«Саяны» команда «Енисей» ӧмені чиңіп алған
29.02.2024
Хабарлар
Таблодағы сан чӱрек ӧріндірче
Меспектіг хоккей. «Саяны» команда ибдегі халғанҷы ойыннарны иртірді
Меспектіг хоккейҷе Россия чемпионадының пастағы чардығы тоозыл таа парир. Республиканың хоккей ӧмезі салтарында хайдағ орынға сығарын тӱрчедең піліп аларбыс, пу хабарда 20 паза 23 февральда ирткен ойыннарынаңар чоох парар. Оларның пірcі «Саянының» тархынында хаҷанға даа халар.
20 февральда піcтің ооллар саблығ «Енисейнең» тоғасханнар. Хызылчардағы клуб хазнаның иң кӱстіг командаларының санына кірче. Хоккей ӧмезі 11 хати СССР-ның чемпионадында чиңіс тутхан, 5 хати – Россия чемпионадында. Ағаа хоза хызылчардағылар 4 хати тилекей кубогын утханнар. Пу чидіглерде Ломановтарның хозымы улуғ. Сергей Иванович хоккеист паза тренер чіли сабланча. 1980 чылларда аннаңар чоохтаҷаңнар: «Ломанов «Саяныны» чалғызан утып алар оңдайлығ». Чоох сынға тӧӧй. Аннаңох кӧп чидіге читкен саблығ тренернің оолғы Сергей Ломанов. Ломановтарның кічии он хати тилекей чемпионы полча. 20 февральда Россияның иң пӧзік устығ хоккеизі ідӧк Ағбандағы пуссар сыххан.
Матч алнында кӧбізінің cағыс полған: «Саяны» унада саптыр салар». Ноғадаңар? Августта хызылчардағылар пістіңнерні 13:2 саннаң чиңіп алғаннар, ноябрьда – 14:4 саннаң. Че ойын пасталғандох, «Саяны» пустың ээзі кем полчатханын кӧзіт пирген. Ікінҷі минутадох Иван Касаткин Чингис Хандамаевтің полызиинаң «ыырҷының» хаалхазынзар меспекті кире сабысты. Прайзы алаң ас парған, «ағырчатхан» улус – ӧрініске, хызылчардағылар – ачырғасха. «Ыырҷы», ӧкпелен парып, атакаа пар сыххан, пістіңнер халбинчалар. 8 минута пазынаң «Саянының» хаалхазынзар пастағы меспек учухча, тӱрчедең – ікінҷізі. Сан – 1:2. Утырчабыс. Хоккеисттерібіс пос салынминчалар. 18-ҷі минутада Михаил Лисюк санны тиңнестірібіскен. Ойын хынығ парчаттыр. Денис Петров «Енисейнің» хаалхазынзар ӱзінҷі голны кире сабысханда, кӧрігҷілернің ӧрчіліг хысхырыстарын прай Ағбан искен, неке.
Сизінгенде, «Саяны» команда пастағы таймны чахсы ойнабысхан соонда, ойынның ікінҷі чардығын турыстыра иртір полбинча. 20 февральда кирек пазох іди парыбызар тіп чочыныс полған. Чон тиктең чӱрексеен. Оолларыбыс, хыниина кірібізіп, 49-ҷы минутада пазох голнаң ӧріндіргеннер. Сан – 4:2. «Саяны» алнында. Че «Енисей» – пӧзік устығ ӧме. Ойынның ӱзінҷі чардығында хызылчардағылар пус чазызынаң ээленібіскеннер тирге чарир. Сах андох «Саянының» хаалхазынзар ікі меспек учух килген. Пірcінің авторы – Сергей Ломанов. 43 частығ хоккеист аны 12 метрдең кире сабысхан. Сан 4:4 пол парды, «Саяны» тайм-аут алча. Таң, тренерлернің чӧптері полыс пирген, таң, 20 февраль «Саянының» кӱні полған, пістіңнер «Енисейні» 5:4 саннаң чиңіп алғаннар. Командаа чиңіс голын Михаил Лисюк ағылған.
Итсе, матч соонда «Енисей» ӧнетін утыр салған тіп чоохтар пар сыххан. Анзы сын нимес. Россия чемпионадының ікінҷі хурчаа хызылчардағыларға уғаа сидік иртче. 8 январьдаң пасти хонҷыхтарыбыс соон сӱрістіре 8 командаа, ол санда «Мурманға» паза «Волгаа», утыр салғаннар. «Саяны» – «Енисейні» чиңіп алған тоғызынҷы ӧме. Хызылчардағылар «СКА-Нефтяникнең» не тиңни ойнабысханнар. Кӧрігҷілер саблығ клубты плей-оффсар даа ирт полбас тіп чочын сыхханнар. Андағ оңдайларда хайдағ команда «ыырҷызына» чиңісті сыйлир? Хоза пір танығ. Ағбанда ирткен матчта Сергей Ломанов 2000-ҷы голын кире сабыстыр. Хызылчардағыларның таниинаң, ол тилекей рекорды полча. Специалисттер анзынаң чараспинчалар. 2019 чылда sports.ru сайтта саблығ хоккеист Сергей Обухов 2279 гол сабысхан тіп искірілген. Чидігні статистика танығлары киречілепче.
23 февральда «Саяны» Кемеровтағы «Кузбасснаң» тоғасхан. Пір сӧснең, пістіңнер аалҷыларға 2:10 саннаң унада саптырыбысханнар. Кемеровтағылар «Енисей» ӱчӱн ӧс алғаннар чіли пілдірген. Пӱӱнгі кӱнде «Саянының» 14 сан, пістіңнер 13-ҷі орында парчалар. 29 февральда хоккей ӧмезі «Сибсельмашнаң» тоғазар.
Сом «Саяны» клубти
Автор :
Майя Кильчичакова
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде