Частушка кiзi кöңнiн кöдiрче
Фестиваль. Сiлкер айының ортызында С.П.Кадышевтiң адынаң чон чайаачызы кiнiнде «Битва частушечников» марығ ирткен.
Пылтыр ол Хакасия пазы Валентин Коноваловтың чахии хоостыра улуғ частығ чуртағӌыларны регионның халых паза культура чуртазына тартар пöгiннең пастағызын на иртiрiлген. Амды пос кöңнiнең тöстелген ансамбльлар сценада iкiнӌi хати тоғастылар. Чайаачы иирнi регион устағӌызы Валентин Олегович асхан.
– Фестивальның аарлығ араласчылары паза кöрiгӌiлерi, пу чахсы марығ кибiрге кiр парир. Мында улуғларыбыс постарының чайаачыларын кöзiтчелер паза, Хакасияның культура чуртазында öткiн аралазып, чииттерге кöзiдiм полчалар. Пӱӱл Сöбiре чылы чарлалғаны танығлығ. Частушка iдöк cöбiре кибiрлерiн хайраллирына кöстелген. Ол кiзi кöңнiн кöдiрчеткен фольклор сарығы полча. Пiс частушкаларны сарнирға, тилiдерге кирекпiс, – таныхтаан В.О.Коновалов.
Пӱӱл «Битва частушечников» марығда читi öме араласхан. Олар Ағбан паза Абаза городтардаң, Асхыс, Пии, Алтай, Шира аймахтарынаң полғаннар. Сарынӌы чон «Минiң тöреен чирiм – минiң частушкам», «Частушкалар чааға парчалар» паза «Иб аразындағы частушкалар» номинацияларға чарылғаннар.
Пастағы номинацияны Ағбан городтың «Медуница» ансамбльы асхан. Оларның частушкалары Хакас чирiне паза республиканың ööн городына чарыдылғаннар, кiчiг чир-суубысты поғдархаснаң махтааннар. Абазаның «Таланты Абазы» ансамбльы пастап Туланы, Саратовты, Великий Новгородты, Волгоградты, Москваны, Санкт-Петербургты паза Россияның пасха даа саблығ городтарын адап ырлаан. Анаң олар частушкаларынаң Хакасияа, Ағбан городха чидiп алғаннар. Абаза городха, тiзең, иң кöп частушка чарытханнар. Асхыс аймааның «Калинушка» ансамбльы, хормачы частушкалар тимнеп, кöрiгӌiлернi ээреде хатхыртхан. Чиис пызырӌаң устарға чӱленiп алған артисттер, чарба ӱгредеңер, потхыдаңар, айраннаңар, хуйғадаңар сарнааннар. Холларында ағас самнахтар тудынып, оларны удур-тöдiр хаңыстырып, тохлат салып одырғаннар. Асхыстағыларның толдыриинда «Одыр-одыр чей iзерге, самоварым хайнапча...» хакас частушка полғанох.
«Частушкалар чааға парчалар» номинацияда ансамбльлар Илбек Ада чааға чарыдылған частушкаларны толдырғаннар. Итсе, пылтырғы фестиваль-марығда öнетiн чаа операциязынаңар частушкалар полғаннарох. Пӱӱл ырӌылар ол сурыға теелбееннер. Чайаачы öмелер армиябыстың кӱзiн паза махачы оолларны махтап ырлааннар. Пу номинацияда пiрее ансамбльлар чааӌы кип-азахтығ сценаа сыхханнар. Пии аймааның орыс сарын паза теелбек ансамбльының араласчылары частушкаларын чааӌыни осхас ӱс пулуңнығ пiчiктерге пазып алтырлар. Сöcтерiн ундубыссалар, чаӌында кöрiп алчатханнар.
«Иб аразындағы частушкалар» номинация «Йо, кiзöм, кiзöм!», «Йо, хазинеӌеем!» паза «Минiң сöбiрем улуғ» темаларға чарылған. Ол кiчiг марығ чiли ирткен. Анда iкiлер ансамбль, сценазар сығып, теести сарнасхан.
Фестиваль-марығ iкi час артиинаң парған, че ол тус пiлдiртпин ирте халған. Салтарлар идiлгенде, Асхыс аймааның «Калинушка» ансамбльы «Минiң тöреен чирiм – минiң частушкам» паза «Частушкалар чааға парчалар» номинацияларда I орын алған. Олох ансамбль «Иб аразындағы частушкалар» номинацияда III орынны холға кирген.
– Пiстiң ансамбль iкi чыл мының алнында тöстелген. Андар тынағдағы ипчiлер чöрчелер, прай 12 кiзi. Позым Калинин аалдағы «Колосок» олған садында чуртас тооза iстенгем. Ам, сала пос тус парда, ансамбльзар сарнирға чöрчем, – теен «Калинушка» чайаачы öменiң араласчызы Лидия Асочакова.
Сом Альбина Чистогашевани
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |