ПАЛАА КІЧІГДЕ ХАЙЫҒ САЛАРҒА КИРЕК
18.08.2017
Хабарлар
Хакасия пазының администрация устағҷызы Валерий Денщиков Физкультурник кӱнінде прайзын ӱлӱкӱннең алғыстаан, чыылысхан улуссар улуғ нимес чоохнаң айланған. Анзы тиктең нимес.
Мының алнында Валерий Васильевич Хакасияның спорт министрі полып 8 чыл тоғынған. Аннаңар ағаа физкультурниктернің паза спортсменнернің ағырсымнығ сурығлары чахсы таныс. Оларны пӧгерінде Валерий Денщиков позының хай пірее сағыстарынаң ӱлескен.
- Аарлығ нанҷылар! - айланған Валерий Васильевич ӱлӱкӱн араласчыларынзар. - Ирткен сигіс чыл аразына піс, хада-пірге тоғынып, кӧп ниме идерге маңнанғабыс. Аннаңар прайзыбысха даа ӧрінҷең паза поғдархаҷаң сылтағ пар. Пӱӱнгі кӱнде прай даа аал-городтарда чахсы спортзаллар, стадионнар пар. Олар тӱзімніг тоғынчалар, чонға туза ағылчалар.
Санапчам, амғы туста Хакасияның спорт министерствозында уғаа кӱстіг, чахсы ӧме тоғынча. Оларға киртінерге паза ізенерге чарир. Анда пӧзік пілістіг специалисттер чыыл парған. Аның ӱчӱн прайларыңа улуғ алғызым читірчем паза ирткен сигіс чыл аразына хада тоғынарға киліскеніне ӧрінчем.
Чазырбаспын, пӧкчең сидік сурығлар полғаннар. Че піс, оларның алнында тохтабин, тӧдір пазынмин, тоғызыбысты толдырғабыс, республиканың таңдағы кӱнінеңер сағынғабыс. Хакасияның пазы, регионның правительствозы, Ӧӧркі Чӧбі, спорт министерствозы, аймахтар пастары, спорт школаларының устағҷылары - прайзыбыс пір кӧстегнең республиканы тилідеріне тоғынчабыс. Пӱӱнгі кӱнде физкультура паза спорт олаңай ла хайығ тартпинча, ідӧк кӧп аймах социальнай сурығларны пӧгерге полысча: кізілернің хазыхтарын пиктепче, чииттерні Чир-суубысты арачылирға тимнепче, чонның маң тузын тузалығ иртірерге полысча.
Мында иң ӧӧн хайығны чиит тӧлні хазых ӧскіреріне айландырарға кирек. Палалар 12-13 частығда физкультураа паза спортха сын оңдайнаң тартыл сыхсалар, олар хаҷан даа арағанаң алай наркотикнең нанҷыласпастар. Аннаңар олғаннарның маң тустарын тузалығ иртірерінде піс полыс пирер оңдайлығбыс. Постарыбыс таа іҷе-паба полчабыс. Палаа кічігде хайығ саларға кирек.
Ол сылтағнаң онарлап, чӱзерлеп, муңарлап палаларны спортнаң айғазарға кӧӧктіріп алзабыс, чиит тӧлні хазых чуртасха кӧніктірербіс. Нинҷе кӧп кізі спортнаң айғасса, хазыхтарын пиктезе, анҷа асхынах улус имҷілерзер полызығ сурап айланар. Прайзыбыс чахсы пілчебіс, пу уғаа сидік паза аар тоғыс. Аны толдырчатханнарға улуғ алғызым читірчем.
Ӱлӱкӱннең алғыстапчам паза прайларыңа пик хазых, наа чиңістер, часка алғапчам.
Автор :
Валерий ДЕНЩИКОВ, Хакасия пазының администрация устағҷызы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде