РОССИЯ МАРИИНДА АРАЛАЗАР ӰЧӰН ХАРБАСХАННАР
01.02.2023
Хабарлар
Денис Чернов Хакасияа алтын медаль ағылған
Спорт. Ағбанда грек-рим кӱрезінҷе Сибирь первенствозы ирткен. Анда 18 часха читкелек спортсменнер араласханнар
ПЕРВЕНСТВО
Н.Г.Булакиннің адынаң спорткомплексте тынағ кӱннерiнде «ізіг» полған. Чиит кӱресчілер, медальлар ла ӱчӱн нимес, Россия мариинда аралазар ӱчӱн харбасханнар нооза. Первенствоға чон чахсы чыылыстыр. Спортсменнер турнирге Сибирьнің тоғыс регионынаң килгеннер, ол санда Новосибирск, Омск областьтарынаң, Хызылчар крайынаң, Алтай паза Хакасия республикалардаң. Тиксі алза, 264 кізі. Олар 12 кӧдірімде кӱстерін cынааннар. Хакасия алнын 44 кізі алған.
Пастағыох хабыстар хазыр парғаннар. Матырлар санында чир-суғҷыбыс Виктор Судочаковты адирға чарир. Марығның 1/8 чардығында ол «ыырҷызын» 19:14 саннаң чиңіп алған. Хайди таныхтааннар чарғыҷылар, мындағ саннар баскетболда ла поладыр. Че финалның тӧртінҷі чардығында хакас саарбахтың чиңіс тудар кӱзі читпиндір. Кӱресчі Асхыс аймаандағы Оот пилтірі аалдаң. Судочаковтар сӧбірезінде 8 пала, Виктор – тӧртінҷізі. Ол Ӱс чулдағы школада 9-ҷы класста ӱгренче. Аның тренері – Владимир Боргояков. Виктор Сибирь первенствозында пастағызын на араласты. Чир-суғҷыбыстың хылии пик, ізенчебіс, ол пісті чидіглерінең ӧріндірер.
Хакасия спортсменнерінең сыйыхтығ орыннар ӱчӱн Денис Чернов (71 кг), Аймир Карамчаков (55 кг) паза Нурболот Жумакадыров (51 кг) харбасханнар. Олардаң кибіске пастап 14 частығ Нурболот сыххан. Кӱреcчі Ағбанның 2 № школазында ӱгренче. Пылтыр декабрьда, Томскта ирткен тиксі Россия мариинда чиңіc тудып, спорт узына кандидат нормативін толдырыбыcхан. Пӱӱл наа чидіг. Саарбах Сибирь первенствозының хола медальын утты.
Тренері Олег Сенотрусов чоохтаан:
– Тренер тоғызынаң читінҷі чылы айғас парирбын. Секцияа 40-ча пала чӧрче. Первенствоға кӱстіг cпортсменнер чыылысханнар. Олар пу марығда пастағызын на араласпинчалар, ӱгренҷім турыстыра харбазыбысханына прай чӱреемнең ӧрінчем. Нурболот ідӧк Виталий Григорьевич Чичининнің холында узын таптапча. Хада-пірге тоғынғаны тикке парбады.
Аймир Карамчаков, Жумакадыров чіли, ӱзінҷі орын ӱчӱн харбасхан. Тоғазығ 5:5 саннаң тоозылған. Че чарғыҷылар чиңісті Аймирнің «ыырҷызына» пирібіскеннер. Аның сӱмелері хай-хай сіліг полтыр. Хола медальға пір ле хаалағ читпеді. Ачырғастығ. Чоохтирға кирек, пу турнир 2006-2007 чылларда тӧреен алай 15-16 частығларға кӧрілген. Аймирге, тізең, 14 ле час. Аның спортта таңдағызына киртінчебіс.
ДЕНИС ЧЕРНОВ
Денис Чернов ӱчӱн прай республика «ағырған» тиирге чарир. Аннаң пасха спортсменнерібістең пірдеезі азах меетке сых полбиндыр. Денис Ағбаннаң, грек-рим кӱрезінең 1-ғы класстаң айғас парир. Ол Пётр Григорьевич Чезыбаевтің устаанынаң харбасча. Спортсмен Сибирь первенстволарында ӱзінҷі чылы тӧреміл араласчаттыр. 2021 чылда ол кӱмӱс медаль холға кирген, пылтыр, кинеп парып, 5-ҷі орыннаң пӧзік кӧдіріл полбаан. Пӱӱл хайди харбазыбызар ни?
Пастағыох хабыстар киречілееннер: спортсменге чиңіc кирек. Омсктағы кӱресчіні пістің оол 8:0 саннаң утып алған. Ікінҷі тоғазығ 25 секунда ла парған. Чиңіс Денисти. Ӱзінҷі хабыс ідӧк 8:0 саннаң тоозылды. Финалда чир-суғҷыбыс Максим Некрасовнаң (Новосибирск облазы) хада харбасхан. Ооллар кибісте удаа тоғасчаттырлар. Ікі ай мының алнында Новосибирскте ирткен марығда Максим алтын медаль холға кирген. Андада хабыс 12:10 саннаң тоозылтыр. Сибирь первенствозында Денис Чернов «ыырҷызына» маң пирбеен. Хакасияның алтын медаль. Арғыстары, кӱресчінiң чидиине морсынып, «Денис, син матырзың!» тіп хысхырғаннар.
АЛТАЙЛАР
Амғы туста Сибирьдегі федеральнай округсар ӱс национальнай республика кірче: Алтай, Тыва паза Хакасия. Чапсых таа, че олаңай паза грек-рим кӱрестері Хакас чирінде ле тиліпче. Тывада олаңай кӱрес улуғласта, Алтайда – грек-рим кӱрезі. Андағ оңдайнаң Cибирь первенствозында хонҷыхтарыбыс ла араласпааннар. Харындас чоннаңар чоохтаза, Ағбанзар марыға 20 спортсмен килген. Олар постарын турыстыра кӧзіткеннер. Алтайлар ӱс алтын паза ӱс кӱмӱс медаль холға киргеннер. 45 кг паза 51 кг кӧдірімнерде спортсменнерге финалда удур-тӧдір харбазарға килістір. Тренер Амыр Матыевтің чооғынаң, олар піcтің республиказар турнирлерге удаа килчелер, че хакастар ноға-да Тағлығ Алтайзар чӧрбинчелер. Регионда грек-рим кӱрезі ӧӧн спорт кӧрімі полчаттыр. Секциялар полған на аймахта пар. Тренерлер саны 40-ха читче. Олаңай кӱрес Алтайда чоғыл, че самбо паза дзюдо чахсы тиліпчелер.
18 часха читкелек спортсменнер аразында Россия первенствозы мартта Самарада иртер. Денис Черновха анда оң полар тіп ізенчебіс. Ідӧк пу кӱннерде ӧріністіг хабар килген. Хызылчарда ирткен Ярыгиннің турнирінде Мария Тюмерекова (50 кг) чиңіс тутхан, Наталья Малышеваның (53 кг) хола медаль. Хомзынысха, Артур Чебодаев (57 кг), ӱзінҷі орын ӱчӱн харбазып, утыр салған. Ярыгиннің турнирі – чоннар аразындағы марығ. Пӱӱл анда 400 артиинаң спортсмен кӱзін cынаан. Олар марыға 12 хазнадаң килгеннер.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
