НАА ШКОЛА – НАА ОҢДАЙЛАР
17.03.2023
Хабарлар
«Ӱгредіг» национальнай проект. Пу кӱннерде Асхыс аймаандағы Пирікчул аалда Лестранхоз школазының наа туразы пайрамни азылған
АНЫҢ АЛНЫНДА ПИРІКЧУЛДАҒЫ ОЛҒАННАР ИРГІ, ИҢЗЕРІЛЧЕТКЕН ШКОЛАДА ӰГРЕНГЕННЕР. АМДЫ «ӰГРЕДІГ» НАЦИОНАЛЬНАЙ ПРОЕКТ ХООСТЫРА ОЛАРҒА НАА, ИСТІГ ӰС ХАДЫЛЛЫҒ ТУРА ПӰДІР ПИРГЕННЕР. ШКОЛАНЫҢ ПОЛҒАН НА КЛАЗЫНДА ИСТІГ ОДЫРЧЫХТАР, АМҒЫ ТУСХА КИЛІСТІРЕ ПАРТАЛАР ТУРЧАЛАР. ТАНЫХТИРҒА КИРЕК, ПОЛҒАНЫНДА ЛА ИНТЕРАКТИВНАЙ ПАНЕЛЬ ПАР.
Пайрамға Хакасия пазы Валентин Коновалов, Ӧӧркі Чӧп депутады Пётр Воронин, республиканың ӱгредіг министрі Анатолий Бутенко, Асхыс аймаа пазы Абрек Челтыгмашев, Пирікчул аал чӧбі пазы Александр Щекочихин килгеннер. Улуғ аалҷыларны удурлап, айраннаң, талғаннаң сыйлааннар. Iдӧк ӱлӱкӱнде Россияның просвещение министрі Сергей Кравцов паза композитор, ырҷы Игорь Крутой видеопалғалысча араласханнар.
Наа школаны олғаннар, ӱгретчілер чидікпин сахтааннар, ол 250 ӱгренҷее кӧріл парған. Прайзы хызыл чалама хыплал парарын чидікпин сағаан. Андағ оңдай Валентин Коноваловха, Анатолий Бутенкоға, Абрек Челтыгмашевке, Александра Щекочихинаа паза пастағы класс ӱгренҷізі Марина Ермаковаа пирілген. Школа ізіктері азыл парғанда, чыылған чон актовай залзар ирткен. Ӱлӱкӱн пасталғанда, андар Россия, Хакасия паза Асхыс аймаа флагтары кирілген, гимннер ойнадылған.
Пастағы сӧс Сергей Кравцовха пирілген. Ол, олғаннарны паза ӱгретчілерні алғыстап, чоохтаан:
– Пӱӱн сын пайрам таныхталча. Иң пастағызын ол палаларның ӱлӱкӱні полча. Ідӧк ол – ӱгретчілернің пайрамы. Пирікчул аалдағы школаның наа туразы азылча, тоғыстар «Ӱгредіг» национальнай проект хоостыра апарылғаннар. Ӱгренеріне истіг оңдайлар тӧстел парғаннар, iдӧк кружок-секциялар апарылар. Мында тоғынчатхан ӱгретчілернің кӧбізі пуох школаны тоосхан. Президент пӱӱл Ӱгретчі паза ӱгредіг кӧстегҷізі чылын чарлабысхан. Киліскенде, Хакасияның ӱгретчілеріне тоғыстары ӱчӱн улуғ алғызым читірчем. Олғаннар, ӱгретчі профессиязы чуртаста иң ӧӧн полча. Олар – сірернің кӧстегҷілерің. Олар сірерге наа пілістерзер чол асчалар. Сірернің чазыттығ сағыстарыңны чуртасха кирер оңдай пирчелер. Ӱгренҷілер школа тилізіне улуғ хозым идерінде ікінҷілебинчем. Хакасия пазы Валентин Олегович Коноваловха улуғ алғызым читірчем, ӱгредіг системазына хайығ салчатхан ӱчӱн.
Анаң пайрам араласчыларын Валентин Коновалов алғыстаан:
– Мин школаның иргі туразын кӧргем. Анда олғаннар чахсы пілістер алғаннар, Лестранхоз школазы кӱстіглер санына кірче. Че аның туразы изелчеткен, аннаңар наа пӱдіріг киректелген. Пӱӱн, национальнай проекттерні чуртасха киріп, піс иң ағырсымнығ сурығларны пӧгер оңдайлығбыс. Пирікчулдағы школа Хакасияда пу проектче пӱдірілген школаларның тӧртінҷізі полча. Проект сидік, че ол позын чахсы саринаң кӧзіткен. Піс кӧрчебіс, хайдағ мында улуғ истіг класстар. Школада амғы тусха килістіре оборудование турча. Мында палалар ХХI векте киректелчеткен пілістер аларлар, ӱгретчілернің чахсы тоғынар оңдайлары пар. Россия президенті Владимир Владимирович Путиннің полызии чох наа школалар пӱдірілбесчік. Аның пастаанаң Россияда федеральнай программалар, национальнай проекттер чуртасха кирілчелер. Школаларны, олған садтарын паза пасха даа социальнай объекттер пӱдіріп, піс президент турғысхан пӧгіннерні толдырчабыс. Пу объект паазы – 318 миллион салковай. Сидіксіністерге хайығ салбин, піс аны тузында пӱдірібіскебіс. Ол истіг паза сіліг орында турча. Олғаннар мында чахсы пілістер аларлар.
Чооғын тоозып, Валентин Коновалов Лестранхоз школазының директоры Александра Щекочихинаа Хакасия пазының алғыстазын читірген.
Ідӧк сӧс пирілген Анатолий Бутенкоға. Аның чооғынаң, наа школа пӱдірілгені Хакасия правительствозының тӱзімніг тоғызының салтары полча. Федерация синінде республика правительствозы прай сурығларны пӧкче. Ол сылтағнаң Хакасияа мындағ проекттерні чуртасха кирерге килкім ахча пирілче. Амды ӱгретчілер истіг оңдайларда тоғынарлар. Олғаннар мында чахсы ӱгренерлер, спортнаң айғазарлар. Спорт залы ойын спорт кӧрімнеріне килістіре пӱдіріл парған. Республикада 1000 палаа кӧріл парған ӱс школа пӱдірілче. Чооғын тоозып, Анатолий Бутенко Хакасияның ӱгредіг министерствозының Аарластығ пічіктерін орыс тілі паза литература ӱгретчізі Ирина Зубрицкаяа паза музыка ӱгретчізі Владимир Блейгерге читірген.
Абрек Челтыгмашев ідӧк ӱгретчілерні паза ӱгренҷілерні алғыстаан. Аның сӧстерінең, мындағ алғым тоғыс Пирікчулда иділбеен полар. Аалны 1949 чылда пӱдіріп пастааннар. 1950 чылда мында читі чыллығ школа тимге сыххан. 1966 чылда аны 319 ӱгренҷі тоосхан. 1977 чылда школа туразы ӧртке хабыл парған. Че ӱлгӱлер полызиинаң мында школаның наа корпустары пӱдірілген. Амды школада 219 пала ӱгренче, 22 ӱгретчі тоғынча.
Анаң Абрек Васильевич школа тоғынҷыларына Асхыс аймаа администрациязының Аарластығ паза алғыстас пічіктерін читірген.
Пётр Воронин алғыстас сӧстерін читіргенӧк. Аның таниинаң, пӱӱн Лестранхоз школазы хазна паза бизнес хада-пірге тоғынчатханының, республика паза аймахтар таңдағызына ахча позытчатханының кӧзідімі полча. Школаа хорадылған ахча хаҷан даа нандыра айландырылча. Ідӧк Пётр Иванович Ӧӧркі Чӧп кнезі Владимир Штыгашевтің алғыстазын хығыр пирген.
Iдӧк ӱгретчілерні паза школа тоғынҷыларын Александра Щекочихина алғыстаан. Пайрамда кӧп сарын толдырылған, теелбектер салылған.
Хайди таныхтаан Абрек Челтыгмашев, школа пӱдірерінде кӧп сидіксініс полған. Лестранхоз школазының туразы республикада иң иргілернің санынзар кирiлген. Хакасия пазы полған Виктор Зиминнің полызиинаң мында наа школа пӱдірерге чарадығ алылған. Россияның просвещение министерствозы аның пӱдіриин хазна программазына кирерге чаратхан. Іди школа 2021 чылда пӱдіріліп пастаан. Амды тайға аразында улуғ сіліг тура турча. Пеер прай кирек оборудование алылған, аймахта андағ пай школа пӱӱнгі кӱнде чоғыл. Анзы амғы тустағы кирексіністернең палғалыстығ. Кӧрік айының 20-ҷі кӱнінде олғаннар наа школада ӱгреніп пастирлар.
Пирікчулда Лестранхоз школазының наа туразы пӱдіріл парғанда, аның ӱгренҷілері, чахсы пілістер алып, республикабысты прай хазнаа сабландырзыннар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде