НАА ПІЛІСТЕРГЕ ТАРТЫЛЧА
29.06.2022
Статья
Пістің ӧткіннерібіс
Часхызын Тагир Толмашов «Победа» культура кіні иртірген «Нымахта ааллапчабыс» Ағбан городтың кӧзідіг-мариинда араласхан. Ол марығ ӱс номинацияҷа ирткен. Тагир «Нымахтағы матырның чурты» номинацияда пастағы орын алған. Ол іҷезі Татьяна Анатольевнанаң хада Хуу хаттың таңах азахтығ ибіҷегін тимнеен. Ағбандағы Чиңіс паркында пас чӧріп, ағастарның аймах салааларын тееріп алғаннар. Анаң ибіҷек пӱдірібіскеннер.
- Тус асхынах полған. Мин тоғынчам, Тагир ӱгренче. Андағ марығ иртірілчеткенін кӧр салғандох, Хуу хаттың ибіҷегін тимнирбіс тіп чӧптезіп алғабыс. Ағас салааларын пір син иде сындырғлабысхабыс. Оларны, эмекнең орап, піріктіргебіс, - чоохтаан оолахтың іҷезі Татьяна Толмашова.
Ідӧк Тагир Ағбандағы 22 № школа иртірген «Мода кип-азағы» марығда араласхан. Анда хакас кип-азаан тимнеп саларға киректелген. Оолах іҷезінең хада, пакеттердең хакас кӧгенеен тігіп, конфет чаҷыннарынаң орнаменттер тимнеп, кӧгенекті чазабысхан. Чайаачы тоғызы ӱчӱн оолах ӱзінҷі орын алып алған. Пу ідӧк чахсы чидіг.
- Мин мероприятиелер тӧстегҷілеріне алғызым читірчем. Ідӧк олғаннарны аймах марығларда ӧткін аралазарға хығырчам, - теен Татьяна Толмашова.
Тагир Ағбандағы 19№ школаның пастағы клазын тоос салды. Оолах олған садынаң робототехника кружогына чӧр сыххан. Оолағастар аймах ниме-ноолар чайирға хынадырлар. Тагирге ідӧк техниканаң айғазарға кӧңніне кірче. Ідӧк оолахтың нинҷідең, легодаң паза пластилиннең ниме-ноо чайирға чӱрее чатча. Ол Ағбандағы «Победа» культура кіні иртірчеткен марығларда сыбыра араласча. Ідӧк оолах іҷезінең хада суббота сай «Сӧбіренің тынағ кӱннері» адалчатхан мероприятиее чӧрче. Анда хысхаҷах, че тузалығ кинолар кӧзітчелер. «Эра» кино Тагирнің кӧңніне кірген, хайзында саарбахтар хантигірҷі поларға итчеткен сағыстарын читіргеннер. «Победа» культура кінінде ӧӧнінде палаларны тилітчең киноларны кӧзітчелер. Аны кӧріп алып, Тагир, ибінзер килзе, узанҷаң на ниме таппинча.
Тагир - амыр хылыхтығ оолах. Тағ осхас пик хылыхтығ ир ползын тіп, іҷезі оолағын хакас адынаң адап салған. Чоохчыл оолахтың олған садында даа, амғы клазында даа нанҷылары кӧп. Палалар аннаң хада ынағлазарға тартылчалар.
іҷезі Татьяна Анатольевна Ағбандағы олған садында воспитатель полча, аннаңар хайдағ марығлар иртчеткенін ол оой піліп алча. Мындағ марығлар полызиинаң палазы чахсы тиліпче тіпче ол. Тагирнің пабазы Максим Дмитриевич Толмашов Ағбандағы 33 № тӱзеділҷең колонияда инструктор-кинолог полып тоғынған, ам тынағда.
Тагирнің Алина паза Дарина пиҷелері пар. Алина пӱӱл 11 класс тоозыбысты. Дарина Хызылчардағы имнег колледжінде ӱгренче. Ол ідӧк ӧткін хыс. «Хызылчар городтың мисс абахайы-2022» марығда Дарина призёр полыбысхан.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы