ТӰЗІМНІГ ТОҒЫНЧАТХАННАРҒА - ААРЛАСТЫҒ ПІЧІКТЕР
05.02.2020
Хабарлар
Чидіг. Киҷее, 4 февральда, Хакасия правительствозының туразында тоғыста пӧзік чидіглерге читкен кізілерге республика пазы Валентин Коновалов Аарластығ пічіктер читірген
Чыл сай, кибірли, тӱзімніг тоғынчатхан улусха пӧзік чидіглері ӱчӱн Хакасия пазы Валентин Коновалов Аарластығ пічіктер читірче. Пӱӱл андағ сыйыхха алты кізі турысхан. Республика пазы, олар Хакасияны тилідеріне улуғ хозым итчеткенін таныхтап, полғанына ла алғызын читірген.
Россия Федерациязы Правительствозының Аарластығ пічиинең «Стальконструкция» Ағбандағы пӱдіріг-тыхтағ управлениезі директорының экономикаҷа паза финанстарҷа орынҷызы Михаил Андреевич Борисов таныхтатхан. Тоғыста пӧзік чидіглерге чидіп, республиканы тилітчеткен ӱчӱн Хакасия правительствозының Аарластығ пічиинің сыйыхтатханнар: «Айтыс» республиканың хазна предприятиезінің слесарь-монтажнигі Анатолий Владимирович Сысоев, «Теремок» тура-интернаттың социальнай ӱгретчізі Татьяна Сергеевна Кушнарёва паза олох учреждениенің дефектолог-ӱгретчізі Татьяна Валентиновна Ткаченко.
Хакасияның ӱгредіг паза наука министерствозының экономика паза статистика пӧлиинің устағҷызы Татьяна Николаевна Лалетина паза ӱгредіг сыныхтаанңа пӧлиинің советнигі Валентина Сергеевна Хромых кӧп чыл тӱзімніг тоғынчатхан ӱчӱн Хакас Республиканың Аарластығ пічиинең таныхтатханнар.
«Теремок» тура-интернаттың тоғынҷылары пу учреждение тӧстелгеннең сығара анда тоғын парирлар. Олар 11 чыл андағы палаларны орта чоохтанарға, чон аразында иптіг тудынарға кӧніктірчелер. Хайди таныхтапча Татьяна Сергеевна, «Теремокта» тиксі 180 азыра олған ӱгренче. Оларға аймах кружоктар тоғынча. Ідӧк интернаттың ӱгренҷілері, аймах-пасха мероприятиелерде аралазып, чуртаста ӧткін поларға ӱгренчелер.
- «Теремок» тура-интернатсар тоғынарға килген соонаң мағаа чуртаста кӧп ниме пасха саринаң азылған. Чӱреем дее нымзах пол парған. Минің кӧрізімнең, иң пурун піс олғаннарыбысты алынҷа чуртасха паза ідӧк чон аразында орта тудынарға ӱгрет саларға кирекпіс, - сағызынаң ӱлескен ол.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде