ЧОЛДАҒЫ ТЫХТАҒ ӰЧӰН НАНДЫРЫҒЛЫҒ
14.10.2022
Хабарлар
16 октябрьда - Чол хонии тоғынҷылары кӱні. Чарыс айының ӱзінҷі позырах кӱнінде чолларны пӱдірчеткен паза тыхтапчатхан тоғынҷылар профессиональнай ӱлӱкӱнні таныхтапчалар
Александр Щетинин Ширадағы чол тыхтағ-пӱдіріг устанызының (ДРСУ) директор орынӌызы полча. Ол чоллардағы тыхтағ тоғыстары ӱчӱн нандырча. Александр Леонидович пу тоғысха хайди килгеннеңер паза амғы туста Шира аймаанда хайдағ чоллар тыхталчатханнаңар чоохтап пирген.
Александр Щетинин Шира аалда тӧреен. Андох ортымах школаны тоозыбызып, 9 № СПТУ-да тракторист-машинистке, водительге ӱгренген. Училище соонаң пір чыл водитель полып істенген, анаң 1976 чылда армияа хабылған. 1978 чылда армиядаң айланып, Сорығдағы геолог-разведка предприятиезінде водительге тоғысха кірібіскен. Соонаң бурильщиктің полысчызы полған, анаң мастер полып істенген. Пу предприятиеде 10-ӌа чыл тоғын салып, кірпис заводында цехтың пастығы полған. Анда сигіс ай істенген. Анаң аны силикатнай заводсар цех пастығы поларға хығырғаннар. Анда ікі чыл тоғын салып, Ирбинскай карьерде алты чыл ӧӧн инженер полған, соонаң ӱс чыл пос киреенең айғасхан.
1987 чылда Александр Леонидович, Томсктағы политехническай институтты тоозыбызып, «Тағ инженері, геология разведказының технологиялары паза техниказы» специальность алған.
2000 чылда Александр Щетинин, Ширазар кӧс киліп, тура пӱдірініп алған, садығнаң айғас сыххан. 2003 чылда Ширадағы военкоматсар пӧлік устағӌызының ӧӧн полысчызына тоғысха кірібіскен.
2009 чылдаң сығара Александр Леонидович Ширадағы ДРСУ-да тоғынча. Пастап тоғыс хайраллирынӌа инженер полған, 2019 чылдаң сығара - директор орынӌызы (предприятиенің ӧӧн инженері).
- Амғы туста предприятиеде 90 тоғынҷы саналча. Оларның кӧбізі улуғ частығ. Ӱгредігліг чолҷылар чидіспинче. Чииттер тоғынарға килбинчелер, пістің предприятиеде чолҷылар улуғ кирексіністе. Опыттығ чолҷылар улуғлан парғаннар. Мин, 65 час толдыр салған даа ползам, тоғынчам, - таныхтаан Александр Щетинин.
Пӱӱнгі кӱнге Ширадағы ДРСУ-ның тоғынӌылары муниципальнай чолларның пис кизегін тыхтабысханнар. «Хорғыс чох чахсы чоллар» нацпроектче Ачинск - Ужур - Шира - Троицкай регион чолының кизегінде чарытхы тірӧстерін, тохтағларны турғысханнар. Тыхтағ тоғыстарына федеральнай бюджеттең 26 миллион салковай пирілген.
Тойым поселоктағы паза хыриндағы чолларны тыхтирына 8 миллионӌа салковай позыдылған. Пӱӱнгі кӱнге тыхтағ тоозыл парир. Амды Хутухтығ аал хыриндағы чол нааӌылалча.
Александр Леонидовичтің чооғынаң, Шира аймаандағы чоллар 1983 чылда пӱдірілгеннер паза тиксі тыхталғаннар. Аның соонаң чоллар тыхтирына ахча асхынах пирілӌең. Чылда пір-ӱс километрӌе ле чолны тыхтир оңдай полӌаң. Халғанӌы ӱс чыл аразына тыхтаға ахча кӧп арах позыдылча. Ол ахча чолларның 13 километрін тыхтабызарына паза 10 километрінде асфальт тӧзебізеріне, чарытхы тірӧстерін паза тохтағлар турғыс саларына читче.
Ширадағы ДРСУ-да чол тыхтаӌаң техника нааӌылалча. Ӱс чыл мының алнында федеральнай ахчаа нинӌе-де ГТМ, асфальт тӧзеӌең техника алылған. Пӱӱл предприятие пос ахчазына ікі каток, чоон погрузчик садызып алған. Пылтыр улуғ нимес погрузчик алылған. Амды ДРСУ-ға самосваллар киректелчелер.
Килер чылда «Хорғыс чох чахсы чоллар» нацпроектче хайдағ чоллар тыхталары пілдістіг нимес. Александр Щетининнің чооғынаң, Боград аймаанда Харасуғ аалзар парчатхан чолның 6,5 километр кизегін тыхтирынӌа чӧптезіг иділер паза Шира аймаанда Почос аалда чарытхы тартарынӌа тоғыстар апарылар.
Халғанӌызында Александр Щетинин чолӌыларны чағдапчатхан ӱлӱкӱннең алғыстабысхан:
- Пістің предприятиеде тоғынчатхан паза Хакасияның прай чолҷыларын профессиональнай ӱлӱкӱннең алғыстапчам. Прайзына чидіглерге чидерге, часка, амыр чуртас, сыдамах алғапчам. Ӧӧні - хазых пик ползын паза хаҷан даа тоғыс толдырылзын!
Автор :
Оксана ЧЕЛТЫГМАШЕВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
