ШКОЛА ТООСЧАТХАННАР АҒБАНДА ЧЫЫЛЫЗАРЛАР
15.06.2016
Хабарлар
Киҷее Хакасияның пазы Виктор Зимин республика правительствозының чыылиин иртірген. Чыылығда Белоруссиязар чорыхтың салтарлары, школа тоосчатханнарға ӱлӱкӱн идері, республикадағы чолларның тыхтаа паза «Сибер Ил» чоннар аразындағы форумға тимненіс ӱзӱрілген.
Виктор Зимин чыылығның тоғызын Минсксер чорыхтың салтарларынаң пастаан. Хакасияның делегациязы анда ирткен фррумнаң пу чағында ла айланған. Ӧӧн салтарларның пірсі - Хакасия паза Беларусь пірге тоғынардаңар чӧптезіг иткені. Аны хоостыра экономика, культура паза социальнай сфералардағы хайызығлар тыыдылары кӧрілче.
- Ідӧк піс аал хонии техника паркына сервистіг полызығлар пирерінҷе чӧптезіглер апарғабыс, - таныхтаан республика пазы. - Чағынғы туста Белоруссиядаң специалисттер килерін сағыпчабыс.
Хакасиядағы аал хонии техниказының 64 проценті Беларусьта сығарылған. Оларны тыхтирынҷа тоғыс, тізең, тӱзімніг нимес парчаттыр. Удаа хоза частьтар чидіспинче осхас. Аннаңар ол сидіксіністі пӧгерге кӧстег тутчалар.
Правительствоның ирткен чыылиинда Виктор Зимин республиканың школа тоосчатханнарына ундулбас ӱлӱкӱн ит пирерге чахығ пирген полған. Пу сурығҷа тоғыс хайди парчатханынаңар Хакасия пазының орынҷызы Ирина Смолина чоох тутхан.
- Хакасияның школа тоосчатхан чииттеріне ӱлӱкӱн 26 июньда Ағбанда Пастағы май площадьында иртер, - искірген ол.
Ӱлӱкӱнге прай Хакасиядаң школа тоосчатханнар килерлер, 1960 выпускник полар. Оларнаң хада город-аймахтардаң ӱдес чӧрҷең 200 кізі паза 300-че іҷе-паба килер тіп кӧрілче. Пастағы май площадьында оларға улуғ концерт кӧзіділер. Че хайдағ музыканттар килерi чазытта халған. Анзы школа тоосчатханнарға чапсых сыйых ползын. Че сахталған фейерверк полбас. Фейерверктернең аймах саайлар пол парчатханда, Россияның ӱгредіг министерствозы оларнаң тузаланмасха чӧп пиртір. Хакасияда фейерверк орнына тигірзер кӧп ӧңніг шарлар позыдылар.
Хакасияның транспорт паза чол хонии министрі Александр Егоров республикадағы чоллар хайди тыхталчатханынаңар искірген. 2016 чылға республика бюджедінде чоллар тыхтирына 176 миллион салковай салыл партыр. Ол ахчаа 27 километр чол нааҷылалар паза нинҷе-де тахта тыхталар тіп искірген министр.
«Сибер Ил» чоннар аразындағы форум пӱӱл алтынҷызын иртірілер.
28 июньнаң 3 июльға теере иртер форумға тимненіс хайди парчатханынаңар Хакасияның культура министрі Светлана Окольникова паза правительство аппарадының устағҷызы Лариса Карамчакова сан пиріснең чоох тутханнар. Оларның искіриинең, форумға прай даа ниме тимде, аалҷылар Москвадаң, Казахстаннаң, Киргизиядаң, Хыдаттаң паза Азербайджаннаң килерін сағыпчалар. Форумда аймах-пасха секциялар тоғынарлар, мероприятиелер иртерлер. Иң не танығлығ полар республиканың наа улуғ музей-культура кіні ізиин асханы. Анда форум тузында аймах кӧзідіглер иртер.
Хакасияның пазы «Сибер Ил» форумның тузазын хати таныхтаан.
- Форумны сынап танып сыхтылар, - теен Виктор Зимин. - Хакасиязар форумға килчеткен эксперттернің саны паза сині піске региондағы тархын-культура ис-пайын хайраллирынҷа сурығларны турғызарға, оларны пӧгерге оңдай пирче.
Ідӧк ол форумда Хакасияа тузалығ сурығлар пӧгіл парчатханына хайығ салған. Кӧзідімге республиканың музей-культура кіні пӱдірілчеткенін, Ағбандағы аэропорт нааҷылалчатханын ағылған. Пӱӱнгі форум андағох тузалығ полар тіп ізенче Хакасияның пазы. Чоох парча музей-культура кінінде классика музыказын толдырҷаң концерт залын пӱдірердеңер.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде