ХЫСХЫЗЫНА ТИМНЕНІС - АЛЫНҶА ХАЙЫҒДА
31.07.2019
Хабарлар
Чыылығ. Кичее, от айының 30-чы кӱнінде, Хакасия пазы Валентин Коноваловтың устаанынаң правительствоның теестегі чыылии ирткен
Чыылығда ӧӧн хайығ 2019-2020 чылларнын хысхызына тимненіске, «Сибирьде хой паза ӧскі ӧскірері - отрасльда экспортты алғыдар оңдай» чоннар аразындағы наука-практикалығ конференцияның салтарларына, чуртағҷыларға хорғыс чох поларына паза Хакасия пазынаң кӧні эфирде кӧдірілген сурығларға айландырылған.
Чурт-коммунальнай хоных чағдапчатхан хысхаа хайди тимнелчеткеннеңер сан пирісті Хакасия пазының орынчызының тоғызын толдырчатхан Константин Харисов иткен. Правительство республикадағы чурт-коммунальнай хоных предприятиелерін наа пӱдісче тоғындырарға пӧгін турғыс салған: муниципальнай пӱдістердегі предприятиелерні аймахтарның холына пирерге, республикада, тізең, казеннай энергетика предприятиезін тӧстирге. Пу тоғыс кӧрілген план хоостыра толдырылча.
Олох туста чарытхы ӧдістерін айландырары улуғ хайығда тудылча. 2019 чылда айландырарға кӧрілген ӧдістің 32 милллион салковайы пиріл парған, ол тиксі синнің 25%. Тиксі чурт-коммунальнай хоныхтағы ӧдістернің 60% чуртағҷыларға килісче, че орыннарда ӧдістіг чуртағҷыларнаң тоғынҷаң комиссия ӱс муниципалитетте ле пар. Хысхызына чурт фонды, котельнайлар паза сетьтер 63% тимде, алында ол сан 34% полған. Константин Нурфаязовичтің таниинаң, ол тоғыстар иділ парған, че акттар толдырылбаанынаң палғалыстығ. Муниципальнай пӱдістер алнында пӧгін турча: ӱртӱн айының 10-ҷы кӱніне теере хара тастың хызырылбас синін, 20 муң тоннаны, чыып саларға, ӱртӱн айының 15-ҷі кӱніне - чурт фонды тимдедеңер паспорттар аларға, кічіг хырлас айының 1-ғы кӱніне - чылығ пирчең сетьтерге паспорт. Хакасия пазы Валентин Коновалов Харатас городта хысхызына тимненісті алынҷа хайығда тударға сурынған. Городтың ЖКХ инфраструктуразын СГК-ға пирерінче тоғыс кӧрілген оңдайҷа апарылча.
Валентин Коновалов Жемчужнай поселокта насостарны алыстырарынча тоғыс хайди парчатханын сурған. Республикадаң оларны алыстырарына 4,8 миллион салковай пирілтір, че пасха хан чирінде сығарылчатхан насостар чарыс айының 31-ҷі кӱніне ле читірілер осхас.
Хакасияның аал хонии паза ас-тамах министрі Сергей Труфанов «Сибирьде хой паза ӧскі ӧскірері - отрасльда экспортты алғыдар оңдай» чоннар аразындағы наука-практикалығ конференцияның пӧзік синде ирткенін таныхтаан паза тӧлліг хойлар ӧскірерінҷе проектті чуртасха кирерге чарадылғанын искірген. Аалҷылар республикада чахсы мал азыралы парына чапсыптырлар. Сағам малҷылар ідӧк хысхызына тимненчелер, хыраҷылар 20-че кӱн пазынаң тоңастығларны кизіп пастирлар. Пу тоғыстар тӱзімніг паза тузында толдырылған ӱчӱн, оларға республика хабазии киректелче теен министр. Хакасия пазы Валентин Коновалов аның орынҷызы тоғызын толдырчатхан Ирина Войноваа аал хониина хабазарын алынҷа хайығда тударға чахаан.
Ідӧк Ирина Войнованың искіриинең, республиканың паза муниципалитеттернің бюджет учреждениелерінде чал ахчазы тудығ чох тӧлелче. Пірее аймахтарда ла сала соона халчалар, че дотациялар оларға тузында ызылча. Школаларға паза олған садтарына субвенциялар ідӧк тузында пирілчелер. Пу сурығлар кӧні палғалыста республика пазына пирілгеннер. Паза пір сурығ Ибіг чуртағҷыларынаң кірген: олар наа Культура туразы пӱдірілері чылдырылчатханына сағыссырапчалар. Хакасияның культура министрі Леонид Ереминнің искіриинең, Культура туразының проект пічіктері «Культура» нацроектке паза «Россияда аалларның тиксі тилізі» хазна программазына кирерге ызылған. Министр проект оларның піреезіне кирілеріне ізенче.
Паза правительство чыылиинда Чиңістің 75 чылын таныхтирына тимненіс комитедін пу неделяда чыырға чарадылған. Ідӧк Хакасия пазы Валентин Коновалов, «Школазар чол» чахсы киректер акциязын чарлап, чуға чуртапчатхан паза кӧп палалығ сӧбірелерге полызар ӱчӱн, школаа кирек ниме-нооларны чыырға полызарға хығырған.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде