ХОРҒЫСТЫҒ СААЙ ХАҶАН ДАА ХАТАЛБАЗЫН
18.08.2017
Хабарлар
Сойан-Сус ГЭС-та хорғыстығ саай пол парғаннаң 8 чыл ирт парған. 2009 чылның 17 августында хазнабыстың иң улуғ гидроэлектростанциязында хорғыстығ кирек пол парған.
Саайда 75 кізінің чуртазы ӱзілген. Оларның кӧбізін Майна поселоктаң ырах нимес сыыратта чыып салғаннар. Пу орында 2009 - 2010 чылларда саайда ӱреен тоғынҷыларға чарыдылған часовня турғызылған. Чыл сай 17 августта мында служба иртірілче, чуртастары ӱзілген кізілернің туған-чағыннары оларны сағысха кирчелер.
Пу хорғыстығ саай орындағы чуртағҷыларның на нимес, че ідӧк прай Хакасия чуртағҷыларының сағызында ӱрге халған. Республиканың устағ-пастаа даа аннаңар ундутпинча. Киҷее, хумартхылас кӱнде, Хакасия пазы Виктор Зимин, часовнязар киліп, орындағы чуртағҷыларнаң хомзыныстарынаң ӱлескен.
- 17 август улуғ хомзыныс, хумартхылас кӱні. Аны ундударға чарабас. Мындағ саай хаталбас ӱчӱн, прай кӱзібіс саларға кирек. Полған на устағҷының алнында тоғынҷыларын хайраллир пӧгін турча. Пӱӱн пазох ол туста устағҷылар полған кізілернің адынаң туған-чағыннарын чідір салған кізілернің алнында пыросынчам, - теен Виктор Михайлович.
Служба ирткен соонда Хакасия пазы хумартхы тассар чахайахтар салған. Анаң хумартхы таста аттары пазылған тоғынҷыларның чағыннарынаң тоғасхан. Оларны чир-суубыстың сын оолларын ӧскір салған ӱчӱн алғыстаан.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде