МАЛ ТУТСАҢ, СӰТ, ИТ ПОЛАР
08.07.2016
Хабарлар
Хакасияның аал хонии паза ас-тамах министерствозында республика пазының орынҷызы Иван Вагнер сӧбіре ферма пастарына грант хабазиина сертификаттар читірген. Чиңісчілер аразында 11 фермер полған.
- Алғыстапчам сірерні улуғ чиңізіңернең, - айланған мал ӧскірчеткеннерзер Иван Эрвинович. - Сірер грант хабазиина марығны иртібіскезер, че улуғ тоғысты ам на пастапчазар тиирге чарир. Тиктең нимес мында аймах-пасха кӧстеглернең тоғынчатхан фермерлер чыылыс парғаннар. Прай кӧстеглер республикаа кирек, аның экономиказына улуғ туза ағылчалар. Мыннаң мындар сірерге маңнаныстығ тоғынарға алғапчам.
Хакасия пазының орынҷызы Иван Вагнер хазнаның ахчалығ полызиин бизнес-план хоостыра хорадарға киректелчеткеніне хайығ айландырған.
- Бизнес-план - ол олаңай ла пічік нимес, - теен республика пазының орынҷызы, - ол - хорадығлар планы.
Аны истіп, фермерлер бизнес-планнарын чахсы пілчеткеннерін таныхтааннар. Алғыс сӧстерінең паза чӧптерінең фермерлерзер ідӧк Хакасияның аал хонии министрi Игорь Гердт айланған:
- Пу стол кистінде одырчатханнар прайзы чиңісчілер. Сірернің піреезі аал хониина 15 - 20 чыл пир салған, аннаңар сірер пу хабазығны аларға иң турыстыра полчазар. Олох туста ундубаңар, сірер федеральнай ахчанаң тузаланчазар, аның ӱчӱн хатығ нандырығда сірер ле нимес, ідӧк министерстводағылар, аннаңар сурығларнаң піссер айланыңар. Піс хайдағ даа сурыға нандырығ табарға полызарбыс.
Чоохтирға кирек, хазна хабазииның сині сӧбіренің бизнес-планынаң, хосхан ахчазынаң палғалыстығ полған. Марығда аралазар ӱчӱн, аның бизнес-планда корiлген хорадығларының 40% поларға кирек. Ағбан пилтіріндегі Баинов аалдаң Виктор Шулбаевке (сомда пастағы рядта оң саринда - авт.) 4 миллион 901 муң салковай пирілген. Фермер малны итке ӧскірче. Алында хастар тутхан. Ам пазох хас тударға сағынча. Хабазығ ахчазына хас фермазын пӱдірерге, инкубаторлар аларға пӧгінче.
Асхыс аймаандағы Индіркі Тӧӧдең Мамышевтер сӧбірезінің грант сині - 2 миллион 313 муң салковай. Ферма пазы Артём Евгеньевич полча, ағаа ипчізі Альбина Юрьевна (сомда пастағы рядта сол саринда - авт.) чахсы полысча. Сӧбіре фермазы маллар, хойлар паза аттар тутча. Грант алған ахчаа герефорд порода мал паза техника аларға сағынчалар.
Республикада сӧбіре фермаларының тилізіне 71 миллион 633 мун, салковай хазна хабазии кӧріл парған. Пірее идінҷектернің грант сині 10 миллион салковайға тиңнелген. Пӱӱнгі кӱнде аал хонииндағыларға пу иң улуғ хазна хабазии. Аннаң пасха наа ла тоғынып пастапчатханнарға гранттар пирілче. Пӱӱл пу полызығны 60 кізі алған. Ідӧк маллар, хойлар паза аттар ӱчӱн субсидия тӧлелче, техника паза мал алған хорадығларның чардығы айландырылча.
- Тиксі хабазығны алза, аалда чуртирға, пос хониин тилідерге оңдайлар пар, - сағызынаң ӱлесче Альбина Юрьевна. - Посха ла кӱстенерге кирек. Позың кӱстенмезең, кем ниме сағаа пирер!
Сағынчам, уғаа орта сағыс. Аалдағы кізі позының істенізінең не чуртапча. Мал тудар - сӱт, ит, хайах полар, ӱӱҷік тамаан одыртар -чир тамаа, яблах полар.
Хакасия пазының орынҷызы Иван Вагнер, пӱӱнгі экономикадағы алызығларны ӱзӱріп, аал хониина хазна хабазии чылдаң чылға ӧзіп одырарына ізенчеткен сағызынаң ӱлескен. Аннаңар пӱӱнгі чиит фермерлерге кӱстеніп тоғынарға кирек. Пірее чыл пазынаң оларға сӧбіре фермазын тилідерге хазна хабазиин аларға теес чидер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде