УДОБРЕНИЕЛЕР СЫҒАРЧАҢ ЗАВОД ПӰДІРИИ КӦРІЛЧЕ
11.02.2022
Хабарлар
Чӧптезіг. 9 февральда Хакасия пазы Валентин Коновалов паза Кемеровтағы «Сибтрейд» ООО-ның директоры Евгений Тырышкин «Аал хонии комплексін тӧстирі паза тилідері» проектті чуртасха кирерінҷе чӧптезігде хол салыбысханнар
ЧӦПТЕЗІГ ХООСТЫРА ХАКАСИЯНЫҢ ААЛ ХОНИИ КОМПЛЕКСІН ЧАРДЫХТИ ТИЛІДЕРІ КӦРІЛЧЕ. «СИБТРЕЙД» КОМПАНИЯ БОГРАД АЙМААНДА ФОСФОРИТ АНИРЫНҶА ПАЗА АННАҢ УДОБРЕНИЕЛЕР ТИМНИРІНҶЕ ЗАВОД ПӰДІРИИНІҢ ПРОЕКТІН ТИМНЕБІСКЕН. ТАНЫХТИРҒА КИРЕК, ПУ ЧАЛҒЫС НИМЕС ПРОЕКТ, ХАЙЗЫН КОМПАНИЯ ПІСТІҢ РЕГИОНДА ЧУРТАСХА КИРЕРГЕ ПӦГІНЧЕ. РЕСПУБЛИКАДА ІДӦК МАЛЛАРҒА ЧАРБА ТИМНЕҶЕҢ ЗАВОД ПӰДІРИИ, ААЛ ХОНИИ ТЕХНИКАЗЫН ТЫХТАҶАҢ ОРЫН ТӦСТИРІ, РАПС ХАЙАҒЫН ТИМНЕҶЕҢ ЗАВОД ПӰДІРИИ КӦРІЛЧЕ.
Фосфориттіг удобрениелер сығарӌаң завод пӱдірии - иң улуғ проект. Боград аймаандағы Кӧлліг Чорба аалдаң 3 километр оортах 1 миллион 350 муң тонна фосфориттіг ӱс орын табылған.
Валентин Коновалов паза Евгений Тырышкин, чӧптезігде хол салыбысханнарында, сағыс-кӧрістерінең ӱлескеннер. - Піс республикаа уғаа кирек «Аал хонии комплексін тӧстирі паза тилідері» проектте хол салыбысхабыс. Аны хоостыра фосфоритті аниры паза аннаң удобрениелер тимнирі кӧрілче. Таныхтирға кирек, фосфориттіг удобрениелер сығарызы республикаа ла нимес, ідӧк прай Сибирьге кирек. Андағ удобрениелер Сибирьде сығарылбинча, че ағаа улуғ кирексініс пар. Инвестор аал хонииның пасха даа кӧстеглерін тилідерге тимде. Піс ағаа хабас пирерге сағынчабыс. Пу проект уғаа кирек, аннаңар піс инвесторнаң хада пу чағында ол чуртасха кирілеріне ізенчебіс.
Фосфорит анирында инвестор прай экология кирексіністеріне тудынарға молчапча. Аал хониина хабазарынаң пасха, аалдағы чонға тоғыс орыннары полар, - таныхтаан Хакасия пазы Валентин Коновалов.
Евгений Тырышкиннің чооғынаң, завод пӱдірии ікі чыл ӱзӱрілген. Амды ол пу сағыс хайди даа толарына ізенче. Хакасияның аал хонии паза ас-тамах министрі Сергей Труфановтың чооғынаң, фосфориттіг удобрениелер ӧзімнер ӧскірерінде уғаа улуғ туза ағылчалар. Оларның полызиинаң ӧзімнер сығызын 20 - 30 % чахсыландырып аларға чарир. Хакасияа андағ 140 - 160 муң тонна удобрение киректелче, Сибирьдегі федеральнай округка - 1 млн 360 муң тонна. Амғы туста фосфориттіг удобрениелер Россияның кидеркі чардығында ла сығарылча. Сибирьдегілерге паза ыраххы востоктағыларға удобрениелерні андартын ағыларға килісче.
- Завод пӱдірии піске ниме пирер? Анзы бюджетке чылда 390 миллион салковай пирер. Завод Боград аймаанда санға алылар, аннаңар аймахха хоза ахча кіргені уғаа чахсы хабазығ полар. Ағаа хоза, предприятиеде 160 кізее тоғыс табылар.
Амғы туста Хакасия правительствозы федеральнай министерстволарнаң фосфорит анирына чарадығ аларынңа тоғыс апарча. Чыл тоозылғанҷа пу сурығ пӧгіл парарына ізенчебіс. Инвесторның чооғынаң, завод 2-3 айға пӱдіріл парар паза удобрениелер тимниріне оборудование хайдаң алары табыл парған. Амды завод пӱдірии хаҷан пасталары пістең паза федеральнай министерстволар хаҷан нандырығ пирерінең палғалыстығ, - теен Сергей Труфанов.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде