ААЛ ХОНИИ ТЕХНИКАЗЫНҶА ПАЛҒАЛЫСТАР ТЫЫДЫЛАР
15.06.2016
Хабарлар
Россия паза Беларусь регионнарының форумында Хакасияның пазы Виктор Зимин Белоруссиядағы паза Сибирьдегі регионнарның экономика палғалыстарына алынҷа хайығ салған.
Ол пірге тоғыстың иң не кирексіністіг кӧстеглері техникаа сервистіг паза гарантиялығ полызығлар пирерін тилідері, дилер кіннерін алғыдары паза ӱгредіг учреждениелерін ол наа техниканаң тиріндірері полча.
Анзы тиктең нимес, «Минің иргі трактор пар, че мин наа «Беларус» алып аларға сағынчам», - піди пасчалар бизнес-проекттерінде наа ла тоғынып пастапчатхан фермерлернің кӧбізі, аал хонии техниказын аларға тимдезін кӧзідіп. Аалдағылар ӧӧнінде Белоруссияда сығарылған техникаа хынчалар. Пілдістіг нооза, улуғ нимес хоныхтың ээзінің немец алай америка тракторын аларға кӱзі читпес. Кӧп кӧстегліг «Беларус», тізең, уғаа килістіре.
Хакасияның аал хонии техниказы паркында 1400 азыра трактор, 275 тамах чығҷаң паза 55 азырал чығҷаң комбайн саналча. Оларның 64 %-і Беларусьтағы «Гомсельмаш» заводта сығарылған алай олох заводтың Россиядағы «Брянсксельмаш» предприятиезінде чыылған. Постарын чахсы кӧзіткеннер «Полесье» КДП-3000 прицепке хаптырылчатхан комбайннар, «Полесье» К-Г-6 - пос чӧрчеткен комбайннар паза пресс-подборщиктер.Аалдағылар оларны кирексіпчелер.
Республикадағы аграрийлер «Гомсельмаш» заводнаң 2006 -2009 чылларда ӧткін палғалыс сыхханнар: предприятиезер республиканың аал хонии министерствозының, дилер предприятиелерінің устағҷылары паза аймах-пасха хоныхтарның кізілері кірчеткен делегациялар кӧп хати чӧргеннер. Чазыларда паза фермаларда тоғынчатхан техниканы тыхтирынҷа паза наа алылған техникаа гарантия полызығларын пирерінҷе тоғыс пар сыххан. Ідӧк механизаторларның ӱгредии апарылған.
Наа аал хонии техниказын садызып аларына бюджеттең субсидия пирілче, іди техниканың турчатхан паазының 50 %-і айландырылча. 2007 - 2015 чылларға ол кӧстеглерге республика паза федеральнай бюджеттердең пір миллиардча салковай тӧлел парған. Тамах паза азырал чығҷаң комбайннар садиинаң паза оларны тыхтирынаң дилер «Союз» ООО айғасча. Белоруссияда сығарылған тракторлар садиинаң паза гарантиялығ тыхтағнаң «Сентябрь» ООО паза «Галактика» ООО ТД (Минсуғ г.), «Союз» ООО (Ағбан г.) айғасчалар.
Пӱӱнгі кӱнде Белоруссияда сығарылған машиналарға сервистіг паза гарантиялығ полызығлар пирері чахсы ла нимес: хоза частьтар, агрегаттар аймаа читкіҷе нимес, аннаңар тыхтағ тузы ӱр арах парыбысча. Ол сурығларны пӧгерін регион устағҷызы Виктор Зимин паза Хакасияның аал хонии министрі Игорь Гердт постарына алып алғаннар.
- Белоруссия техниказынаң піс хаҷанох тузаланчабыс. Амғы туста хоза частьтарын піссер читірерінҷе сидіксіністер пар. Пу сурығларҷа тоғыныбысхабыс, дилер кіннерін азарын кӧр салғабыс. Олар Хакас Республикада алай Хызылчар крайында, Хызылчарда, Новосибирскте азылар, - таныхтаан Игорь Гердт.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде