ПІСТІҢ ХЫСТАРНЫҢ ӦРІНІЗІ
20.02.2019
Хабарлар
Спорт. Хызыл городта олаңай кӱреснең айғасчатхан хыстар аразында Сибирьдегі федеральнай округ первенствозы ирткен.
Сибирьдегі федеральнай округ (СФО) мариинда постарының устарын сынирға 18 часха читкелек кӱресчі хыстар чыылысханнар. Анда чиңіс тутхан паза сыйыхтығ орынға турысхан чиит кӱресчілер Россия первенствозында аралазар оңдай алардаңар прайзы чахсы пілген. Аннаңар полған на кӧдірімде чиңіске парчан кӱстерін салғаннар.
- Хызыл городсар Сибирьнің алты регионынаң командалар килтір. Марығда араласчатхан кӱресчілер аразында чахсы тимненістіг хыстар пар полғаннар, - ӱлесче сағыстарынаң Хакасияның піріктірілген командазын СФО мариина ал чӧрген тренер Марат Кичеев.
Марат Семёновичтің сӧстерінең, Туваның ӧӧн городында ирткен арға-мӧрійде 91 кӱресчі хыс араластыр. Чир-суғҷыларыбыс санынаң алтын даа, кӱмӱс тее, хола даа медальлығ айланған чииттер пар. Итсе, сыйыхтығ орыннарға сыхханнар саны кӧп арах таа поларҷых. Харбазығ тузында ипти ле утчадып, пик сындырлығ полчатханнарын чахсы кӧзіт полбин салчалар, утырыбысчалар. Олох арада Россияның саблығ тренері Марат Кичеев кӱресчі хыстарыбыстың пірдеезін хомайлирға сағынминча. Позы олаңай кӱресче паза хакас кӱрезінҷе спорт узы полчатхан кізі чахсы оңарча - хыстарның хайзы даа позының узын пу марығда толдыразынаң кӧзіт пирерге харасхан.
Іди иң ниик кӧдірімде чир-суғҷыбыс Оксана Сазанакова алтын медаль ӱчӱн Кемеров облазынаң килген Екатерина Шемякованаң харбасхан. Пістің хыс пастағы разрядтығ. Екатерина, тізең, спорт узына кандидат полча. Таштып чирінде тренер полчатхан Юрий Кусургашевтің ӱгренҷізі чиңіс тударға матап таа кӱстензе, опыды чидіспинчеткені пілдірген. Аннаңар Оксана 40 кг кӧдірімде ікінҷі орын холға кирген, ибзер кӱмӱс медальлығ айланған. СФО мариинда ікінҷі орын алғаны маңат чидіг.
Спорт узына кандидат Алёна Сагалакова, 46 кг кӧдірімде пастағы орын ӱчӱн Хызылчар крайынаң килген Ирина Рябконаң харбазып, ибзер алтын медальлығ айланған. Пуох кӧдірімде спорт узына кандидат Вера Тадазакова ӱзінҷі орынны холға кирген.
Прайзынаң кӧп кӱресчі чыылысхан 57 кг кӧдірімде - 16 кізі. Ағбан пилтірі аймахтағы Солнечнай аалда тӧреен-ӧскен Камила Кузнецова, пу кӧдірімде Новосибирск облазынаң килген Милена Кухареванаң харбазып, кӱмӱс медаль утып алған.
Хайдағ даа кӱрес марии тузында тувалар постарының чир-суғҷызы ӱчӱн матап «ағырчатханын» пілчебіс. Аннаңар Валерия Мистрикова 61 кг кӧдірімде кибіс ээзінең харбасчатханда, спортзалда улуғ суум-саам пасталыбысхан. Тоғазығ алтын медаль ӱчӱн парған нооза. Олаңай кӱресче саблығ спорт узы, амды тренер Лариса Ооржактың ӱгренҷізі Уранза Кужугет чиңіс тутхан.
Чир-суғҷыбыс Софья Захарова 69 кг кӧдірімде ӱзінҷі орын алған. Амды сыйыхтығ орыннарға сыххан кӱресчілерібіс Россия первенствозына тимненерлер.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде