Хоос гимнастика – пик хылыхтығ олғаннарға
13.03.2024
Статья
Кристина Боргоякова
Кӱн матыры
Пӱӱн піс хоос гимнастиканаң айғасчатхан Кристина Боргояковадаңар чоохтап пирербіс.
Сіліг ӧрбекей чіли учух чӧрчеткен хызыҷах Артём Гаврилович Боргояковтың паза Анастасия Юрьевна Топоеваның ынағ паза кӱстенҷік сӧбірезінде тӧреен. Кристина ортын хыстары полча. Ол 1-ғы класста ӱгренче, Марат харындазы – 5-ҷі класста, Лиза туңмаҷағы «Варенька» олған садына чӧрче.
Кристина пис частығ полғанда, ибінде торғы лента таап алып, аны ла айлахтап чӧрчеткен. Илееде кӱн ол лентанаң ойнаан, анаң іҷезіне мындағ спорт кӧрімінең айғазарға сағынчам, мағаа килістіре школа таап пир тіп сурынған. Анастасия Юрьевна, интернетсер кіріп, тілеп сыххан. Іди ол «Легенда» хоос паза эстетическай гимнастика федерациязына орта пол парған. Андар сығдырадыбысханда, хызыҷахты олох кӱнде постарынзар хығырғаннар.
Кристина пастағы тренировкаа пар килгенде, хоос гимнастика аның кӧңніне кірген. «Іҷем, мин пеер чӧрербін», – ӧрініп, чоохтанған ол іҷезіне.
Хызыҷах ікінҷі ле чылы гимнастиканаң айғас парир, че чидіглері улуғ. Тренері Лилия Алексеевна Карчигашева полча. Кристина марығларға Новокузнецксер, Новосибирсксер, Барнаулзар, Хазанзар чӧрген, Ағбанда сыбыра араласча. Аның І орыннығ пис медаль пар, ІІ орыннығ – ӱс медаль, ІІІ орыннығ – ікі медаль.
Полған на марығ соонаң Кристина чахсы кӧңніліг ибінзер килче. Ыраххы городтарзар парып, пос тус полза, оларны музейлерҷе ал чӧрчелер.
Пу кӱннерде Ағбандағы хоос гимнастика федерациязы Россия спортсмені Алина Кабаеваның «Небесная грация» спорт клубтарының ассоциациязына кіріп алған. Амды олғаннар хазнаның улуғ марығларында даа аралас поларлар.
– Хоос гимнастика пастыра палалар пиллерін кӧні, орта тударға пілчелер. Оларның ит-сӧӧктері пик полча, сағыстары улам чітіг тоғынча. Ідӧк гимнастикада музыканы истіп пілерге кирек полча, – тіпче іҷезі.
Кристина – кӱстенҷік хызыҷах. Иб аразында іҷезінең хада хайынарға маңнанча, кічіг туңмазын кӧрче. Пабазы тӧзек-частыхтар тікчетсе, иркеҷек хыринда ла полча, исті синирге полысча, линейканы алай рулетканы тут пирче.
Тынағ кӱннерде алай каникулларда сӧбіре Асхыс аймаандағы Индіркі Тӧӧ аалзар чӧрче. Анда Анастасия Юрьевнаның іҷезі Евдокия Фадеевна Сагатаева чуртапча. Кристина тай ууҷазында даа матлама хайынча. Іҷе-пабазынаң хада аалда ӱӱҷік тамаан салчалар, портах оттарны чулчалар. Аалда итчең тоғыс толдыра поладыр. Чайғызын чистектеп чӧрче, ӧӧнінде мискелерні тілирге уғаа хынча.
Евдокия Фадеевна пархаҷағының спорттағы чидіглеріне уғаа ӧрінче паза поғдархапча. Сӧбіреде пірдеезі пу спорт кӧрімінең айғаспаан полған.
Кристина школада чахсы ӱгренерге кӱстенче. Уроктар соонаң ибзер пирген тоғыстарны чапчаң идібізіп, табыраанҷа хынған тренировкаларына маңзырапча.
Хызыҷах ідӧк хоосхаҷаана хынча. Иртен турып, школаа парар алнында ол аны азырап салча.
Амды часхы каникуллар чағдапча, че Кристинаа тынанарға маң чоғыл. Аның тренировкалар улам кӧп полар, хоос гимнастиканаң 10.00 час иртеннең сығара 18.30 час иирге теере кӱннің cай айғазар. Апрель ортызында хызыҷах Новосибирсксер марыға парарға тимненче.
Кристинаның ӧӧн пӧгіні – чуртаста спорт узына читіре ӧзіп алары.
Сом сӧбіре архивінең
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде