ПАСТАҒЫ ПАЛА – АЙМАХТА, ТӦРТIНҶI – СӦБIРЕДЕ
27.01.2023
Хабарлар
Кӧп палалығ
Алексей паза Саяна КОКОВТАР
Оларны аймах пазы Николай Чебодаев, Хакасия правительствозындағы ЗАГС комитедiнiң Таштып аймаандағы пӧлиинің устағҷызы Наталья Кутузова, Россия МВД-зының Таштып аймаандағы пӧлиинің устағҷызы Андрей Грачев, алғыстап, сыйыхтар, чахайахтар читiргеннер.
Аймах пазы Николай Васильевич позы даа кӱрген айының 1-ғы кӱнiнде тӧреен, аннаңар паланың тӧреен кӱнiн Наа чылнаң пiрiктiрiп таныхтирға килiзер тіп ачырғанған. «Че уғаа ӧрiнiстiг, хаҷан мындағ пик, ынағ сӧбiреде кӧп пала ах чарых кӧрче. Анда олар улуғ хыныста паза паарсаста ӧсчелер», – теен Николай Чебодаев.
Сынап таа, Коковтар сӧбiрезiнде Коляҷах тӧртiнҷi пала полча. Аның 9 частығ Александра пиҷезі, 7 частығ Кирилл, 3 частығ Георгий харындастары пар.
Оларның пабазы Алексей Николаевич полицияда изолятор пӧлиинең (ИВС) устапча, iҷезі Саяна Владимировна палалар тӧрiдер алнында пӧзiк ӱгредiг аларға маңнанған, банкта, имнег туразында тоғынған.
Чиит сӧбiре пір чыл мының алнында наа, сiлiг туразар кӧскен. Аны Алексей Николаевич пос холынаң паза туғаннар хабазиинаң пӱдiрген. Сӧбіренің ибі тағдағы наа орамада турча, улуғ кӧзенектең кӧрзе, прай Таштып аал харах алнында. Пастыхтарға сыйыхтатхан соонаң Коковтарзар ааллап сурынып алғам. Ибде чиит iҷе Саяна паза iкi палазы полғаннар. Иптiг кiзiлернең чоох алызарға хынығох.
– Позым мин Асхыс аймаандағы Ӱс чул аалдаңмын, хада хонғаным мындартын, Таштыпта iдӧк аның iҷе-пабазы Николай Никифорович паза Ольга Иосифовна Коковтар чуртапчалар. Кирексiнiс полза, хаҷан даа полыс пирерлер.
– Сiрер Алексейнең хайди танызып алғазар? Нименең ол Сiрернi аптапча?
– Пiс пиҷемнiң тӧреен кӱнiнде танысхабыс. Хада хонғаным уғаа нандырығлығ, iзестiг кiзi, пирген сӧзiн хайди даа толдырча. Мин ағаа, сӧбiре пазына чiли, iзенчем, че удур-тӧдiр чӧптезерге ундутпинчабыс, хада пӧгiннер турғысчабыс, хадох толдырыбызарға сiренчебiс.
Анзы пiлдiстiг, ынағ сӧбiреде ирепчi хаҷан даа удур-тӧдiр улуғласча, чӧптесче. Анзы чох пiр тiл табызарға сидiк.
– Саяна, чуртаста кем Сiрерге иң чахсы кӧзiдiм полча?
– Пабам паза iҷем. Владимир Петрович паза Раиса Васильевна Райковтар. Кiчiг тусты сағысха кирзе, пабам пiснең кӧп айғасчаң – хоостирға, уроктар паза аны-мыны идерге ӱгретчең, палыхтирға хада ал чӧрҷең. Iҷем кӧп хайығ салҷаң. Ол пiстi – ӱс хызын – тоғыс чох одырбасха ӱгретчең. Ам, тiзең, пiс хада хонғанымнаң палаларыбысты олох оңдайнаң ӱгретчебiс – улуғларны улуғлирға, чоох истерге, пос салынмасха.
Кӧп палалығ iҷе Саяна, пос тус чох таа полза, пос оңдайлығ садығнаң айғазарға маңнанча. Пiрее хаҷан ол пос киреен азып аларға сағыс тутча. Алексей туразын читiре иптеп одырча, иб аразында хайынча. Коковтар постары турыстыра даа кӧзiдiм пирчелер – хайди олғаннарны ӧскiрерге, ирепчее хада тудынарға, удур-тӧдiр улуғлазарға.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде