Омсктағы театр - Хакас чирінде
05.05.2023
Хабарлар
Омсктағы хазна драма театры "Улуғ гастрольлар" федеральнай программа хоостыра Хакас чирінде ааллапча. 5-7 майда ыраххыдаң килген артисттер пістің чир-суғҷыларыбысха А.М.Топановтың адынаң Хакас национальнай драма театрында "Свободная пара", "Путешествие Нильса с дикими гусями", "Отцы и дети", "Джейн Эйр. На краю бездны" ойыннарны кӧзідерлер.
Аны хоостыра Хакасияның культура министрі Светлана Окольникова пресс-конференция иртірген.
- Хакасия чыл сай "Улуғ гастрольлар" федеральнай программада араласча. Аны РОСКОНЦЕРТ Россияның культура министерствозы хабазиинаң иртірче. Пістің театрларыбыс хазнаның аймах городтарынҷа гастрольларнаң сыбыра чӧрчелер. Ідӧк Хакасияда Россияның иң чахсы театрларын удаа удурлапчабыс. Пӱӱн пісте Омсктағы "Пятый театр" ааллапча. Аннаң хада 2008 чылдаң сығара пик ынағласчабыс. 15 чыл мының алнында "Нымах" кӧклӧ театры оларзар чапсых ойыннар ал чӧрген. Омсктағылар, тізең, піссер килгеннер. Олар Хакасияда иртірілчеткен "Чир Чайаан" фестивальда араласханнар. Пӱӱн піс пазох тоғасчабыс. Ағбан город кічіг дее полза, че чуртағҷылар аалҷыларны хаҷан даа паарсаснаң удурлапчалар, - таныхтаан министр.
Чылығ тоғазығда араласханнар Омсктағы "Пятый театрның" ӧӧн режиссёры Максим Кальсин, Омск облазы культуразының саблығ деятельі Мария Долганева паза артисттер. Аалҷыларны удурлаан А.М.Топановтың адынаң Хакас драма театрының устағҷызы Владимир Чустеев.
Таныхтирға кирек, Омсктаң Хакасиязар илігҷе артист килген.
5 майда 13.00 часта гастрольлар тоғызы "Путешествие Нильса с дикими гусями" (6+) кӧгліг ойыннаң азылған. Автор Сельма Лагерлеф полча, режиссёр-постановщик - Евгения Никитина. Ӧӧн матыр Нильсті чиит артист Станислав Горенбахер ойнапча. Ол улуғларның чооғын испинчеткен оолах полча. Хынза, пораатайларны рогаткадаң атча, хынза, хоосханың тӱгін хырығыбысча. Аны кӧре, сӱмеліг кізі оолахтың хылии-оңдайын алыстырыбызарға сағыныбысча. Ол Нильсті, лилипутха айландырыбызып, сас хастарға одыртыбысча. Оолах чорыхта аймах хорғыстарға тоғасча...
Ағбан город чуртағҷылары олох кӱнде, 5 майда, 18.30 часта "Свободная пара" (18+) хынығ ойынны кӧріп аларлар. Режиссёр-постановщик - Андрей Корионов.
Iдӧк Омсктағы артисттер Хакасиязар "Отцы и дети" (16+) тун ойыннарын ағылғаннар. Спектакльны И.С.Тургеневтің романы хоостыра режиссёр Людмила Исмайлова турғысхан. Аны олар Хакас драма театрының сценазында 6 майда 17.00 часта кӧзідерлер.
7 майда 17.00 часта гастрольлар "Джейн Эйр. На краю бездны" ойыннаң чабылар. Аны режиссёр Максим Кальсин турғысхан. Пу спектакль "Иң чахсы театр тоғызы-2023" фестиваль-марығда кӧрігҷілернің чӱреен аптаан, аннаңар ӧнетін сыйыхха турысхан. Ойын Англия писательі Шарлотта Бронтенің "Джейн Эйр" саблығ романына тӧстене турғызылған. Кирек Англияда XIX чӱс чылда полча. Анда ӧкіс хызыҷахтың хыйаллығ чуртазынаңар чоох парча.
Таныхтирға кирек, "Улуғ гастрольлар" федеральнай программада аралазып, А.М.Топановтың адынаң Хакас драма театры Омсксар "Ханума", "Паба", "Хайди Иван Иванович Иван Никифоровичнең ыырлас парған" ойыннарны кӧзідерге парыбысхан.
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
