ТОҒЫСЧЫ СПЕЦИАЛЬНОСТЬТАРЫНА ХАЙЫҒ
12.04.2023
Хабарлар
Марығ. Н.Ф.Катановтың адынаң Хакас гимназиязында «Профессионалы» чемпионат пайрамни азылған
Устарынаң сынасчатхан чииттернi Хакасия правительствозының, Ӧӧркi Чӧбiнiң, министерстволарның кiзiлерi, республиканың ӱгредiг организацияларының устағҷылары паза тоғыс пирчеткеннер марығлар пасталчатханнаң алғыстааннар. Iдӧк чыылысхан чонны удурлирға улуғ аалҷы кил парған – Россияның Хазна Думазының депутады, СНГ киректерiнҷе комитет кнезiнiң орынҷызы Казбек Тайсаев.
– Пӧзiк пiлiстiг тоғынҷыларны тимнирi хазнабыс тилiзiнiң ӧӧн кӧстее полча. Пу осхас марығлар чииттернiң устарын таптирға полысчалар. Полған на араласчы чиңiстi холға кирерге сағынча. Че сiрернiң алныңарда профессияңарда сын, тоғызына хынчатхан, аның тилiзi ӱчӱн сағыссырапчатхан ус полар пӧгiн турча. Чуртас паза тоғыс чолыңарда оң ползын. Прайзын чемпионат азылғанынаң алғыстапчам, – теен Хакасия пазы Валентин Олегович Коновалов.
Чемпионат тоғысчы профессияларына хайығ айландырар, чииттернiң устарын тилiдер пӧгiннең чыл сай иртiрiлче. Пӱӱл республика синiндегi марығларда 40-ча компетенцияҷа 250 азыра ӱгренҷi паза студент араласча. Олар ӱгредiг, пӱдiрiг, чиис пызырары, туризм паза пасха даа киректерҷе постарының пiлiстерiн, устарын кӧзiткеннер.
«Ниикке чӧрҷең автомобильнi тыхтиры паза сыныхтиры» кӧстегҷе марығ араласчыларының пiрсi – Аймир Чистогашев. Ол Ағбандағы политехническай колледжте 2 курста ӱгренче.
– Марығда аралазарға позым ынаам, анзы мағаа профессияда тилирге паза тиксi ӱгредiг учреждениенiң адын кӧдiрерге полысча. Колледжке наа двигательлер, автомобильнi чӧргiсчең чардыхтары алылған, пiс прай пу оборудованиенең тоғынарға ӱгренчебiс, – ӱлескен сағыстарынаң чиит оол.
Пӱӱл Аймир марығда iкiнҷiзiн араласхан. Ирткен чылда чемпионаттың республика синiндегi чардығында ӱзiнҷi орынға турысхан. Ол техниканаң айғазары кӧңнiме кiрче тiп чоохтапча. Кiчiгдеңӧк пабазынаң хада гаражта хада полҷаң полтыр, аның ниме-ноо тыхтапчатханын кӧрiп, пу кирекке хынызы тӧрiптiр. Оолах, автомобильнiң пӱдiзiн, чардыхтары хайди тоғынчатханын пiлiп аларға иткен, аннаңар пiлiстерiн алғыдар пӧгiннең колледжсер кiрген.
Чемпионатта ідӧк Хакасияның ӱгредіг паза істеніс министерстволарының специалисттері тоғысчы профессиялары чидіспинчеткенінең палғалыстығ сурығларны ӱзӱргеннер. Марығларның республика синiндегi чардығында чиңiс тутханнар Россия синiндегi марығларға сығарлар.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы