АҒБАН - БИЙСК ЧОЛҒА АХЧА ПИРІЛЧЕ
20.08.2021
Хабарлар
Чол пӱдірии. Хазнаның чуртас-экономика тилізіне тың кирек проекттерні чуртасха кирер пӧгіннең, чоллар пӱдіреріне паза тыхтирына Россия правительствозының резерв фондынаң Хакасияа 133 миллион салковай позыдылар
Андағ чахығда премьер-министр Михаил Мишустин хол салыбысхан. Аның алнында Хакасия пазының чахиинҷа федеральнай бюджеттең полызығ аларға сурыныс Россияның транспорт министерствозынзар ызылған. Федеральнай ахча Ағбан - Бийск транспорт коридорын табырах пӱдіреріне кӧстелче.
Пу улуғ проект хоостыра позыдылчатхан 133 миллион салковайның 76 миллионы Ағбан - Улуғ Ортон - Таштагол чолны пӱдіреріне парар. Хоза Междуреченсксер парчатхан Асхыс аймаандағы Тӧӧ пазы - Шора - Ызых хол чолның 23+130 км - 30+375 км участогы пӱдірілер. Анда апарылар тоғыстар 3 чылға кӧріл парғаннар, пӱӱл специалисттер чир тоғыстарын пастирлар.
Федеральнай ахчанын 57 миллион салковайы пасха пір участокка ызылар, хайзы ідӧк Ағбан-Бийск проектке кірче. Іди Асхыс аймаандағы Асхыс - Пирікчул - Тӧӧ пазы чолның 68 + 210 км - 73+000 км участогында тыхтағ тоғыстары узарадылар. Ам ол тоғыстар республика ахчазына апарылчалар. Пазағы чылда пу тоғыстарны тоос салар план тудылча. Таныхтирға кирек, 2011 чыл соонда проектке федеральнай бюджеттең ахча пирері тохтадылған, аны регион позының ахчазына апарған.
Ағбан - Бийск транспорт коридорын тӧстирі Россияның магистраль инфраструктуразын алғыдар планына кирілген. Ол «Кимдегі Сибирь» инвест-проекттің пірсі полча. Коридор Ӱстӱнзархы Сибирьнің инфраструктуразын тилідеріне ӧӧн хабазығ пирер. Ол пістің республиканы паза хонҷых регионнарны - Хызылчар крайын, Тываны, Кузбассты, Алтайны паза Алтай крайын - хазнаның чоллар сетьінең піріктірер, Ағбан - Бийск маршрут ӱс хати хызырыл парар (1200 км 435 км теере), ідӧк кӧні Хыдатсар паза Монголиязар чол азар. Наа маршрут Ӱстӱнзархы Сибирьде туризмні тилідер, экономика палғалыстарын алғыдар, товарлар садиин кӧдіреріне хабазар.
Автор :
Хакасия пазының паза Хакасия правительствозыныц пресс-службазы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде