ПІСТІҢ ПӦГІНІБІС - ЧУРТАҒҶЫЛАРНЫҢ КИРТІНІЗІНЕ ТУРЫЗАРЫ
10.02.2017
Хабарлар
8 ФЕВРАЛЬДА ХАКАСИЯНЫҢ ӦӦРКІ ЧӦБІНІҢ АЛТЫНҶЫ ХЫҒЫРТИИ 35-ҷі СЕССИЯЗЫН ПАЙРАМНЫҒ ЧЫЫЛЫҒНАҢ АСХАН.
ОЛ ХАКАСИЯНЫҢ ӦӦРКІ ЧӦБІ ТӦСТЕЛГЕННЕҢ 25 ЧЫЛ ТОЛЧАТХАНЫНА ЧАРЫДЫЛҒАН. ПАЙРАМНЫҒ СЕССИЯНЫ АСХАН ПАРЛАМЕНТ КНЕЗІ ВЛАДИМИР ШТЫГАШЕВ. ТАНЫҒЛЫҒ ЧЫЫЛЫҒА ХЫҒЫРТЫЛҒАННАР ПАСТАҒЫ ХЫҒЫРТЫҒНЫҢ ДЕПУТАТТАРЫ, ТОЛДЫРЫҒЛЫҒ ӰЛГӰ УСТАҒҶЫЛАРЫ, ІДӦК АНЫҢ ТОҒЫЗЫНДА АРАЛАСХАННАР ФЕДЕРАЦИЯ ЧӦБІНДЕГІ СЕНАТОРЛАРЫБЫС ВАЛЕНТИНА ПЕТРЕНКО ПАЗА ЕВГЕНИЙ СЕРЕБРЕННИКОВ.
УЛУҒ ААЛҶЫЛАР САНЫНДА ПОЛҒАН 1992 - 1997 ЧЫЛЛАРДА ХАКАСИЯНЫҢ МИНИСТРЛЕР ЧӦБІНІҢ КНЕЗІ ЕВГЕНИЙ СМИРНОВ. ХАЗНАБЫСТА ХОРЫЛЫСТЫҒ КИРЕКТЕР ПАРЧАТХАНДА, ВЛАДИМИР НИКОЛАЕВИЧКЕ ПАЗА ЕВГЕНИЙ АЛЕКСАНДРОВИЧКЕ НАА ЛА ТӦСТЕЛГЕН РЕСПУБЛИКАДА УСТАҒ-ПАСТАҒ ТОҒЫЗЫН АПАРАРҒА КИЛІСКЕН.
Россияның паза Хакасияның гимннері толдырылған соонаң, депутаттарға паза аалҷыларға «Чоннаң табылғаннар» кӧзідігні кӧзіткеннер. Ол республика парламентінің 25 чыл мының алнында пастаан тоғызына паза пӱӱн узаратчатхан киректеріне чарыдылған. Пу чыллар аразына республика парламенті кӧп аймах сурығларны пӧккен, че оларның ӧӧні - пӱӱнгі чуртасха тӧстег полчатхан чарадығларны алғаны, ол санда Хакасияның Конституциязын.
Че депутат полары - ол нымзах креслода одырары нимес! Ол нандырығлығ тоғыс, халых тоғызы. Депутат иң пастағызын табығҷыларынаңар, ағаа ӱн пирген чуртағҷылардаңар сағыссырирға кирек. Анзына.улуғ хайығны айландырған Ӧӧркі Чӧптің кнезі Владимир Штыгашев чооғында.
- Че прай хығыртығларны алза, пастағы ікі хығыртығның депутаттарына иң хатығ оңдайларда тоғынарға киліскен, - таныхтаан парламент устағҷызы. - Олар республиканьң ӧӧн законнарын алғаннар: Ӧӧркі Чӧптеңер, Правительстводаңар, хазна танығларынаңар, пос устаныстарынаңар, республика чонының тіллерінеңер. Пу тоғыс ӱчӱн пастағы хығыртығ депутаттарын алғыстирға сағынчам. Олар Ӧӧркі Чӧптің мыннаң мындархы тоғызына право тӧстеен тимнеп пиргеннер .
Пӧзік паалаға турысча Хакасияның министрлер чӧбінің кнезі Евгений Александрович Смирновтың, Хакасия Правительствозының пастағы кнезі Алексей Иванович Лебедьтің тоғызы. Республика чуртағҷыларының чахсы чуртазы ӱчӱн, Хакасия Правительствозы паза Ӧӧркі Чӧбі кӧп чыллар пілізіп тоғынчатханы ӱчӱң алынҷа алғызымны читірчем Виктор Михайлович Зиминге.
Владимир Николаевич парламент алған тузалығ законнарны паза халғанҷы чылларда полған сағыбаан саайларның салтарларын чох идерінҷе табырах алылған чарадығларны адағлаан.
Ідӧк республика парламенті улуғ тоғыс апарча федеральнай кіннең паза пасха регионнарның закон сығарҷаң ӱлгӱ органнарынаң. Федеральнай синде республика сурығларын пӧгерге хабасчалар Хазна Думазының депутады паза Федерация Чӧбінің кізілері. Владимир Николаевич прай чылларда тоғынған депутаттарға паза сенаторларға алғызын читірген.
- Пістің пӧгінібіс - табығҷыларны Хакасия чуртағҷыларының киртіністеріне турызары, - тіпче парламент устағҷызы.
- Парламент тоғызын азых апарарға. Ӱзӱріглерге профессионал эксперггерні паза халыхтар кізілерін хығырарға киректі салтарында пірге тоғыстаң прайзына туза поларі чуртағҷылар хабазиинаң тоғынчатхан депутаттарға даа, чонға даа. Чооғымны пурунғы философ Платонның сӧстерінең тоозарға сағынчамі «Чахсы пастағ - чарым кирек» . Минің кӧрізімнең, пу турыстыра пастағ полған. Че піске алнынзар хаалирға кирек.
Владимир Штыгашев Хакасияның Ӧӧркі Чӧбінің Аарластығ пічіктерін читірген Александр Крутиковха, ол 1992 - 1997 чылларда прокуратура кнезі полған, паза Евгений Смирновха.
Ӧӧркі Чӧпті пайрамнығ чылынаң алғыстааннар Хакасияның пазы Виктор Зимин, Федерация Чӧбінің кізілері Валентина Петренко, Евгений Серебренников паза Хакасияҷа Ӧӧн федеральнай инспектор Виктор Чернышев. Виктор Михайлович чооғында алынҷа законнарны таныхтаан, ол санда льготалығ чуртағҷыларға пӱдірінерге чир участоктарын тикке пирердеңер. Республика пазы Хакасияның Ӧӧркі Чӧбінің аппарат тоғынҷыларына Аарластығ пічіктер читірген.
Валентина Петренко республика парламентіне Федерация Чӧбінің кнезі Валентина Матвиенконың алғыс пічиин хығырған паза Владимир Штыгашевке, Лариса Карповаа, Сергей Комаровха Федерация Чӧбінің алғыстастарын читірген. Андағох сыйыхтарны читірген Евгений Серебренников Светлана Могилинаа паза Геннадий Цыпышевке.
Евгений Смирновнаң Александр Крутиков І990 чылларны, ол тустағы тоғыс оңдайларын, сағысха киргеннер. Смирновтың чооғынаң, ол туста сессиялар тоозылбас митингтерге айлан парҷаңнар, че, андағ даа полза, піс пір чӧпке килерге, килістіре чарадығ аларға ӱгреніп алғабыс. Евгений Александрович пӱӱнгі парламентке тоғыс салтарлары чуртағҷыларның кӧңніне киліс турзын тіп алғаан.
Пайрамнығ чыылығ соонаң «25 чыл: киҷее, пӱӱн, таңда» сомнар кӧзідии азылған. Сомнарда республика парламентінің чуртазы пастағы тоғыс кӱнінең пӱӱнге теере кӧзіділче. Пу кӧзідіг республикадағы муниципалитеттерде кӧзіділер.
Тынағ соонаң Хакасияның Ӧӧркі Чӧбі сессия тоғызын узаратхан. Кӱн суриина 17 сурығ сығарылған. Депутаттар секретариат устағҷызын алыстырғаннар. Владимир Нырцев ирткен сессияда экологияҷа, чир-чайаан ис-пайынҷа паза аннаң тузаланарынҷа комитет кнезіне табылғаннаңар, аны секретариат устағҷызы орнынаң суурарға киректелген. Позыдылған орынға ікі кандидат сығарылған: ЛДПР фракция устағҷызы Валерий Старостин паза «Россия Коммунисттері» партиядаң Денис Бразаускас. Депутаттарның ӧӧн чардығы Старостинге ӱнін пирген.
Алында пастағы хығырығда алылған закон проекттері, пӱӱн читіре ӱзӱріліп, халғанҷы хығырығда алылғаннар: «Хакасияның хазна сыйыхтарынаңар алынҷа чарадығларға алызығлар кирердеңер» паза «Хакасияның Халыхтар палатазынаңар» Хакасияның законынзар алызығлар кирердеңер». Хакасия Правительствозы нинҷе-де закон проектінең сыххан. Оларның пірсі «Хакасияда промышленность политиказынаңар» закон проектін республиканың экономика министерствозы тимнеен. Парламенттің экономика политиказынҷа, промышленностьча, пӱдірігҷе паза транспортча комитет кнезі Валерий Мешанковтың чооғынаң, проектті читіре тимнирге кирек, аннаңар аны пастағы хығырығда ла аларға сурынған. Іди аны мартта хатап ӱзӱрерлер.
Депутаттар республиканың 2017 паза кӧрілген 2018-2019 чылларға бюджедінзер алызығлар кирібіскеннер. Алызығлар хоостыра парыстар 889 миллион салковайға хызырылғаннар, хорадығлар 110 миллион салковайға хозылғаннар, дефицит, тізең, уламох улуғ пол парған - 5 миллиард 280 миллион азыра салковай. Че бюджетче паза налог политиказынҷа комитет кнезі Сергей Комаровтың таниинаң, мартта депутаттарға пу чылның бюджедіне улуғ алызығлар кирерге киректелер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде