ПАСТАҒЫ ІКІ КОМАНДА ВОЙСКОЛАРЗАР ПАРЧА
Чааҷы службазы. 11 ноябрьда Хакасияның чааҷы комиссариадынаң республика призывниктерінің пастағы ікі командазы войсколарзар пайрамни ызылған
Чиит оолларны чааҷы службазына ысчатса, республиканың чааҷы комиссариады хыринда кӧп чон чыылыс парча. Ам даа анда iдӧк пӱӱл срочнай службаа парчатхан призывниктерні ӱдезерге оларның паба-iҷелері, туған-чағыннары, нанҷылары чыылысханнар.
Чааҷы кип-азаана тонандырылған чиит ооллар военкоматтың плацында стройға турыбысханнар. Россияның паза Хакасияның гимннері толдырылған соонда пайрамның митинг пасталған. Пастағы сӧс пирілген республика военкомадының хығыртың пӧлиинің пастыңы Евгений Волковха.
– Сірер ам срочнай чааҷы службазына парчазар. Iкі команда алынҷа войсколарда служба иртер. Анда сірернің алныңарда ікі пӧгін турар: чааҷы службазын чахсы апарарға, андағы тиріглернең, техниканаң тузаланарға ӱгреніп аларға; ікінҷiзi – командирлеріңнің чооғын истерге, дисциплинаа тудынарға, хада служба иртчеткеннернең танызып, пілізіп, опыт алынарға. Iдӧк ибде халған паба-iҷелеріңні, туған-чағыннарыңны ундубаңар, оларнаң палғалыс тударзар, сірерге службадаң пос тус пиріл турар, телефоннарың пар.
Служба иртчетсе, піліңер – сірер анда Хакасияны кӧзітчезер, аннаңар службаны турыстыра апарығар. Чолыңар азых ползын! – теен подполковник Евгений Волков.
Митингте iдӧк, призывниктерге службаны турыстыра апарарға алғап, чоох тутхан Ағбанның епархия протоиерейі Александр Ильин. Хайди ол таныхтаан, абыстар даа чиит туста чааҷы службазын иртчелер. Амды Донбасста махачы тудынған абыс Михаил ада чуртазын пир салған. Россия президентінің Указынаң ағаа Россияның Матыры аарластың ат пирілген (ӱреен соонда). Ол iдӧк прайзына чахсы кӧзідім полча. Призывниктерге службаны чахсы апарарға алғаан.
Митинг тоозылғанда, призывниктер оларны ӱдезерге килген чоннаң тоғазарға позыдылғаннар.
Мин подполковник Евгений Волковнаң чоох алысхам. Хайди ол искірген, пӱӱл Хакасиядаң пастағы ікі команда войсколарзар ызылча, олар Центральнай чаа округында служба иртерлер. Командаларның пірсі Новосибирскте Сухопутнай войсколарда служба апарар, ікінҷiзі – Москва хыринда Тверь облазындағы Ржев городта Кии-хан тигір войсколарында. Республикадаң пӱӱл кӱскӱдегі хығыртыңда войсколарзар 30 команда ызылар, халғанҷы команда 15 декабрьда ызылары кӧрілче.
Призывниктерге чааҷы службазын апарарға чылығ кип-азах военкоматта пирілче, iдӧк олар кирек ниме-ноо, кнопкалығ телефоннар, сим-карталар алчалар. Чолда оларны ізіг чииснең азырирлар, амды служба иртчең орыннарынзар Ағбан – Москва поездтіг парарлар.
Военкомат хыринда Пии аймаандағы Чаптых аалдаң килген ирепчі Алексей Станиславович паза Наталья Александровна Сагояковтарнаң чоохтазып алғабыс. Олар оолғы Егорны армияа ӱдезерге килтірлер. Егор, школа тоозып, суғҷа чӧрҷең транспорттың Хызылчардағы институдынзар ӱгренерге кіріп алған, че амды, армияа парарға идіп, академическай отпуск алып алтыр. Ол Ржев городта орныхчатхан Кии-хан тигір войсколарының чааҷы частьынзар ызылча.
Хайди искірген Алексей Станиславович, позы аалдағы кресен-фермер хониинда тоғынча, ипчізі Наталья Александровна (Кулужаковтар хызы) ибде кічіг паланаң одырча. Оолғы Егор, школада ӱгренчеткенде, олағай кӱреснең айғасчаң, спортха тартылҷаң. Хызылчардағы институтсар ӱгренерге кiрчеткенде, анда электромеханик специальнозын таллап алған. Армиядаң айланза, ӱгредиин узарадар.
Хайди тидірлер, оң ползын чир-суғҷыларыбысха чааҷы службазында.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |