ТУСНАҢ ТИҢЕ ХААЛАПЧА
02.10.2019
Хабарлар
Пайрам. Ағбанда 27 сентябрьда Хакасиядағы ӱгредігні тилітчең паза квалификация кодірҷең институттың 75 чылы таныхталған.
Ыраххы 1944 чылда тостелген институт пӱӱнгі кӱнде республиканың аймах ӱгредіг учреждениелеріне чӧлег полча. Анда ӱгретчілерге, воспитательлерге аймах методика пособиелері тимнелче. Туснаң тиңе хаалир ӱчӱн ӱгретчілер анда устарын тилітчелер. Кибір хоостыра ӱгредіг учреждениезі пайрамнығ чылын олаңай ла таныхтабин, ағаа чарыдылған пірее мероприятие иртірчелер. Аннаңар ирткен пятницада ӱгретчілернің узын тилітчең институт «Конкурент пол полар ӱгредіг организациялары: пӱдізі паза устачаң оңдайлары» наука-практикалығ конференция иртірген. Анда ӱгретчілер, воспитательлер ікі дискуссия площадказында, пис секцияда, «тегілек столда», семинарларда паза пір тренингте удур-тӧдір опыттарынаң ӱлескеннер.
Таныхтирға кирек, ӱгретчілернің алнында чылдаң чылға наа погіннер турғызылча. Оларға туснаң тиңе хаалир ӱчӱн наа техникаларнаң тузаланарға килісче. Ідок наа методикаларны чуртасха кирерге киректелче. Аннаңар олар удаа ӱгретчілернің узын тилітчең институтсар айланчалар.
Ирткен пятницада полған на школа институтты пайрамынаң алғыстаан. Анда істенчеткен специалисттерге алғыстарын читіргеннер. Коп чыллар институтта тӱзімніг істен салған ӱгретчілерге Ӧоркі Чоптің Аарластығ пічіктері читірілген.
Хакас Республиканың Ӧоркі Чобінің культураҷа, ӱгредігҷе паза наукаҷа комитедінің кнезі Оксана Владимировна Разварина институттың тоғынчыларын пайрамнаң алғыстаан. Ідӧк кӧп чыллар тӱзімніг істен салған ӱгретчілерге Ӧоркі Чоптің Аарластығ пічіктерін читірген. Ол санда сыйыхха турысхан Надежда Яковлевна Толмачева. Таныхтирға кирек, Надежда Яковлевна 14 чыл хакас тілі методиказы кінінде істен парир. Пӱӱнгі кӱнде ол кіннің устағҷызы полча.
- Піс республиканың школаларынаң пик палғалыс тутчабыс. Ідӧк ӱгретчілерні аймах пособиелернің авторлары поларға ӱгретчебіс, - тоғызынаңар чоохтаан ол.
Надежда Яковлевна Толмачева педагогика наукаларының кандидады полча. Хаҷан-да ол Ағбандағы «Торғайах» национальнай школанаң устаан. Амды ол позының пілізінең ӱгретчілернең ӱлесче.
Пайрамнығ иирде залда коп ветеран одырған. институтта істенчеткен ӱгретчілер оларны матап айа саап удурлааннар. Олар, тізең, ӱр коріспеен арғыстарынаң, тоғазып, хуҷахтасханнар. Институттың ректоры Светлана Тихоновна Дмитриева пастап оларның институды методика кабинеді ле полған тіп таныхтаан. Амды ағаа республиканың ӱгредіг системазында улуғ орын пирілче. Пӱӱнгі кӱнде ӱгретчілернің узын тилітчең институтта 89 кізі істенче. Оларның 53-зі - ӱгретчілер. Чоохтирға кирек, анда істенчеткен ӱгретчілернің кӧбізі педагогика, психология наукаларының кандидады полча. Ректорның чооғынаң, институттың алнында чыл сай наа пӧгіннер турғызылча. Аннаңар анда істенчеткен ӱгретчілер, пір орында турбин, туснаң тиңе хаалапчалар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде