ХАКАСИЯ ПАЗА БЕЛАРУСЬ ПІРГЕ ТОҒЫНАРЛАР
15.06.2016
Хабарлар
Россия паза Белоруссия регионнарының III форумы тоғызының ӧӧн салтары Беларусь Республиканың паза Россияның нинҷе-де субъекті аразында пірге тоғынардаңар чӧптезіглер полған. Форумның пленарнай чыылииның пастағы чардығы ол чӧптезіглерде хол саларынаң тоозылған.
Пайрамнығ церемонияны Беларусь паза Хакасия асханнар.
Россияның Федерация Чӧбінің кнезі Валентина Матвиенконың паза Беларусь Республиканың Национальнай Чыылии Чӧбінің кнезі Михаил Мясниковичтің кӧзіне садығ-экономикаҷа, наука-техникаҷа паза культураҷа пірге тоғынардаңар пастағы чӧптезіг Беларусь паза Хакас республикалар правительстволары аразында иділген.
Чӧптезігде Хакасияның пазы Виктор Зимин паза Беларусь Республиканың премьер-министрінің орынҷызы Наталья Кочанова хол салғаннар.
Аның соонаң, Белоруссиядағы хабарҷыларнаң чоох алызып, Виктор Зимин таныхтаан:
- Чӧптезіг алнында улуғ тоғыс иділген, хайзын Хакасия паза Беларусь правительстволарының кізілері толдырғаннар. Кӧзідімге, минің чахиим хоостыра пістің экономика блогы Белоруссиядағы коллегаларнаң хада пістің чирлернің чуртас-экономика тилізіне иң не теелчеткен кӧстеглерҷе пірге тоғынар оңдайларны таап тоғынған. Амды олар официальнай пічікнең тыыдыл парғаннар. Анзы Хакасияа паза Беларусьха пірге проекттерін чуртасха киреріне наа оңдайлар асча.
Форумның тоғызында Хакасияның экономика министерствозының, промышленность паза чир-чайаан ис-пайы министерствозының, аал хонии паза ас-тамах министерствозының, культура министерствозының устағҷылары араласханнар. Олар Белоруссиядағы коллегаларнаң паза партнер полар кізілернең хада кӧп чӧптезіглер апарғаннар. Таныхтирға кирек, Хакасия делегациязына ол палғалыстарны тыыдарында Россия Федерациязының Беларусьтағы посольствозының пастағы хачызы Татьяна Псарёва ӧткін полысхан, ол нинҷе-де чыл мының алнында Хакасияның экономика министерствозынаң устаан нооза.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде