КӦП ПАЛАЛЫҒЛАРҒА – ХАБАЗЫҒ
03.03.2023
Хабарлар
ӦӦРКІ ЧӦП. ХАКАСИЯНЫҢ ӦӦРКІ ЧӦП ПРЕЗИДИУМЫ ТЕЕСТЕГІ ЧЫЫЛИИНДА РЕСПУБЛИКАНЫҢ КӦП ПАЛАЛЫҒ СӦБІРЕЛЕРІНЕ ПОЛЫСЧАҢ ЗАКОН ПРОЕКТІНЕ ХАБАЗАРҒА ЧАРАТХАН
Пу президиум чыылииның ӧӧн сурығларының пірсі республикадағы социальнай хабазығ пирерінҷе закон проекті полған. Хакасия правительствозы кирген закон проектінҷе республиканың ӱс законынзар тӱзедіглер кирілче.
Іди «Хакас Республиканың Істеніс ветераны» законзар алызығ кир салары кӧрілче. Ол алызығ хоостыра «Істеніс ветераны» ат аларға право пирчеткен республиканың хазна сыйыхтары санынзар «Родительская доблесть Хакасии» медаль кирілче.
Мындағ медальлар республикада кӧп нимес пирілче. Хакасияның іcтеніс паза социальнай арачыланыс министрі Татьяна Раменскаяның чооғынаң, закон проектінең ол таныстырған, пір чылда ӱсче ле медаль. 2013 – 2022 чылларда ол медальнаң 38 кізі таныхтатхан.
«Хакас Республикада кӧп палалығ сӧбірелерге социальнай хабазығ пирҷең оңдайлардаңар» законзар кирілчеткен тӱзедіглерҷе ӱгренҷі паланы ӱгредіг чылына тимниріне чыл сай пирілчеткен тӧлегнің синін ӧскірібізері кӧрілче. Амғы туста ол тӧлег 2000 салковай полча, аны 2500 салковайға теере кӧдірерге чӧп пирілче. Ол ахча республикада 2013 чылдаң сығара тӧлелче.
– Пӱӱнгі кӱнде республикада 10034 кӧп палалығ сӧбіре чуртапча, оларда 32017 пала ӧсче. Пу кӧстеглерге Хакасия бюджедінде ахча кӧріл парған, – чоохтаан Татьяна Раменская.
Ідӧк нинҷе-де алызығ «Хакас Республикада кӧп палалығ сӧбірелерге социальнай хабазығ пирҷең хоза оңдайлардаңар» законзар кирілче. Оларның пірсі іҷе капиталынаң тузаланып пастаҷаң право тузын хызырча. Амғы туста республика тӧлепчеткен іҷе капиталынаң тузаланарына пала тӧреенінең ӱс чыл ирт парарға кирек, кирілген тӱзедіглер алыл парза, 2,5 чыл пазынаң тузаланарға чарадылар.
Хакасияда кӧп палалығ сӧбірелерге социальнай хоза хабазығ, ӱзінҷі паза аның соондағы пала тӧрізе, республиканың іҷе капиталы чіли пирілче. Аның сині – 100 муң салковай, кічіг аалларда чуртапчатханнарға – 200 муң салковай. 2023 чылда ағаа индексация иділер, аның сині 108,3 муң салковай пол парар, кічіг аалларда чуртапчатханнарға – 216,6 муң салковай. Ідӧк закон проектінзер кирілчеткен тӱзедіглерҷе республиканың іҷе капиталынаң тузаланарын алғыдыбызары кӧрілче. Ол ахчаны чурт оңдайларын чахсыландырарына хорадарға чарадылар – чурт пӱдірер пӧгіннең чир участогын аларына.
– Закон проекті Россия президенті айланызында кӧп палалығ сӧбірелерге хабазардаңар искірген кӧстеглерге килістіре полча. Пу пастаға хабазарға паза аны марттағы сессияның кӱн суриинзар кир саларға чӧп пирчем, – салтарлар идіп, таныхтаан Хакасияның Ӧӧркі Чӧп кнезі Владимир Штыгашев.
Автор :
Хакасия Ӧӧркі Чӧбінің хабарлар пӧлии
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде