САБЛЫҒ МОДА ЭКСПЕРТІНЕҢ ТАНЫСТЫЛАР
08.07.2016
Хабарлар
Хакасияда "Сибер Ил" чоннар аразындағы культура-турист форумы ирт парды. Аның тоғызы нинҷе-де чардыхха чарылған, араласчылар аймах площадкаларда тоғынғаннар. Чииттер Ағбанда Н.Ф.Катановтың адынаң хазна университедінде "Культура индустриялары - чииттернің чуртас кӧрімін паза оңдайларын тӧстеҷең тиріг" секцияда чыылысханнар паза "Чиңіс" культура кінінде кинолекторийге чӧргеннер.
ХГУ-да оларнаң форумның ӧнетін аалҷызы, чоннар аразындағы мода аналитигі, "Модный приговор", "Неделя стиля" телепередачаларның эксперті Александр Хилькевич тоғасхан. Пу тоғазыға Хакасияның чииттер пірігістерінің кізілері, ХТИ-ның, ХГУ-ның студенттері, Ағбан, Харатас городтардағы чайаачы олғаннар кіннерінің тоғынҷылары, Ағбан пилтірі, Пии, Ис пилтірі ааллардаң аалҷылар хығыртылғаннар.
Чииттер площадказының тоғызын Ағбандағы музыка колледжінің студенттері, чатханнаң ойнап, асханнар. Оларның соонаң С.П.Кадышевтің адынаң культура кінінің "Алтыр" мода театрының абахайлары, хакас паза орыс чонның стилизованнай кип-азаан кӧзідіп, сценаа сыхханнар. Хайдағ чапсыстығ, пай тонанҷыхтығ полғаннар олар!
Паза чыылысханнарны НФ.Катановтың адынаң хазна университедінің ректоры Татьяна Краснова удурлаан. Татьяна Григорьевна "Сибер Ил" форумньщ чылдан,чылға ӧсчеткенін, тиліпчеткенін таныхтаан. Ол чииттерні мындағ улуғ мероприятиеде ӧткін араласчатханнары ӱчӱн махтаан паза алғыстаан.
Пайрамнығ чардых тоозылған соонда, Александр Хилькевич лекциязын пастаан. Ол чыылысхан чонға посты ипти тудынардаңар, чахсы паза килістіре тонанардаңар чоохтаан паза сомнар кӧзіткен. Хайди ол таныхтаан, аның чӧптері ипчілерге дее, иреннерге дее туза полар. Позының чооғында Александр Владимирович мода ниме полчатханынаңар, ол нимее киректелчеткенінеңер искірген. Тоғысха кірерге алай ба кирек тоғазыға парарға сағынчатханнарға хайди орта тонанарынаңар чӧптер пирген.
Александр Хилькевичтің лекциязын алза, пӱӱнгі кӱнде модада кізінің чир-чайааннаң пирілген сілии. Иртіре сырланғаны, арған тырғах-кірбіктер амғы тусха килістіре нимес. Кізі кеен,сіліг поларға сағынчатса, посты паза кип-азаан арығ тударға, чахсы истең тігілген тонанҷыхты кизерге сіренерге кирек. Че иптіг кӧрімнің ӧӧні - чалахай кӧңніліг полары, чоннаң изеннес турары. Кізі сырайын кӱлініс чарытчатса, пасхазы даа ағаа чахсы хайар. Ідӧк Александр Владимирович килчеткен кӱскӱ-хысхыда хайдар кип-азах модаа кірерінеңер тренд-семинар иртірген. Залда одырчатхан чон аны хынып истіпчеткен.
Чииттер площадказында паза пip саблығ аалҷы араласхан. Ол республиканың музей-культура кінінің проектін тимнеен архитектор Валентин Гаврилов. Ол чыылысханнарға музей комплексi хайди пӱдірілгенінеңер улуғ нимес видеоролик кӧзіт пирген, проекті хайди тимнелгенінеңер чоохтаан.
Чииттер секциязының тоғызы чахсы ирткен, полған на араласчы хайдағ-да наа, чапсых ниме піліп алған. "Сибер Ил" культура-турист форумының тӧстегҷілерін мындағ чапсых тоғазығларда аралазып алар оңдай пирчеткен ӱчӱн алғыстирға ла халча.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде