Спортха хынчатханнарның ӱлӱкӱні
Сыйыхтас. Ағбанда Физкультурник кӱніне чарыдылған пайрам ирткен. Анда 800 артиинаң кізі араласхан
Пістің хазнада Физкультурник кӱнін 1939 чылдаң таныхтап пастааннар. Итсе-де, календарьға ол 1980 чылда ла кирілтір. Ол чонны піріктірчеткен ӱлӱкӱн тізе, саба полбас, неке. Физкультурник кӱнін постарының пайрамына спортсменнер, тренерлер, методисттер, хазых чуртасха тартылчатханнар, ӧткін тынаға хынчатханнар санапча. Хакасияның физическай культура паза спорт министерствозының ӱлӱкӱнге чарыдылған мероприятиезі 11 августта ирткен.
Пайрам улуғ нимес видеонаң азылған. Аны пастыра чыылған чонға спортсменнернің паза тренерлернің чидіглерінеңер, cпорт организациялары тоғызынаңар иcкіргеннер. Ӧӧні – пӱӱл Россияның піріктірілген командаларына Хакасияның 75 спортсмені кірчеттір. Спортнаң айғазар иcтіг оңдайлар тӧстелчеткенде, хазых чуртасха тартылчатханнарның саны хозыл партыр. Спорт ачыхтарында чон ӱзілбинче.
Чыылған чонны ӱлӱкӱннең Хакасия пазының пастағы орынҷызы Татьяна Курбатова алғыстаан. Татьяна Анатольевна теен:
– Cпорт сферазында пик хуйахтығ чон істенче. Сірер чидіглеріңнең Хакасияның тилізіне улуғ хозым итчезер. Спортнаң айғасчатханнарның саны кӧптелзін. Наа чиңістер тудыңар, тӧреен чирібісті ырахха сабландырыңар.
Татьяна Анатольевнаа спорт министрі Сергей Кочан хозылған. Сергей Владимирович, чылығ сӧстер читіріп, прайзына пик хазых, часка алғаан. Пайрам тузында илееде кізее Хакасия пазының, правительствозының, спорт министерствозының алғыстас пічіктері читірілген. Сыйыхтатханнарның санында Таштып аймааның физическай культура паза спорт устаанының пастығы Сергей Карамашев, тренерлер Марат Кичеев, Татьяна Карамчакова, Виталий Сагалаков, Владимир Чучунов, Прокопий Тормозаков, кӱресчілер Наталья Малышеванаң Саид Алиев, теелбекчі Анатолий Ворошилов паза пасхазы полғаннар.
Чоннар аразындағы класстығ спорт узы Наталья Малышева – чиит іҷе, палазына 1,5 час. Хакасия абахайының таниинаң, ол спортнаң пір чыл чарым айғаспиндыр. Кӱресчі чоохтапча:
– ТРЕНИРОВКАЛАРҒА ПЫЛТЫР КӰСКӰЗІН АЙЛАНҒАМ. ПАСТАП ЧӰГӰРIСНЕҢ НЕ АЙҒАСХАМ, ДЕКАБРЬДАҢ КИБІСКЕ СЫҒЫП ПАСТААМ. 2022 ЧЫЛДА МИНІ СБОРЛАРҒА ЫЗЫП ПАСТААННАР. ЧИИТ ІҶЕЕ ХАРБАЗАРҒА СИДІК ПОЛТЫР.
Наташа Малышеваа хатығ чуххан полза даа, ол тӧдір пазынмаан. Тренері Владимир Чучуновтың устаанынаң кӱc алынып, августта чоннар аразындағы турнирде чиңіc тутты. Марығ Моол чирінде ирткен. Амды чир-суғҷыбыс Россияның иң кӱстіг спортсменнерінің I Спартакиадазында аралазарға тимненче. Кӱресчілернің марии 20 – 26 августта Хазанда иртер.
Амғы чайғы тренер Владимир Чучуновха ӱгренҷілерінің чидіглерінең танығлығ. Наташадаң пасха, Хакасияа медальны Владимир Сагалаков ағылған. Ол «Азияның кіні» тиксі Россиядағы турнирде ӱзінҷі орынға сыххан. Пу кибірліг марығ Хызылда 1978 чылдаң иртiрілчеттiр. Россияның спорт узы Владимир Сагалаковха 27 час, ол Ағбаннаң. Чиит кізі тренер Олег Васильевич Куртияковтың холында харбазып пастаптыр. Андағох чидіге Валерия Мистрикова читкен. 23-24 июльда Могилевта (Белоруссия) ирткен марығларда хакас хыс хола медаль холға кирген.
Пӱӱл «Азияның олғаннары» чоннар аразындағы марығда Хакасияның алты спортсмені кӱзін сынаан: Оксана Юношева паза Юлия Тебенькова (стол теннизі), Екатерина Карабут (дзюдо), Виктор Кульпин (атыс спорты), Анатолий Ворошилов (теелбек спорты) паза Саид Алиев (олаңай кӱрес). Халғанҷы ікі саарбахты алынҷа таныхтирға кирек. 14 частығ Толя Асхыс аймаандағы Пилтір аалдаң, тренері – чир-суғҷыбыс Прокопий Тормозаков. Толя, брейкингте аралазып, «Азияның олғаннары» марығның ікі номинациязында чиңіс тутхан. Хакас теелбекчілернің пу пастағы улуғ чидии. Тӱрчедең саарбахха спорт узына кандидат ат читірерге киректер. Таныхтирға кирек, брейкинг 2024 чылдағы Олимп ойыннарының программазына киріл парған.
Ідӧк Саид Алиев позын турыстыра кӧзітті. 15 частығ cпортсмен – тренер Виталий Сагалаковтың ӱгренҷізі. Аның устаанынаң 1-ғы класстаң харбасча. Пӱӱл саарбахтың чиңістерге пай чыл. Ол Сибирьдегі федеральнай округта чиңіс тутхан, ӱгренҷілер Спартакиадазында кӱмӱс призер полыбысхан, «Азияның олғаннары» марығда ӱзінҷі орынға сыххан. Саид Алиев – авар чонның оолғы, туғаннары ӧӧнінде Махачкалада чуртапчаттыр. Дагестанның кӱресчілері тилекейге сабланчалар. Кӧзідімге, пӱӱл олаңай кӱресче Россия чемпионадында Дагестанның командазы 18 медаль холға кирген: 5 алтын, 4 кӱмӱс паза 9 хола. Чемпионат Тувада ирткеннеңер, прайзы хонҷыхтарыбысха оң полар тіп сағынған. Салтарында Начын Монгуш ла ікінҷі орынға сығып алды. Пістің оолларыбыстаңар чоох таа чоғыл. Итсе-де, Сорығ городтаң сыххан Семён Терещенко ӱзінҷі орын ӱчӱн харбастыр, че ағаа оң полбиндыр. Артур Чебодаев, тізең, пастағыох хабыста утыр салған. Cаид Алиев Хакасияда тӧреен. Авар оолах, республикабыс ӱчӱн турызып, мыннаң мындар медальлар утхан полза, чахсы поларҷых.
Пайрам тузында ідӧк ветераннарны чеестееннер. Сыйыхтар 50-ҷе кізее читірілген. Ӧнетін сертификаттарнаң Наталья Иглинаны паза саблығ тренер Алексей Карамашевті таныхтааннар. Сыйыхтас аразында чыылған чонны чайаачыларынаң ырҷы Олег Гриценко, музыкант Ольга Кох (скрипка), «Лайм» амғы теелбек театрының ӧмезі ӧріндіргеннер.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |