Сарыннар чыындызы чарыхха сыхты
26.04.2024
Хабарлар
Олег Чебодаев, Степанида Саможикова, Ирина Чустугешева
Культура. «Читіген» театрда Хакасия искусствозының саблығ деятельі, композитор, «Айланыс» ансамбльның артизі полған Александр Саможиковтың «Чарых чӱреемнең хакас чоныма» сарыннар чыындызының презентациязы ирткен
Ол Александр Степановичтің тӧреен кӱніне удур сығарылған. Хакас чонның сын оолғы 1951 чылда хосхар айының 20-ҷі кӱнінде Орджоникидзе аймаандағы Наа аалда тӧреен. Улуғ ачырғасха, илбек кӧгҷінің чуртазы хорғыстығ пандемия тузында ӱзіл парған.
– Піс Александр Степановичнең хада тоғынғаныбысха поғдархапчабыс, театрыбыстың хойнында «Айланыс» ансамбль парына ӧрінчебіс. Александр Степановичті сағызыбыста хаҷан даа ал чӧрчебіс, – чылығ тоғазығны асхан театрның устағҷызы Ирина Чустугешева.
Чуртас тооза композиторға пик чӧлег полған хонғаны Степанида Саможикова. Олар ӱр чыллар «Айланыс» ансамбльда хада сарнааннар. Степанида Степановна Хакасияның чон артизі полча.
– Александр Саможиков, спортнаң айғазарын тохтадып, сарыннар пазып пастаан. Пістің сӧбіре ансамбльы полған. Ағбанзар киліп, чайаачы марығларда араласчаңмыс. Андағ марығларның пірсінде чиңісчі пол парғабыс. Анаң пісті Москвазар «Останкино» телевидение кінінзер сарнирға ысханнар. Александр Степановичтің сарыннарын толдырып, артыхтарның санына кір парғабыс. Іди пастағы сарыннары хазнаның ӧӧн телевидениезінҷе чайылған.
«Айтыс» марығларға сыбыра чӧрҷеңміс. Пісті Хакас филармониязынзар тоғынарға хығырғаннар. Анаң «Читіген» театрда ансамбль тӧстелер тіп піліп алғабыс. Театрның директоры Александр Иванович Котожеков полған. Ол пісті тоғысха алып алған.
«Чарых чӱреемнең хакас чоныма» чыынды ӱс чыл тимнелген. Улуғ алғызымны Людмила Михайловна Конышеваа читірчем, ол ноталар пасхан. Юрий Петрович Челтыгмашев ноталарны компьютерге кирерге полысхан. «Айланыс» ансамбльға ідӧк улуғ алғыс: Олег Чебодаевке, Ирина Чугунековаа, Николай Тодышевке. Алынҷа алғызымны Хакасияның культура министерствозына читірчем. Министерство паза «Читіген» театрның директоры Ирина Васильевна Чустугешева чыындыны сығарарға ахчанаң хабас пиргеннер, – Александр Саможиковты сағысха киріп паза чыындыны сығарарында полысхан кізілерге алғызын читіріп, чоох тутхан Степанида Степановна.
Ідӧк саблығ хакас композитор Александр Степановичтеңер, аның матлама чайаачы тоғызынаңар чылығ сӧстер чоохтааннар хызы Светлана Саможикова, Хакасия искусствозының саблығ деятельі Олег Чебодаев, Россияның саблығ артизі, Хакасияның чон артизі Евгений Улугбашев паза туған-чағыннары.
Наа чыынды чарых ӧңніг. Аның тастын Александр Саможиковтың чатханнығ одырчатхан сіліг cомы чазапча. Сӧс алнын паза авторның чуртас чолынаңар хонғаны Степанида Саможикова пасхан. Александр Степанович чуртазында прай 70 азыра сарын-кӧг пас салған. Че пу чыындазар 30 ла сарын кирілген. Аннаңар композиторның хызы Светлана Саможикова мыннаң мындар пабазының пасха даа чыындылары сығар тіпче.
Презентация тузында Хакасияның олған искусство школазының паза искусство колледжінің ӱгренҷілері А.Саможиковтың «Аалҷыларым», «Иренек хан», «Торғайах», «Тадар хыстар» кӧг-сарыннарын, чатхан-хомыснаң морсымнығ ойнап, сіліг толдырғаннар.
«Чарых чӱреемнең хакас чоныма» чыындыны «Читіген» театрда садызып аларға чарир.
Сом Элина Кичеевани
Автор :
Татьяна Тютюбеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде