Итчең тоғыс табылар
26.04.2024
Хабарлар
«Россия чоннарының ассамблеязы» халых-хазна организациязының ӧӧн директор орынҷызы Ирина Бабакова чоох тутча
Чоннар аразындағы ынархас. Пу наада Хакасияның ӱлгӱ туразында Москвадаң килген аалҷынаң тоғазығ ирткен. Аны асхан паза апарған Хакасияның пазы Валентин Коновалов
Хакасияда тоғыс чорығынаң пол парды «Россия чоннарының ассамблеязы» тиксі хазна синіндегі халых-хазна организациязының ӧӧн директор орынҷызы Ирина Бабакова. Хакасияның правительствозында Ирина Владимировнанаң тоғазығ иртірілген. Анда орындағы пастыхтар, пістің республикада чуртапчатхан аймах нациялар пірігістерінің кізілері араласханнар.
– Хакасияда пӱӱнгі кӱнде 107 аймах тілліг, киртіністіг чон пір ынағ сӧбіре чіли чуртапча, – таныхтаан Валентин Коновалов, тоғазығда араласчатхан кізілерні аалҷынаң таныстырған соонда.
Анаң сӧс пирілген Хакасияның национальнай паза территориальнай политика министрінің тоғызын толдырчатхан Лев Сафьяновха. Лев Александрович саннар паза сомнар пастыра пістің республикада чоннар аразындағы ынархасты тыыдарында хайдағ улуғ тоғыc апарылчатханын киртістіг искір пирген. Оңарылыстығ, прайзының хайиин тартхан пістің республиканың аймах нациялығ чуртағҷылары Украина чирінде парчатхан ӧнетін чаа операциязында араласчатхан чир-суғҷыларыбысха хайди полысчатханнаңар аймах сомнар, оларның алтында пазылған сӧстер.
Іди чааҷы чир-суғҷыбыс Аркадий Мамышевтің «Мавр» тушенка алтында пазылған чылығ сӧстері прайзының чӱреен тибіреткен полар: «Пу тушенканы чіпчетсем, ибде ле пол парғанға тӧӧйбін. Табырах чиңіс тудар сағыс тӧріпче». Украинада тӧреен, амды Ағбанда чуртапчатхан Юрий Бояров полызыға ызылчатхан посылкада пас салтыр: «Аарлығ чир-суғҷыларыбыс, піс сірернең хадабыс! Хакасия».
Анаң сӧс пирілген аалҷы кізее. Тоғыс чорығынаң чӧрчеткен Ирина Бабакова пастағы сӧстерінеңӧк прайзын чапсытхан: ноға Хакасия «Россия чоннарының ассамблеязы» иртірчеткен кӧп саннығ марығларда ӧткін араласпинча? Аалҷы кізее сах андох наңдырығ пирілген: пу кӱннерде Ағбанда «Ынархас чоллары» чоннар аразындағы улуғ фестиваль ӱгренҷілер аразында иртірілче.
Андағ кӧзідімге Ирина Владимировна чӧпсінген. Анаң сомнар, саннар пастыра «Россия чоннарының ассамблеязы» хайдағ кӧп саннығ марығлар, чӧрімнер иртірчеткенін кӧзідіп пастаан. Олох арада пастых кізі Хакасиядағы Л.Р.Кызласовтың адынаң чир-суғ ӱгренҷең музейзер кіргендӧк, андағы пурунғы обаа тастарны кӧр салғанда, хайди тың алаң асханын чазырбаан. «Оларны чоннар аразындағы кӧзідіг-марығларға даа сығарарға чарир. Cыйых чох халбассар», – cала даа ікінҷілебинче аалҷы кізі, Хакасияны махтапчатхан туста.
Анаң Ирина Бабакова Россия чоннарының аразында улуғ кирексініснең тузаланчатхан «Нация поғдархазы» марығдаңар сала алғыда чоохтап пирген. Анда хазнабыстың прай даа регионнары ӧткін араласчатхан осхастар. Кӧзідімге алза, Башкортостан чыл сай аймах номинацияларда сала ла онға чағын нимес чиңіс тутчатхан осхас. Пасхалары даа соона халбинчалар.
– Россия президентінің пастааны хоостыра азылған хазнабыс чоннарының ассамблеязының сайттары прайзына азых. Кіріңер, кӧріңер, таллап алыңар, марығларда аралазыңар, – сах андох кӧӧктір сыххан тоғазығ араласчыларын аалҷы.
Сом Дмитрий Сунчугашевти
Автор :
Анатолий Султреков
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде