«Тазоба» парк пӱдірілер
30.09.2022
Хабарлар
Экономика. Ағбан городта «Тазоба» индустриальнай парк пӱдірілер. Город устағ-пастаа ағаа Ағбанвагонмаш саринда чир кӧр салған
Хакасияның экономика тилізі министерствозы искіриинең, «Тазоба» индустриальнай парктың пӱдіриине ахча федеральнай синнең пирілер, аның ӱчӱн министерство ӧнетін таллағны ирткен. Ағаа хоза регион тимнеен проект Россияның иң чахсы ӱс проектіне кирілген. Пу неделяда Хакасияның экономика тилізі министерствозының, Ағбан городтың устағ-пастаа, городтың коммунальнай предприятиелерінің паза инвесторның кізілері индустриальнай парксар коммуникациялар тартарын ӱзӱргеннер.
– Проектті чуртасха кирерге хысха тус пирілче, – искірген республиканың экономика тилізі министрі Виктор Богушевич. – Чарыс айында чӧптезігде хол салылар, аның соонаң федеральнай бюджеттең ахча позыдылар. Кічіг хырлас айының пастағы кӱннерінде 250 миллион салковай чидер. Улуғ хырлас айында ікінҷі чӧптезігде хол салылған соонаң пазох 250 миллион салковай пирілер. Ол ахчаны индустриальнай парктың пӱдіриине паза тириине позыдарға киректелче. Тоғыстар 2023 чылда толдырыл парарға кирек. Пӱдіріге паза тиріге ідӧк инвесторның ахчазы хозылар. «ТРАНСАРЕНДА» ООО устағҷы компания 180 миллион салковай хозар. Ахчаны министерство позыт турар, пӱдіріг ӱчӱн ідӧк піс нандырарбыс. Пӱӱнгі кӱнде кем пӱдірігні апарары пілдістіг. ікі тура турғызарға пӧгінчебіс – цех паза устағ-полызығлығ тура.
Ағбан город устағ-пастаа искіриинең, «Тазоба» индустриальнай паркка пӧлілген чир промышленностьха кӧрілген. Анда прай комммунальнай сетьтерні тартар оңдай пар: чылығның, суғның, чарытхының паза палғалыстың. Чирнің улии – 13,8 гектар, ол санда 6,08 гектар резиденттерге пирілер, 4,8 гектар ниме-ноо сығарызына кӧрілер.
– Ағбанда пу пастағы андағ орын, – таныхтаан Ағбан город пазы Алексей Лёмин. – Проект хоостыра пастағызын андар 15 резидент тартылар, 450 кізее тоғыс орны тӧстелер. Ағбан городха промышленность тилізі, кічіг паза ортын пос кирее тилізі хаҷан даа пастағы орында турған, уламох амғы оой нимес туста. Город ӱлгӱзінің пӧгіні – проектті чуртасха кирерге прай саринаң хабазары.
Пӱӱнгі кӱнде парксар коммунальнай сетьтерні тартчаң проект тимнелче. Хай пірее сидік сурығлар чарадылған соонаң, ол сыныхтаға ызылар. Республиканың паза городтың ӱлгӱлерінің пӧгіні – паркты кӧрілген кӱзінең тоғындырары. Виктор Богушевичтің искіриинең, паркта идінҷек-резиденттерге пос хынғанни тузаланҷаң цех турғызылар, офистерге, ӱгредіг класстарына пӱдіріг полар. Инвестор, Сколковонаң хада чӧптезіг идіп, аның резиденті полыбыстыр, ол инновация проекттерін чуртасха кирер оңдай пирче. Ағбандағы ТЭЦ-таң читірілер оор полызиинаң пӧзік технологиялығ сығарыстар азарға чарир, кӧзідімге, пӱдіріг ниме-нооларының. ідӧк ағастаң ниме-ноо тимнирі, гуматтар сығарары паза пасха кӧстеглерҷе cығарыстар тӧстирі кӧрілче. Ағбандағы индустриальнай парк Россияның реестріне кирілзе, идінҷектернің аймах льготаларнаң тузаланар оңдай полар, ол санда хорадығларның чардығын айландырарынаң, 1 – 3 % ниик ӧдіcтернең, наука-істезігліг паза опытно-конструкторскай тоғыстарға хабазығнаң.
Автор :
Тимнеен Наталья Сюптерекова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы