ЧОЛ ЧАХСЫ - ЧОРЫХ НИИК
15.06.2016
Хабарлар
АСХЫС АЙМААНДАҒЫ ПИРІКЧУЛ - ТӦӦ ПАЗЫ ААЛЛАРНЫ ПІРІКТІРЧЕТКЕН ЧОЛНЫ ТЫХТИР СУРЫҒ ХАҶАНОХ ТУРҒАН ПОЛҒАН. ПӰӰЛ ХАКАСИЯ ПАЗЫ ВИКТОР ЗИМИННІҢ ЧАРАДИИНАҢ РЕСПУБЛИКАНЫҢ ТРАНСПОРТ ПАЗА ЧОЛ ХОНИИ МИНИСТЕРСТВОЗЫ «ХАКАСАВТОДОР» УЧРЕЖДЕНИЕНЕҢ ХАДА ПУ ЧОЛДА ТЫХТАҒ ТОҒЫСТАРЫН ПАСТАДЫЛАР.
ЧОЛ ТОҒЫСТАРЫ ХАЙДИ ПАРЧАТХАНЫН СЫНЫХТАП, «ХАКАСАВТОДОРНЫҢ» СПЕЦИАЛИСТТЕРІ ИРТКЕН НЕДЕЛЯДА ОЛ ОРЫНДА ПОЛ КИЛГЕННЕР. ЧОЛНЫ «ДСК» ООО ПОДРЯД ОРГАНИЗАЦИЯЗЫ ИПТЕПЧЕ. ПУ ОРГАНИЗАЦИЯНЫҢ ИҢ ОПЫТТЫҒ ТОҒЫНҶЫЗЫ - ПРОКОПИЙ ИДИМЕШЕВ (сомда).
Хайди чоохтапча «Хакасавтодор» учреждениенің чолларны пӱдірерінҷе пастых орынҷызы Андрей Будянский, чолны алғыдыбызар ӱчӱн, чолҷылар амды чол хыриндағы ағастарны чилегелерінең хада хыйа алчалар. Чол арығлал парза, аны тиңнепчелер паза ӱстӱнзер тастар урчалар.
- График хоостыра хысхы пасталғалахха пастағы асфальт салыл парарға кирек. Пу тоғыс килчеткен чылда узарадылар. Пирікчул - Тӧӧ пазы чолда асфальт ӱс чылға салыл парарға кирек, - чоохтапча Андрей Иванович.
Пирікчул - Тӧӧ пазы чолдағы тыхтағ тоғыстарына ахча республика бюджедінең позыдылча. Амды подряд организациязы 1,8 километрде чол нааҷылапча. Ол чол кизегіне 68 миллион салковай пирілче. Аннаң андар 2,4 километр чолны, тізең, пасха подряд организациязы нааҷылир. Пӱӱл тиксі 4,2 километр чол салыл парарға кирек.
Пирікчул - Тӧӧ пазы чолнын, кирексінізі улуғ, Ол 10 азыра аалны піріктірче. Олар - Палыхтығ суғ, Неожиданнай, Писхамҷы паза даа пасхазы. Пу чолдаң пасха чонға паза чӧрҷең чол чоғыл. Ідӧк чыл сай хысхызын сананаң чыларға Россияның піріктірілген командазы Тӧӧ пазындағы спорт комплекссер тренировкалар иртірерге килче. Аннаңар Пирікчул - Тӧӧ пазы чол пӧзік синде поларға кирек.
«ДСК» ООО подряд организациязының иң улуғ паза иң опыттығ тоғынҷызы - Прокопий Серафимович Идимешев. Ол, 66 чазын толдырыбысхан даа полза, ам даа істенче.
- Хаҷан-да тоғызымны тохтадарға иткем, че хада тоғынчатхан арғыстарым мині аннаң андар істенерге чӧптеп алғаннар. Піс чолда сигіс кізі тоғынчабыс. Чииттер кӧп. Оларға чолны хайди орта саларға чӧптер пирчем. Мин, тізең, чолзар тастарны хай син саларын кӧрчем. Чолзар тастарны кӧп алай ба асхынах салыбыссаң, ол кӧні полбас, - чоохтапча Прокопий Серафимович.
Прокопий Серафимович Идимешев чол тоғызында 20 азыра чыл істен парир. Ол - чайаачы кізі, Ағбандағы музыка училищезін тоосхан.
- Мин позымны баянистке, кларнетистке, саксофонистке санапчам. Амғы тоғызым чайаачы полбаза даа, сарнирға тың хынчам, - кӱлініп чоохтапча ол.
Пирікчул - Тӧӧ пазы чолҷа хаҷан даа кӧп машина ойлат чӧрче. Пірееде чол саайлары даа пол парча. Амды, тыхтағ тоғыстары иділ парзалар, чол алғыдыл парар паза кӧні полар.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде