КӦК ХАЙАДА АСФАЛЬТ САЛЫЛЧА
12.09.2017
Хабарлар
Хакасияның чолларын тыхтирынҷа программа хоостыра, Алтай аймааңдағы Кӧк хайа аалның Набережнай паза Зепёнай орамаларындағы чолларны нааҷылирына 5 миллион салковай позыдылған.
Пу кӱннерде Набережнай орамадағы чолны «Прогресс-М» ООО подряд организациязы тыхтабысхан. Амды чол хастада сай урыбызарға паза чолда танығлар сиип саларға халған.
6 сентябрьда Хакасияның транспорт паза чол хонии министрі Александр Попов Зелёнай орамада тыхтағ тоғыстарын сыныхтирға чӧрген. Амды анда чолның 80метр участогында асфальт салылча.
- Зелёнай орамадағы чолда оймахтарны тӱзедібізіп, асфальт тӧзепчебіс. Наңмырлар тохтирын сағаабыс. Амды чахсы кӱннер турза, 14 сентябрьға тыхтағ тоғыстарын тоос саларбыс, - теен «Прогресс-М» ООО-ның директор орынҷызы Константин Мирановский.
Александр Попов Константин Мирановскийге 20 сентябрьға теере пу чолны хайди даа иптеп саларға чахығ пирген.
- Тыхтағ тоғыстарын иртірердеңер чахығнаң Кӧк хайа аал чӧбі айланған. Че чуртағҷылар хайдағ орамаларда чолларны тыхтирын постары таллапчалар. Хакасияның транспорт паза чол хонии министерствозы чоллар тыхтирына субсидия пирче. Кӧк хайа аалдағы чолларны тыхтабысса, «Прогресс-М» организация Очыр аалдағы чолларны нааҷылир, - таныхтаан Александр Попов.
Зелёнай орамадағы чуртағҷы Любовь Пьянкинаның чооғынаң, пу чолда асфальт 30 чыл мының алнындох салылған.
- Кӧк хайада 1958 чылдаң чуртапчам. Ол туста мында чол чох полған. Нинҷе-де чыл пазынаң, чол иділіп, сай урылған, 1986 чылда асфальт тӧзелген. Чол нааҷылалчатханға піс, Зелёнай ораманың чуртағҷылары, ӧрінчебіс. Пістің орамада кӧп машина чӧрче, аннаңар чол чахсыполарға кирек, - теен Любовь Пьянкина.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде