«СЫН ВЕСЫЛАР» - ААЛ ХОНИИ РЫНОГЫНДА
01.11.2019
Хабарлар
Андрей СИНЯВСКИЙ весыны сыныхтапча
Акция. Хакасия чарыс айының 30-ҷы кӱнінде тиксі Россиядағы «Сын весы» акцияа хозылды
Тиксі Россияда «Сын весы» акция пастағызын на иртірілче. Акция тузында садығ киреенең айғасчатханнарға весылары орта тоғынчатханын тикке сыныхтаттырып аларға чарир. Пу тоғысты стандартизация паза метрология кіні иртірче. Хызылчардағы стандартизация паза метрология кінінің Хакас пӧлиинің метрология секторының устағҷызы Сергей Королевтың таниинаң, республиканың аал хонии рыногы пу акцияа пастағылар санында хозылған.
Садығ орнында Хызылчардағы стандартизация паза метрология кінінің Хакас пӧлиинің ӧӧн инженері Андрей Синявский весыны сыныхтаан. Весы орта тоғынар ӱчӱн, аны кӧні паза хатығ орында турғызарға кирек. Кӧні турчатхан весызар специалист ӧнетін гиряларны турғысча, іди весының ниме-нооларны орта кӧдірчеткені сыныхталча. Пастап 1 килограмм гирязы турғызылча, анаң 2 килограммның ікі гирязы, оларға хоза 5 килограммның ікі гирязы. Электроннай весынын кӧзідіглері 3 килограммға читіре толдыра кӧдірімні кӧзіткеннер, весыда тиксі 5 килограмм пасчатхан гирялар турғызылғанда, ол 4,998 килограмм кӧзіткен. Андрей Синявскийнің таниинаң, 1 килограммға 1 грамм читпинчеткені алай хоза кӧзітчеткені хорғыстығ нимес. Аннаңар пу весы сыныхтағны чахсы иртібіскен тіп саналча. Анзын киречілепчеткен таңма весының кӧзідіглері ӱстӱнде турғызылча, весыны иптир орында - пломба. Аннаң пасха, специалисттер весының паспортында ол сыныхталғаннаңар танығ турғысчалар.
- Садығнаң айғасчатханнарға весыларны чылда пір хати хайди даа сыныхтаттырарға кирек, - чарытча Хызылчардағы стандартизация паза метрология кінінің Хакас пӧлиинің метрология секторының устағчызы Сергей Королев. - Ол идінӌекке дее, аның ниме-нооларын садысчатхан чуртағӌыларға даа тузалығ. Весы читіре кӧдірбинчетсе, идінҷек ӱреге кірче, артых кӧдірчетсе - идінҷек тее, чуртағҷы даа. Орта кӧдірбинчеткен весынаң тоғынчатхан ӱчӱн паза аны тузында сыныхтаттырбаан ӱчӱн административнай хатығлас пар: должностьтағыларға - 20 муң салковайдаң 50 муңа теере, юридическай лицоларға - 50 муңнаң 100 муң салковайға теере. Весыны сыныхтир ӱчӱн тӧлег пар, че пӱӱнгі акция полызиинаң садығ киреендегілерге аны тикке иртер оңдай пирілче.
Сыныхтағны ирт полбаан весы тыхталарға кирек, аны хатап сыныхталған соонаң на тоғындырарға чарир. Тиксі алза, сыныхталчатхан весыларның 5 % ле саба тоғынчаттыр.
- Республиканың аал хонии рыногының устағ-пастаа весыларны тӧреміл сыныхтағда тутча, - таныхтаан рынок устағҷызы Александр Векшин. - Мындағ акциялардаң хорыхчаң сылтағ чоғыл. Піс анда ікінҷілес чох аралазарға чаратхабыс, ағаа хоза ол весыны тикке сыныхтачаң оңдай пирче.
Аал хонии рыногында ниме-ноо садызарға килгеннерге алынҷа весы турча. Кізілер алған нимелерін анда хати кӧдірібісчелер. Садығҷаа алаахтыртпас ӱчӱн, хати сыныхтағ артых полбас. Сынап садығҷының артых санап пиргені сығысса, кізее Роспотребнадзорзар айланарға кирек. Ол кізі айланызы хоостыра Хызылчардағы стандартизация паза метрология кінінің Хакас пӧлиинзер «ікінҷілестіг» весыны сыныхтирға сурынысты ысча.
«Сын весы» акция Ағбаннаң пасха, ідӧк Лесосибирскте, Железногорскта, Минсуғда, Ачинскте ирткен.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде