ЧОНҒА ХОРҒЫС ПОЛБАЗЫНА - УЛУҒ ХАЙЫҒ
12.01.2022
Хабарлар
Тоғыс салтарлары. Республикада сағыбаан саайлар полдыртпас паза оларның салтарларын чох идерінҷе пірге хазна системазының (РСЧС) ирткен чылдағы тоғыс салтарларын кӧрер мероприятиелер ирткен
ТЕХНИКА КӦЗІДИИ
Чыл сай Ағбанда Пастағы май площадьында чонны аймах хорғыстардаң арачылапчатхан службаларның техниказы паза оборудованиезі кӧзідіге сығарылча. Ам даа пу кӧзідігде кӧп техника полған: ӧрт ӱзірӌең автомобильлер, автоцистерналар, автокраннар, автовышкалар, аймах оборудованиеліг автобустар, дроннар паза даа пасха техника.
Хакасияның пазы Валентин Коновалов МЧС тоғынӌыларын, арачылағӌыларны паза РСЧС тоғызында араласчатхан ведомстволар кізілерін чахсы тоғыс ӱчӱн алғыстап, пӧзік чидіглер кӧзітчеткен тоғынӌыларға алғыстас пічіктерін читірген. Ідӧк чахсы тоғынчатханнарны сыйыхтааннар Ӧӧркі Чӧптің комитет кнезі Валерий Старостин, Хакасиядағы федеральнай инспектор Иннокентий Сайбараков.
МЧС-тың Хакасияӌа Ӧӧн управлениезінің пастығы Александр Мулл, службада чахсы кӧзідімнер кӧзітчеткен тоғынӌыларға теестегі нимес званиелер азынада пиріп, оларға наа погоннар читірген. Аның соонда ол Хакасия пазына паза устағӌыларға площадьта турғызылған техниканы кӧзіткен паза оларның тоғызынаңар чоохтаан. Мыннаң площадьтағы мероприятие тоозылған.
ЧЫЫЛЫҒ
Анаң правительство туразында РСЧС-тың ирткен чылдағы тоғыс салтарларын паалир алғым чыылығ ирткен. Анда араласханнар Хакасия правительствозының, Ӧӧркі Чӧбінің устағӌылары, министерство-ведомстволарның кізілері паза муниципальнай пӱдістер пастары. Арачылағ службаларының устағӌылары ирткен чылдағы тоғыс салтарларынаңар искіргеннер.
Іди 2021 чылда Хакасияда ікі сағыбаан хорғыс таныхталған. Майда, наңмырлар кӧп чаап, хар табырах хайылған сылтаанда, Ағбан суғ чайыл сыххан. Суғ, кӧдіріліп, 7 муниципалитетке кірген. Аның салтарларын чох идерінде 600-че кізі паза 230 техника араласхан, арачылағ паза тӱзедіг тоғыстары апарылған. Участоктардаң суғ насостарнаң хыйа ағызылған, дамбалар, чоллар тыыдылған.
Чайылчатхан суғдаң хыйалға кірген 1264 кізее кирек полызығ иділген, 25 сӧбірее ахчалығ полызығ пирілген. Прай андағ полызығларға 7 миллион 570 муң салковай позыдылған. Аның соонда даа чарғылар алған чарадығларӌа кізілерге 500 муң салковай тӧлелген.
Ікінӌі сағыбаан хорғыс декабрьда Таштып аймаанда полған. Анда алынӌа кізінің холында полған вертолет, сайбалып, тӱс парған. Аны техногеннай саайға санирға чарир. Ол вертолет Новокузнецктегі идінӌек Александр Говорның фирмазыни полтыр.
Муниципальнай пӱдістерде ӧрттер сығарбас профилактика тоғызы апарылған. Часхыда паза кӱскӱде ааллар ибіре ӧрттерні иртірбес полосалар тартылған, иргілері нааӌылалған, оларның тиксі узуны 1500 километрге читкен.
Хакасияның Ӧрттердең тоғыр службазына хазна программазы хоостыра кирек техника паза оборудование аларына 51 миллион салковай позыдылған. Ол ахчаа ӧрт ӱзірӌең автоцистерна, оперативнай автомобиль алылған, ідӧк Тойым аалда ӧрт ӱзірӌеңнерге наа депо пӱдірілген, аны ноябрьда асханнар. Ӧрт ӱзірӌеңнерге пос кӧңнінең полысчатхан командаларға хабазарына муниципалитеттерге 10 миллион салковай субсидия пирілген, ӧрттердең хорғыс полбазына - 6 миллион салковай.
Чайғыда суға сомар туста республикада 20 пляж азылған, оларда республика бюджедінің ахчазына 16 арачылағ посты тоғынған. Арачылағ посттарын тоғындырарға муниципалитеттерге 500 муң салковай позыдылған. Официальнай оңдайнаң тоғынған пляжтарда пір дее кізі суғда саайланмаан.
Город-аймахтарда Пірге дежурнай диспетчер службаларын (ЕДДС), чонға искіріглер читірер системаларны, 112 табырах полызығ службазын паза «Хорғыс чох город» системаны кирерін тилідер тоғыс узарадылча. 2021 чылда кирек оборудование паза техника аларына ЕДДС-тарға 5 миллион салковай субсидия пирілген. Алтай Республиканаң паза Хызылчар крайынаң 112 системанаң регионнар аразында піріктірер тоғыс толдырылған.
Чыылығда министерство-ведомстволарның, предприятие-организацияларның, орындағы пос устаныс органнарның устағӌыларына паза специалисттеріне алғыстас пічіктері читірілген, профессия узына марығлар чиңісчілері дипломнарнаң сыйыхтатханнар.
- Хакасияның правительствозы сағыбаан саайлар полдыртпас сурығларға сыбыра улуғ нандырығнаң хайығ айландырча. Наа чылға турғызылған пӧгіннер чахсы толдырыларына ізенчем. Олар толдырылза, республикада сағыбаан улуғ саайлар поларынаң хорғыс асхынах полар, андағ оңдайнаң Хакасия чонына хорғыс ағылбас тоғыс пӧзік синде апарылар, - таныхтаан Хакасия пазы Валентин Коновалов.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде