КІЗІ ЧУРТАЗЫН АЛ ХАЛАР ӰЧӰН
15.06.2016
Хабарлар
![КІЗІ ЧУРТАЗЫН АЛ ХАЛАР ӰЧӰН КІЗІ ЧУРТАЗЫН АЛ ХАЛАР ӰЧӰН](/upload/iblock/e1e/e1ee5c8fba765eb7363485f538c75681.jpg)
Тиксі тилекейдегі донор кӱні 14 июньда таныхталча. Донор кӱнін таныхтирынаңар сурығны чоннар аразындағы нинҷе-нинҷе организация кӧдірген, ол санда Чоннар аразындағы Хызыл Кірӧс Федерациязы паза Хызыл Чамдых ай. Тиктең нимес 14 июнь донор кӱніне таллалған. Пу кӱнде кізі ханының группаларын асхан кізі, имҷі Карл Ландштейнер тӧреен.
Хакасиядағы аарластығ донорларға хайдағ социальнай хабазығ пирілчеткеннеңер, кем донор пол поларын піліп алар ӱчӱн, Хакас Республиканың хан кінінзер парып, аның ӧӧн имҷізі Геннадий Николаевич Русаковнаң паза донорлар пӧлии устағҷызы Ольга Владимировна Плынинанаң чоохтазып алғам.
Геннадий Николаевичтің чооғынаң, республиканың хан кіні имнег учреждениелерінің чахығлары хоостыра тоғынча. Хайдағ группалығ хан киректелчеткенін санға алып, донорлар таллалчалар.
- Пірееде хан пирерге тӧӧй ханнығ кізі кӧп киледір. Че ол группалығ хан пардаңар, піс прайзының ханын олох кӱн албинчабыс. Амғы туста Хакасияда донорлар чидісче. Хан читкіҷе хайраллалча. Хайдағ группалығ хан киректелчеткенін піске имнег учреждениелері искірчелер. Удаа учурабинчатхан хан чох полза, піс андағ ханнығ донорны тілепчебіс. Ханны сыбыра пирчеткен донорлардаңар искіріглер пістің кінде чыылча. Хаҷан удаа учурабинчатхан паза кӧп хан киректелзе, піс ӧткін донорларзар айланчабыс, - теен Геннадий Николаевич.
- Республикадағы хан кінінде кӱннің 35 кізінің ханы алылча. Сынында кізі кӧп арах киледір, че донорға прайзы чарабинча. Донор полар ӱчӱн, кізі хайди даа хазых поларға кирек. Че ор хазых таа кізі донорға чарабинча. Хан пирерге килген кізілернің аразында ор хазых кізілер илееде, че кізінің кӧдірімі чидіспинчетсе, ол донорға чарабинча. Кізінің кӧдірімі 58 килограммнаң тӧбін полза, аннаң хан албинчалар. Донордаң пір саңай 450 миллилитр хан алчалар. Кӧдірімі чидіспинчеткен кізідең ол син хан алғаны кӧпке саналча. Кізінің ханы кӧдірілчетсе алай тӱсчетсе, ол ідӧк донорға чарабинча. Хан пирер алнында, кізі чахсы узуп аларға, азыранмасха кирек, - теен Ольга Владимировна.
![](/2016-06-15_161401.jpg)
Донорларның кӧбізі, 65 - 70 % - иреннер. Анзы пілдістіг. Иреннернің хазии сала пик. Олар ӧткін арахтар. Донорның кӧбізі - 30 час ас парған кізілер.
Мының алнында 65 часха чит парған кізее донор поларға чарадылбинчатхан. Амғы туста Хакасияда 60 час ас парған нинҷе-де донор пар.
Ольга Владимировнаның чооғынаң, ханын 40 хати пирген кізее «Россияның аарластығ доноры» ат пирілче. Ідӧк пу атха плазманы 60 хати пирген кізі турысча. Иреннерге пір чыл аразына 5 хати хан пирібізерге чарадылча, Сағам Хакасияда 1700 азыра кізі - Россияның аарластығ доноры. Андағ донор пенсияа сых парза, ағаа «Істеніс ветераны» ат пирілче. Аарластығ донорларға
чылда пір хати 12 муң азыра салковай тӧлелче. Хан пирген кізее ікі тынағ кӱні пирілче.
Пірее регионнарда аарластығ донорларға хоза льготалар пирілчелер: хан пирген кӱнде автобустарда, троллейбустарда тикке алай льготалығ чӧрерге чарадылча. Полған на регионда донорларға пирілчеткен социальнай хабазығ пасхалалча.
Хакасияның хан кінінде Донор кӱнінде иң ӧткін донорларны, «Россияның аарластығ доноры» удостоверение паза танығ читіріп, чеестепчелер. Олох кӱн «Дорожное радио» пастыра оларны алғыстапчалар.
Хакасияда Россияның аарластығ донорларының пірсі полча Светлана Вениаминовна Сагалакова. «Россияның аарластығ доноры» атха ол 2006 чылда турысхан, 1984 чылда ол пастағызын на хан пирген.
- Ол туста мин «Саянобувь» маймах тікчең фабрикада тоғынғам. Тоғыстаң пос киректері хоостыра сурынып аларға сидік полҷаң, аннаңар, тынағ кӱннерін алып алар ӱчӱн, хан пирібісчеңмін. Мин сӧбіреде иң улии полчам. Пис туңмам пар. Пабам ирте ӱреп парған. Ол ӱреен соонаң, іҷем тың ағырыбысхан, чадыға кір парған. Туңмаларым хоных хон сыхханда, тынағ кӱннері кирек полғаннар. Хан пирібіссе, тынағ кӱннерін алып алҷаңмын. Ол туста аарластығ донор полардаңар сағынмаам даа, хан пирерге ле чӧр турҷаңмын. Піреезіне хан кирек пол парза, сығдыратчаңнар, мин, тоғыр полбин, хаҷан даа удур парҷаңмын. 2006 чылда мағаа удостоверение читірілген. Аны мағаа Хакасияның Ӧӧркі Чӧбінің депутады Сергей Комаров читірген. Хан пирерге сыбыра чӧрчем. Мин сизінгенде, хан пиргені хазиима даа чахсы теелче. Чылда 5-6 хати хан пирерге киліс парча. Пірееде, парарға сағынмазам даа, хан кінінзер хығырыбысчалар. Хан пирерге сурынзалар, ам даа ынапчам, - теен Светлана Вениаминовна.
С.В.Сагалакова Пии аймаандағы Кічіг Нонып аалда тӧреен-ӧскен. Кічіг Нонып аал -хайдар-хайдар хайхастығ чир. Мының алнында андағы чон чахсы, кізее паарсах полҷаң тіп тӧреен чиріне поғдархапча ол. 1980 чылда Светлана Вениаминовна Ағбанзар кӧскен. Анаң Сергей Егорович Сагалаковнаң, танызып, хоных хон салған. Ирепчі ікі оол ӧскір салған. Сағам Светлана Вениаминовна республиканың имнег туразының ас-тамах тимнеҷең блогында повар полып істенче. Анда ол он пизінҷі чылы тоғын парир.
СӦС СОО: Хакасияда аарластығ паза ӧткін донорлар илееде. Тың ағырчатхан кізее, ханнарын пиріп, полые пирерге хаҷандаа тимде полчатханнары ӧріндірче. Учёнайлар танығларынаң, сыбыра хан пирчеткен кізілернің хазии пик поладыр.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде