нацпроекттің «Полған на паланың чидии» программазы хоостыра пирілген. Федеральнай программа таланттығ олғаннарға хабазарына кӧріл парған.
Республика ӱлгӱлері шахматисттерге иcтіг оңдайлар тӧстеенде, олар чир-суғҷыларын чиңістерінең тӧреміл ӧріндірерлер тіп ізеніс пар. Хакасияда шахматча Россияның спорт устары чох полтыр, спорт узына кандидаттар даа кӧп нимес. Оларның санында Максим Токмашовты, Михаил Канзычаковты, Степан Харкевичті паза Ксения Ултургашеваны адирға кирек.
Ксения пылтыр Сибирьдегі федеральнай округтың первенствозында чиңіс тутхан. 15 частығ Степан, 1-ғы класста ӱгренчеткендӧк, «Маэстро-2015» чоннар аразындағы турнирде алтын, кӱмӱс паза хола медальлар холға кирген.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |