ХАКАСИЯ ЧАХСЫЛАРНЫҢ САНЫНДА
08.07.2016
Хабарлар
Сӧбірелер хайда чахсы чуртапчатханын паалир 2015 чылдағы рейтингче Хакасия Россия регионнары аразында 20-ҷі орында пол парған. Ол оңдайнаң, республика, 2014 чылнаң тиңнестірзе, тӧрт орынға пӧзік кӧдіріл парыбысхан.
Істезіглерні Рейтинг РИА иртірген, Росстаттың саннары хоостыра. Рейтинг методиказы иң кирек ниме-нооларны алған соонаң региондағы палалығ сӧбіренің нинҷе ахча халчатханын санға алча.
Таныхтирға кирек, Хакасияда сӧбірелерге, ол санда кӧп палалығларға, хабазарынҷа кӧп тоғыс апарылча. Пӱӱн республикада 80 муңҷа палалығ сӧбіре чуртапча, оларның читі муңы артиинаң - кӧп палалығ. Хакасияның істеніс паза социальнай тиліс министерствозының саннарынҷа, 24 муңҷа пала кӧп палалығ сӧбірелерде чуртапча. 2008 чылнаң тиңнестірзе, ікі хати кӧп.
Мындағ салтарларға ӧӧнінде кӧп палалығ сӧбірелерге социальнай хабазығ пирілчеткені паза Хакасия пазы Виктор Зиминнің чахиинҷа ол пӧгіннерге республика бюджедінең ахча кӧптең кӧп позыдылчатхан сылтаанда читкебіс. 2008 чылда кӧп палалығ сӧбірелерге хабазарына 11,2 миллион салковай позыдылған полза, 2016 чылда ол пӧгіннерге 184 миллион салковай артиинаң позыдылары кӧрілче.
Чыл сай, 2011 чылдаң пасти, Хакасияда читі паза аннаң даа кӧп чазы читкелек палалығ улуғ сӧбірелерге машина сыйлалча. Амғы тусха теере 30 сӧбірее автотранспорт читірілген.
Аннан, пасха Хакасиядағы кӧп палалығ іҷе-пабалар ӱзінҷі пала тапханы алай пала идінгені ӱчӱн 100 муң салковайға іҷе капиталының региондағы сертификадын алар праволығлар. «Кічіг аалларны хайраллиры паза тилідері» программа хоостыра кічіг ааллар чуртағҷыларына ол социальнай хабазығ - 200 муң салковай.
Кӧп палалығ сӧбірелерге хабасчаң ӧӧн оңдайларның пірсі - коммунальнай полызығлар ӱчӱн тӧлегні льготалығ иткені. Ідӧк андағ сӧбірелердегі школаа чӧрчеткен палалар пір іҷе-пабанаң хада городтағы, город хыриндағы паза аймах істіндегі маршруттарда тикке чӧрер праволығлар.
Ікістер алай пір саңай ус пала тапхан сӧбірелер хайығ чох халбинчаларох. Алында пір саңай ӱс пала тӧріткен сӧбірелер 100 муң салковай пip хати паза 4611 салковай ай сай алҷаңнар. Тӧлегні ӧскірібізер пастағнаң Хакасияның пазы Виктор Зимин ирткен чылның декабрьында халых чонзар айланыснаң чоох тутчатханда сыххан.
Республикада 1 декабрьда ӱс ікіс пала паза пip сӧбіренің nip саңай ӱс пала тӧреен нооза.
- Ӱс пала пip саңай тӧреені Хакасияда нинҷе-де чыл чох полған, мында пір саңай ӱс хызыҷах. Ол чахсы танығ, ӱс пала тӧріткен іҷе-пабаны хайди таныхтирын сағын кӧрелер, - теен Виктор Зимин андада.
Іди «Хакас Республикада кӧп палалығ сӧбірелерге социальнай хабазығ пирҷең оңдайлардаңар» республика законынзар алызығлар кирілген. Аны хоостыра амды пір туста ӱс пала тапханнарға пір хати миллион салковай пирілер паза ай сай 10 муң салковай тӧлелер.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде