ПІРДЕЕЗІНЕ СИЛДІРБЕЕН «ПОДДУБНЫЙ» —ХАКАСИЯДА
08.07.2016
Хабарлар
Хакасияда «Сибер Ил» чоннар аразындағы культура-турист форумының тоғызында кӧп саблығ кізі араласча. Пӱӱл оларның санында актер, режиссер паза продюсер Михаил Пореченков полған. Анзы тиктең нимес, пӱӱл тиксі Россияда Кино чылы чарлалған.
Россияның саблығ артизі Михаил Пореченков «Кино регионнарнын, национальнай паза культура танығлары хоостыра кӧріснең» секция тоғызынаң устаан паза Хакасияның чуртағҷыларына «Поддубный» фильмні кӧзідерге ағылған. Киносеанс Ағбанда Пастағы май площадьында ирткен неделяда полған.
Михаил Евгеньевич килген чонны чылығ удурлаан. Ол теен: «Пу кино - сірердеңер! Мында чоох кӱстіг, сын кізілердеңер парча, хайзылары сіліг Ада-чир суубыста чуртапчалар. Мин санапчам, ӧӧн матырда полған на кӧрігҷі позының хылиин танып алар».
Пу сӧстер соонаң киносеанс пасталыбысхан. Хоос фильмде саблығ кӱресчі Иван Поддубныйның чуртазынаңар чоох парча. Кӧрігҷілер кино пастыра піліп алғаннар, хайди аалдаң сыххан чиит оол, француз кӱрезінҷе нинҷе-нинҷе хати тилекей чемпионы атха турызып, Россияны ырах сабландырған.
«Мині хайхатхан Поддубныйның чуртазы, - таныхтаан Михаил Евгеньевич. - Фильмде піс аның чуртазының ӱзіктерін алып алғабыс, саблығ кӱресчінің хылиин кӧзіт пирерге кӱстенгебіс».
Иван Поддубныйны чахсы кӧзіт пирерге пӧгініп, чайаачылар улуғ тоғыс ит салғаннар. М.Е.Пореченков, рольға тимненіп, кӱннің сай спортзалзар харбазарға чӧрҷең полтыр. Хоос фильмні Севастопольда, Феодосияда, Москвада, Киевте, Санкт-Петербургта, Парижте паза Нью-Йоркта суурғаннар. Кино прокатха 2014 чылда июльда сыххан, чарым чыл аразына 184 миллион салковай тоғынып алған. Олох чыл режиссер Глеб Орлов суурған кино Россияның иң артых фильмнерінің санына кірген.
Кино кӧрерге кӧп кізі килген. Кӧрігҷілернің аразында Ағбанның на нимес, Харатастың, Саяногорсктың, Ағбан пилтірінің паза Пиинің чуртағҷылары полғаннар. Кӧбізі саблығ артистті пос хараанаң кӧріп аларға иткен. Киносеанс тоозылған соонаң, кӧрігҷілер фильмні ӱр ӱзӱргеннер, постарының сағыстарынаң ӱлескеннер. Хакасия правительствозының Республика кӱніне чарыдылған сыйии чонның кӧңніне тың кірген.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде