Пос тілін пілгені – парыстығ
26.04.2024
Хабарлар
Хакасия пазы Валентин Коновалов чиңісчі олғаннарнаң хада
Сыйыхтас. Хакасияның ӱлгӱ туразында пизінҷі класстардағы ӱгренҷілер аразында ирткен хакас тілін иң чахсы пілчеткеніне марығның чиңісчілерін таныхтааннар
Пу марығ Хакасия пазы Валентин Коноваловтың чахиинаң правительство тимнеен «Хакас тілін хайраллиры паза тилідері» хазна программазы хоостыра 2021 чылдаң сығара иртірілче. Аны Хакасияның национальнай паза территориальнай политика министерствозы иртірче.
2024 чылдағы марығда 100 азыра олған араласхан: Асхыс аймаанаң – 69, Ағбан городтаң – 24, Таштып аймаанаң – 5, Пии аймаанаң – 9. Ӱгренҷілер хакас тілінең диктант пасханнар паза хакас тілі специалисттерінең чоохтазығ оңдайынаң сыныхтағ ирткеннер.
Прай иділген салтарлар соонаң иң кӧп сан чыып алған хыйғаҷахтарға республиканың ӱлгӱ туразында Хакасия пазы Валентин Коновалов, дипломнар пиріп, сыйыхтар читірген.
Іди иң кӧп балл чыып алған Пии аймаандағы Хызыл хара суғ аалдағы школаның ӱгренҷізі Екатерина Котюбеева. Хызыҷах ідӧк диктантты иң чахсы пазыбысхан. Ікінҷі орында пол парғаннар Татьяна Миндибекова (Хызыл хара суғ аалдағы школа), Марат Угдыжеков (Р.А.Кызласовтың адынаң Кызлас аалдағы школа), Маргарита Сагалакова (С.П.Ултургашевтің адынаң Индіркі Тӧӧ аалдағы школа). Ӱзінҷі орында – Аделия Барашкова (Ис аалдағы школа), Саяна Букатова (М.Е.Кильчичаковтың адынаң Ӱс чул аалдағы школа).
«Иң чахсы диктант» номинацияда чиңісчілер полыбысханнар: Екатерина Котюбеева (Хызыл хара суғ аалдағы школа), Амир Тюкпиеков (Хызыл хара суғ аалдағы школа), Булат Чертыков (Асхыс чоғархы аалдағы школа), Алина Кулемеева (Казанов аалдағы школа), Аяна Бурнакова (Индіркі Тӧӧ аалдағы школа).
Чиңісчілерні Хакасия пазы Валентин Коноваловтаң пасха, ідӧк чылығ алғыстаан Хакасияның национальнай паза территориальнай политика министрінің тоғызын толдырчатхан Лев Сафьянов.
Олар хакас тілін маңат пілчеткен олғаннарны ӱгреткен аға-ууҷаларға, паба-іҷелерге, ӱгретчілерге алғыстарын читіргеннер. Олғаннар пос тіліне ӧӧнінде сӧбірелерінде ӱгренчелер паза чоохтасчалар. Ӱгретчілернің дее хозымы улуғ. Пу чылның марығларында чахсы саринаң таныхтирға кирек Пии аймаандағы Хызыл хара суғ аалдағы школаның олғаннарын. Чоохтирға кирек, пу школаның ӱгренҷілері хакас тілі марығларында хаҷаннаңох сығара сыйыхтығ орыннар алчалар.
Амғы туста пос тілін чахсы пілгені парыс ағылча. Іди пу марығда прай 71 ӱгренҷее ахчалығ сыйых (чыып алған саннары хоостыра) пирерлер. Чиңісчі олған 25 муң салковай, ікінҷі орындағылар 23-ер муң паза ӱзінҷі орындағылар 21-ер муң салковай аларлар. Пасхазына 10-ар муң салковай пирерлер. Ахчаны, налог суурған соонаң, паба-іҷелерге ыс пирерлер.
Сом Альбина Чистогашевани
Автор :
Илья Топоев
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде