«ХАРАТАСТЫ СИДІК ТУСТА ТАСТАБАСПЫС...»
18.08.2017
Хабарлар
ПУ НЕДЕЛЯДА ХАКАСИЯНЫҢ ПАЗЫ ВИКТОР ЗИМИН ТОҒЫС ЧОРЫҒЫНАҢ ХАРАТАСТА ПОЛ КИЛГЕН. ОЛ ЗНАМЕНСКАЙ ПАЗА ШИРОКАЙ ОРАМАЛАРДА СУҒ ПИРҶЕҢ ТРУБАЛАРНЫ САЛАРЫНҶА ТОҒЫСТАР ХАЙДИ ПАРЧАТХАНЫН СЫНЫХТААН, ЧУРТАҒҶЫЛАРНАҢ ТОҒАСХАН. ІДӦК ВИКТОР МИХАЙЛОВИЧ ХАРАТАСТЫҢ ӦӦН ПАРКЫНДА ПОЛ КИЛГЕН, ЧОЛ ТЫХТИРЫНҶА ТОҒЫСТАР ХАЙДИ АПАРЫЛЧАТХАНЫН, ГОРОДТЫҢ ХАЛЫХ ЧУРТАЗЫНА УҒАА КИРЕК ОБЪЕКТТЕРНІ КӦРГЕН. ПАЗА «ЕНИСЕЙ» ТРАССАДА ЧОЛНЫ НААҶЫЛИРЫНҶА ТОҒЫСТАР АПАРЫЛЧАТХАН ПРИГОРСК АЛНЫНДАҒЫ УЧАСТОКСАР ЧӦРГЕН. ХАЙДИ ТАНЫХТААН ХАКАСИЯ ПАЗЫ, АМ ХАРАТАСХА СИДІК ТУСТАРДА РЕСПУБЛИКА АНЫҢ ЧУРТАҒҶЫЛАРЫН ТАСТАБАС ПАЗА ХАЙЫҒ ЧОХ АРТЫСПАС.
Таныхтирға кирек, пу тоғыс чорығының программазы улуғ полған. Иң пурун Хакасия пазы кӧп палалығ сӧбірелер алған чир участоктары орныхчатхан орамаларҷа суғ пирҷең трубалар хайди салылчатханын кӧрген. Харатас пазының тоғызын толдырчатхан Ольга Леонтьеваның чооғынаң, чуртағҷылар суғ сығарҷаң скважиналарда ісчең суғ хомай качестволығ полчатханына хоптанғаннар. Аннаңар мында городтың ӧӧн суғ пирҷең сетьнең палғалыстығ суғ пирҷең труба саларға чарадығ алылған. Тоғыстар 2013 чылдаң апарыл сыхханнар, анаң, ахчанаң сидіксіністер полғанда, олар тохтадыл парғаннар. Пӱӱл орындағы чуртағҷыларға суғ пирерінҷе тоғыстар узарадылғаннар. Че мында чуртапчатхан Елена Попова пу сурығ хоостыра Россия президентінзер айланған соонаң ағаа кӧп хайығ айландырыл сыххан. Итсе, республиканың пӱдіріг паза чурт-коммунальнай хонии министерствозының таниинаң, тоғыстар ол даа айланыс чох апарылчатханнар. Амғы туста министерство суғ пирер трубаларны саларына 2,5 млн. салковай субсидия пирген, Харатас администрациязы пу пӧгінге 131, 5 муң салковай позытхан.
Тоғыстарны апарарынҷа чӧптезіг Хызылчардағы «СИБКОМСТРОЙ» ООО-наң иділген. Аны хоостыра 602 метр суғ пирҷең труба салылар паза оларны кӧрҷең 5 колодец турғызылар. Пӱӱнгі кӱнге 596 м трубалар салыл партыр, оларны городтың ӧӧн суғ пирҷең сетьтеріне піріктіреріне паза колодецтерні турғызарына тимнепчелер.
Проект хоостыра ам тимнелчеткен участокта суғ алҷаң 3 колонка турғызылар тіп кӧрілче. Че чуртағҷылар полған на туразар суғ пирер оңдай чоғыл тіп хомзынғаннар. Виктор Михайлович, пу сурығны ӱзӱріп, чарадар оңдайларны табарға чахаан. Паза ол чуртағҷыларның хайиин тураларның ибіркізін иптіг тударға кирек полчатханына хайығ айландырған.
Чуртағҷыларнаң тоғасхан соонаң республика пазы Харатастың паркын кӧріп алған. Амғы туста пу парк автономнай учреждение полча. Таныхтирға кирек, ол городтың бюджедіне парыс ағылча, ідӧк позы ӧткін тиліпче. Парк тӧрт чардыхха чарыл парған: спорт, аттракционнар турғызылған, ландшафтнай паза сӧбіренең тус иртірҷең чардыхтар. Халғанҷызы сағам тимнелче, пӧгінде - бассейн турғызары. Мындағ пастағ Виктор Зиминнің кӧңніне кірген. Ол парктың устағ-пастаан аны тилідеріне республика бюджедінең полызығ пирілер тіп ізендір салған. Мындох Хакасия пазына Город ӱлӱкӱніне хығыртығ читірілген. Ол пайрамға хайди даа килербін тіп молҷаан паза республиканың культура министерствозы чуртағҷыларға Город кӱнін турыстығ иртірібізерге хайди даа полыс пирер тіп таныхтаан.
Тоғыс чорығы тузында Виктор Михайлович Юбилейнай орамада пол килген. Пӱӱнгі кӱнде мында чол тыхтирынҷа тоғыстар хыызында парча тиирге чарир. Пӱӱл чалбах ораманың кӧрімі тың алыс парарға кирек: чазағ чӧрҷең аллеяда тротуар плитказы алыстырылар, бордюрлар, сіреелер, чарытхы, нинҷе-де скульптура турғызылар. Хакасия пазы городтың чолларын тыхтирына ідӧк республика бюджедінең хоза ахча позыдарға чахығ пирген.
Республика пазы «Ягодка» олған садын хайығ чох артыспаан. Мында ол аның устағҷызынаң паза тоғынҷыларынаң тоғасхан. Пӱӱнгі кӱнде олған сады толдыра кӱзінең тоғынча, пеер 400-ке чағын олған чӧрче, мында 76 кізі істенче. Тоғынҷылар Виктор Михайловичті чарых, сіліг олған садын пӱдірерге полыс пирген ӱчӱн алғыстааннар, мындағ орында тоғынарға даа чахсы, хынығ тіп таныхтааннар. Паза аарлығ аалҷаа олған садында тоғынчатханнарның паза олғаннарның кӱзінең ӧскірілчеткен улуғ нимес ӱӱҷікті кӧзіт пиргеннер. Ол Виктор Зиминнің кӧңніне тың кірген, олған садының ибіркізі иптіг тудылчатханын, чахайах кӧп ӧскірілчеткенін таныхтаан.
Ідӧк Виктор Зимин чуртағҷыларны иргілен парған паза изелчеткен чурттардаң кӧзірер программаҷа пӱдірілген турада пол килген. Пӱӱнгі кӱнде ол прай тимде, тӱрчедең пеер 30-ха чағын сӧбіре кӧзер. Пеер кинек чуртағҷы кӧзер тіп кӧрілче, аннаңар мында ӧнетін оборудование турғызылған. Ол коляскалығ алай пасхысча сых полбинчатхан кізіні пастағы хадыл площадказына кӧдірер. Виктор Михайлович пуох программаҷа кӧскен хонҷых тураларда чуртапчатханнарнаң тоғасхан, олар республика пазына алғыс сӧстерін читіргеннер паза хай пірее читпестер парынаңар искіргеннер. Виктор Михайлович подрядчикке читпестерге, оларны чох идеріне хайығ айландырарға чахаан.
Халғанҷызынзар В.М.Зимин «Енисей» трассада чол тыхтирынҷа тоғыстарны кӧрерге пар килген. Амғы туста чол тӧзиріне тимнир тоғыстар апарылча. Пӱдірігҷілер таниинаң, олар хысхы-часхы хайди иртерін кӧрерлер, тӧзеен чолда читпестер ілезіне сығысса, асфальт чабар алнында оларны чох идерлер. Ідӧк трассаның пу чардығы нааҷылалған соонаң мында амғы тусха килістіре Ағбанзар, Ағбан пилтірінзер, Харатассар парчатхан чоллар тегілекти салылар.
Автор :
Татьяна КЫШТЫМОВА Сомнар Максим АХПАШЕВТИ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде