Татарстанның артисттерi – Хакасияда
26.04.2024
Хабарлар
Россияның культура министерствозының чахиинаң «РОСКОНЦЕРТ» ФГБУК тӧстеен «Улуғ гастрольлар» федеральнай программа хоостыра, пу кӱннерде Хакасияда Татарстанның К.Тинчуриннiң адынаң драма паза комедия театры ааллапча, прай 32 театр тоғынҷызы, ол санда 23 артист.
Ыраххы республикадаң килген аалҷыларны А.М.Топановтың адынаң Хакас драма театрының директоры Владимир Чустеев паза артисттер «Ағбан» аэропортта удурлааннар.
Хосхар айының 25-ҷi кӱнiнде «Улуғ гастрольлар» программа хоостыра пресс-конференция ирткен. Анда Хакасияның культура министрi Светлана Окольникова, Хакас театрның устағҷызы Владимир Чустеев, ӧӧн режиссёр Тимур Казнов паза Татарстан Республика театрының директоры Фанис Мусагитов хабарҷыларның сурығларына нандырғаннар.
– Хакасия «Улуғ гастрольларда» чыл сай араласча. Пӱӱл республикабыстың прай тӧрт театры паза филармониязы пу программаа кирiлген. Ӱр ниместе А.М.Топановтың адынаң Хакас драма театры Хазан городтаң айланған. Амды Татарстанның Карим Тинчуриннiң адынаң театры позы пiссер килдi. Олар мында ӱс кӱн изере ойыннар кӧзiдерлер. «Читiген» театр Грозный городсар учухча, андағы театр – пiссер. М.Ю.Лермонтовтың адынаң Орыс драма театры Курск городсар чорых тутча, курсктағылар – пiссер, «Нымах» кӧклӧ театры Санкт-Петербургсар парча, оларның Большой театры – пiссер. Хакас филармониязының артисттерi «Зори здесь тихие» операны Карелиязар апарчалар. Карелияның музыка театры iдӧк Хакасиязар чидер. Мин «Улуғ гастрольлар» программаның тӧстегҷiлерiне алғызым читiрчем. Аны хоостыра республика чуртағҷыларының тиксi хазнадағы театрларның спектакльларын, концерттерiн кӧрiп алҷаң оңдай пар, – таныхтаан Светлана Окольникова.
– Светлана Анатольевнанаң чарасчам, сынап таа кiзiлер Татарстан театрының ойыннарын кӧрерге ӧнетiн Хазанзар парбастар. Аннаңар театрлар пiди ааллас чӧрчеткенде, орындағы чуртағҷыларның пасха чонның культуразынаң танысчаң оңдайы пар. К.Тинчуриннiң адынаң драма паза комедия театры Хакасиязар пастағызын на килдi. Пiс тӧрт спектакль ағылғабыс: «Студенческий договор. Наши дни», «Волшебная арена», «Первое представление» паза «Ашина». Iзенчебiс, мыннаң мындар Татарстанның паза Хакасияның театрлары улам пик палғалыс тудар.
Хакас театрының ойыннары Хазан город чуртағҷыларының кӧңнiне тың кiрген. Олғаннар «Тайна замка на холме» спектакльны кӧрчеткеннерiнде, гаджеттерiнеңер дее ундут салғанға тӧӧй полғаннар, артисттернең хада ойнааннар, сегiргеннер. «Мастер и Маргарита» спектакльға тың морсынғаннар, уғаа чахсы ойын. Хакас театрның прай ойыннары пӧзiк синде турғызылғаннар.
Татарстанзар сыбыра ааллап кил турыңар, – теен Татарстан Республика культуразының саблығ тоғынҷызы Фанис Наилович.
Сом авторни
Автор :
Татьяна Тютюбеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде